АБНА24 Хәбәр Верир,мүхтәлиф мәнбәләрдән дахил олан хәбәрләрдә билдирилир ки, ермәниләр Гарабағда силаһ-сурсатларынын сајыны артырырлар. Бүтүн бунларын исә Русија сүлһмәрамлыларынын ҝөзү гаршысында баш вермәси Азәрбајҹан иҹтимаијјәтини һиддәтләндирир. Бәзи експертләр идә хәбәрдарлыг едирләр ки, ермәниләрин ганунсуз силаһлы бирләшмәләринин сон 1 иллик мүддәтдә етдикләри әмәлләр, төрәтдикләри тәхрибатлар демәјә әсас верир ки, гаршы тәрәф реванша, даһа бөјүк тәхрибатлара һазырлашыр. Бунунла бөлҝәдәки вәзијјәти ҝәрҝинләшдирмәјә чалышыр.
Милли.Аз-а ачыгламасында һәрби-сијаси експерт Телман Гасымов дејиб ки, 10 нојабр разылашмасына әсасән ермәниләрин бүтүн ганунсуз силаһлы дәстәләри Гарабағы тәрк етмәли иди, һалбуки һазырда онлар Гарабаға дислокасија олунублар, фәалијјәт ҝөстәрирләр. Бу да фактдыр ки, һәтта континҝентин Гарабағда олмасы белә ганунсуз ермәни силаһлыларынын тәхрибатлар төрәтмәләринә, атәшкәсин тез-тез позулмасына әнҝәл олмады. Һәтта онларын төрәтдикләри бу тәхрибатлар нәтиҹәсиндә Азәтбајҹан ордусунун шәһидләри дә олду.
Експерт Гәрб дөвләтләрини дә Ермәнистанын Гарабағда мөвгеләрини ҝүҹләндирмәсиндә мараглы олдуглары хатырладыб. “Ермәнистан өзбашына дејил, хүсусилә дә Гәрб һазырда Ермәнистанын Гарабағда мөвгеләрини ҝүҹләндирмәкдә мараглыдыр. Чох ҝүман ки, сүлһмәрамлылара мүгавимәт ҝөстәрмәк үчүн дә ганунсуз ермәни силаһлыларына Гәрбдән тапшырыглар ҝәлиб ки, Гарабағда вәзијјәт даһа да гејри-сабит һал алсын вә Гәрбин дә гошунларынын бөлҝәјә ҝәлиши үчүн зәрурәт јарансын, имкан дүшсүн”, - дејә Телман Гасымов гејд едиб.
342/
