Әһли-Бејт (әлејһимус сәлам) – Бејнәлхалг Хәбәр Аҝентлији- АБНА: Солна мәһкәмәси 18 јашына јахын олан оғлана һөкм чыхарыб. Јенијетмә јашларынын сонларында олан бу оғлан мәһкәмә тәрәфиндән ирги әдавәти гызышдырмагда тәгсирли билинир.
Синиф јолдашлары илә тәкбәтәк сөһбәтиндә о, ҝәләҹәкдә насист саламы (Hell seger) илә Мәсҹидә гаршы тәдбир ҝөрмәји планлашдырдығыны ачыглајыб. О, бу шәхси сөһбәтиндә дә бәјан едиб ки, “ағ олмајанлар ағларын гулудур”.
Һадисә өтән илин јазында, оғлан Стокһолм бөлҝәсиндәки мәктәбдә он синиф јолдашы илә онлајн сөһбәт групу јаратдыгда баш вериб. Онун групдакы месажларында ағдәрили олмајанларын иргчи тәсвирләри, мүсәлманлары өлдүрмәјә чағырышлар, свастика шәкилләри вә насист интернет сајтларындан материаллар олуб.
Арашдырмалар нәтиҹәсиндә мәлум олуб ки, оғлан блокнотда насист символлары, “Исвечлиләр илк” кими ифадәләр вә күтләви атышмаларын тәсвирләри илә јанашы, мүһаҹирләрә гаршы иргчи ифадәләрин јер алдығы јазылар чәкиб.
О, һәмчинин “Aktivclub Sweden” ифрат сағ һәрәкаты илә әлагәли груп олан “Стокһолм Ағ Оғланлары” групуна аид тәблиғат материалларыны сахлајырмыш.
Полисин мәлуматына ҝөрә, оғлан "әвәзедиҹи инсанлар" вә "ағ сојгырымы" кими суи-гәсд нәзәријјәләри илә бағлы инанҹларыны да ифадә едиб. Оғланын мәктәбинин бир нечә мүәллими арашдырма заманы шаҝирдин дәрс саатларында Һитлер саламы вердијини тәсдигләјиб вә бу һадисә мәктәбин мүшаһидә камералары тәрәфиндән дә гејдә алыныб.
Солна мәһкәмәси оғланы 30 саат иҹтимаи иш ҹәзасына мәһкум етди, бу һөкмдән шикајәт етмәк мүмкүн дејил.
Оғлан, вәкили васитәсилә, иши шәрһ етмәкдән имтина едәрәк, "артыг һеч бир екстремист идеолоҝијаја ҹәлб олунмадығыны" иддиа едиб.
Sizin rəyiniz