АБНА24 Хәбәр Верир , Лавров дејиб ки, АТӘТ-ин Минск Групунун һәмсәдрләри олан АБШ вә Франса бу формат чәрчивәсиндә Русија илә әлагә сахламагдан имтина едибләр.
Русијалы назир сөзләрини белә изаһ едиб: “АТӘТ-ин Минск Групу үчлүјүнүн ҝәләҹәк талејинин неҹә олаҹағыны дејә билмәрәм. Чүнки русофобијанын тәсири алтында олан америкалы вә франсалы тәрәфдашларымыз Русија илә тәмаслары ләғв етмәјә ҹан атараг, АТӘТ-ин Минск Групуну да ләғв едибләр. Бу формат чәрчивәсиндә бизимлә әлагә сахламагдан имтина едибләр. Әҝәр онлар Гарабағда вә бүтөвлүкдә Ҹәнуби Гафгазда марагларыны гурбан вермәјә һазырдырларса, бу, онларын сечимидир”.
Лавров вурғулајыб ки, АБШ вә Франса тәкҹә бу мүнагишә дејил, һәм дә диҝәр јерләрдәки мүнагишәләрдә дә русофоб сијасәтләринә әсир олурлар, өз биртәрәфли ирадәсини диктә етмәк үчүн һамыны бүтүн форматларда гаршылыглы әлагәни дајандырмаға мәҹбур едирләр. Әҝәр Франса вә АБШ Гарабағ мүнагишәси барәдә белә гәрар верибләрсә, Аллаһ онлары мүһакимә едәҹәк.
Русијанын Хариҹи Сијасәт Апаратынын рәһбәри гејд едиб ки, Русија бу ҹүр јанашманы мәсулијјәтсиз һесаб едир, лакин бу, Москваны нараһат етмәјәҹәк. Чүнки Русија Азәрбајҹанла Ермәнистан арасында мүнасибәтләрин нормаллашмасына, һабелә Азәрбајҹан, Русија вә Ермәнистан арасында үчтәрәфли форматда әлдә олунмуш разылашмаларын јеринә јетирилмәсинә тәрәфдар олараг галмагдадыр вә рәсми Москва Азәрбајҹанла Ермәнистан арасында јекун сүлһ мүгавиләсинин имзаланмасы үчүн лазым олан шәраитин јарадылмасына көмәк етмәјә һазырдыр вә үмид едир ки, тәрәфләр арасында сәрһәдләрин делимитасијасы вә демаркасијасы үзрә комиссија тезликлә јарадылаҹаг.
Хатырладаг ки, Ермәнистан тәрәфи дәфәләрлә АТӘТ-ин Минск Групунун һәмсәдрләринин һимајәси алтында Гарабағ низамланмасы үзрә данышыгларын бәрпасынын тәрәфдары олдуғуну ачыглајыб.
342/
10 aprel 2022 - 12:26
Xəbər kodu: 1246687
Русијанын хариҹи ишләр назири Серҝеј Лавров ермәни һәмкары Арарат Мирзојанла бирҝә кечирдији мәтбуат конфрансында Минск Групу илә бағлы сенсасион ачыглама вериб.
