Әһли-Бејт
(әлејһимус сәлам) – Хәбәр Аҝентлији АБНА-нын вердији мәлумата әсасән, Һолландијалы
депутат Жорам Ван Клаверен Ислам дини әлејһинә китаб јазаркән өзү дә мүсәлман олуб.
Онун етирафларыны әкс етдирән видео сосиал шәбәкәләрдә марагла гаршыланыб.
2010-ҹу илдән 2017-ҹи иләдәк Һолландијада милләт вәкили олан 39 јашлы Клаверен илк заманлар "Гуран" китабыны "зәһәр" адландырараг, анти-Ислам чыхышларыјла ҝүндәмә ҝәлиб. Инсанлары бу диндән узаглашдырмаг үчүн о, китаб јазмаг фикринә дүшүб.
"Мәгсәдим Исламы тәнгид едән вә сәһв олдуғуну сүбута јетирән бир китаб јазмаг иди, амма өзүмү тамамилә фәргли бир јердә тапдым", - дејә Клаверен етираф едиб.
Китаб үзәриндә чалышдығы мүддәтдә 2018-ҹи илдә о, Ислам динини гәбул едәрәк мүсәлман олуб вә әксинә, "Диндән чыхмыш" ("Афваллиҝе") адлы китаб јазараг бир чохларынын гәзәбинә туш ҝәлиб, чүнки әтрафындакы инсанларын әксәријјәти онун христианлығы тәблиғ едәҹәјини дүшүнүбләр.
Заманымызда Исламы садәҹә тәнгид етмәклә кифајәтләнмирләр, нифрәт долу сөзләр ишләтмәк дә артыг адиләшиб. Инсанлара һәр ҝүн телевизија вә мәтбуат васитәси илә Исламын шиддәт долу бир дин олдуғуну тәлгин едирләр, лакин һеч ким Һз. Мәһәммәдин шәфгәтиндән, хәстәләрә јардымындан вә с. данышмыр", - дејә сабиг депутат вурғулајыб.
Бүтүн манеәләрә бахмајараг, Клаверенин китабынын илк тиражы артыг түкәниб. Китабын икинҹи нәшринин инҝилис, әрәб вә түрк дилинә тәрҹүмә олунмасы планлашдырылыр.
Диггәт: Хәбәрдән Истифадә Етдикдә Мәнбәјә Истинад Лазымдыр!
