Ермәнистан Хариҹи Ишләр Назирлијинин бәјанатында дејилир: “БМТ Низамнамәсинә зидд олараг вә октјабрын 31-дә Сочидә гәбул едилмиш ҝүҹ тәтбиг етмәк һәдәсиндән чәкинмәјә даир јазылы өһдәлик ҝөтүрмәсинә бахмајараг, Азәрбајҹан президенти јенидән Ермәнистан Республикасыны ҝүҹ тәтбиг етмәклә, Дағлыг Гарабағ әһалисини исә етник тәмизләмә илә һәдәләјир. Ҝөрүнүр, Азәрбајҹан рәһбәрлији әввәлләр әлдә едилмиш разылашмалары, о ҹүмләдән 10 нојабр 2020-ҹи ил тарихли үчтәрәфли Бәјаннамәнин мүддәаларыны, һабелә бејнәлхалг һүгугун фундаментал принсипләрини позмагда вә мәһәл гојмамагда исрарлыдыр. Президент Әлијевин Дағлыг Гарабағла Ермәнистан арасында әлагәни кәсмәси буна сүбутдур. Һазырда исә ачыг шәкилдә ејһам вурур ки, Гарабағ ермәниләри Лачын дәһлизинин бағланмасындан дәрс алмасалар, ҹәзаландырылаҹаглар”.
Бәјанатда сонра гејд олунур ки, өһдәликләрин позулмасы бунунла мәһдудлашмыр. Азәрбајҹан президенти Дағлыг Гарабағын нүмајәндәләри илә диалога башламаг әвәзинә онлары репрессија вә ҹинајәт тәгиби илә һәдәләјир. Ејни заманда иддиа едир ки, Дағлыг Гарабағ проблеми јохдур. Вә бу давраныш һазыркы данышыгларын мәнтигинә зиддир.
Ермәнистан ХИН тәкид едиб ки, Азәрбајҹанын әрази бүтөвлүјүнүн танынмасы она Дағлыг Гарабағ әһалисинә гаршы етник тәмизләмә апармаг сәлаһијјәтини вермир. “Азәрбајҹан президенти өз бәјанаты илә Дағлыг Гарабағ әһалисинә гаршы нөвбәти аксијаја зәмин һазырлајыр вә онлары өз вәтәнләриндә азад, тәһлүкәсиз вә ләјагәтлә јашамаг һүгугундан мәһрум етмәк истәјир. Әлијев ејни заманда Ермәнистанын мүстәгиллијини вә әрази бүтөвлүјүнү шүбһә алтына алараг бүтүн сивил ҹәмијјәтә мејдан охујур. Бу истигамәтдә Азәрбајҹан рәһбәрлијинин агрессив риторикасындан вә һәрәкәтләриндән ҝөрүндүјү кими, һәмин дөвләт проблемләрин һәллини Ермәнистан Республикасынын Алма-Ата Бәјаннамәси илә мүәјјән едилмиш сәрһәдләрлә әрази бүтөвлүјүнү танымагда ҝөрмүр”, - Ермәнистан Хариҹи Ишләр Назирлијинин бәјанатында гејд олунур.
342/