Әһлибејт (ә) Хәбәр Аҝентлији абна-“Бу, јени сигнал дејил. Көһнәдән ҝедән просесдир. Мөвҹуд ҝедишата ҹәмијјәт тәрәфиндән һеч бир мүгавимәт олмајыб, белә дә давам едәҹәк. Чүнки журналистләр тәкбашына һеч нә едә билмәјәҹәкләр. Онсуз едә дә билмирләр. Һәрә өз ишијлә мәшғулдур вә нәтиҹәси ҝөз өнүндәдир”.
Медиа һүгугу үзрә експерт Халид Ағалијев исә Меһман Һүсејновун бөһтана ҝөрә һәбс едилмәсини ҝөзләнилмәз сајмыр. Дејир, блоҝерин инзибати гајдада ҹәзаландырылмасындан дәрһал сонра ДИН-ин Баш Прокурорлуға мүраҹиәт едәрәк М.Һүсејновун бөһтан атмасыны арашдырмасыны истәмәси һәбсин хәбәрчиси иди:
"Бөһтана ҝөрә ҹинајәт ганунларынын ишләмәсинә мораториум гојулмасы барәдә дејиләнләр ҝерчәк дејилди. Бөһтан вә тәһгирә ҝөрә ҹинајәт ҹәзасы нәзәрдә тутан маддәләр сакитҹә ишләјирди. Әсасән интернет медиасында чалышанлар давамлы олараг мәһкәмәјә чәкилирди. Онлара ҹидди ҹәзалар тәтбиг едилмирди, анҹаг бу маддәләр “ҝөз горхутмаг” функсијасыны јеринә јетирирди. Елә дүнән Сумгајыт Апелјасија Мәһкәмәси бөһтана ҝөрә һәбс олунмуш ики нәфәри хејли ҹәза чәкдикдән сонра азадлыға бурахмышды".
Х.Ағалијев Меһман Һүсејновла бағлы гәрарын ҹидди позунту олдуғуну сөјләјир:
“Блоҝер полисин она ишҝәнҹә вердијини ачыглајыб. Полис исә буну сөјләмәклә она бөһтан атдығыны иддиа етмишди. Полислә бәрабәр блоҝер дә она ишҝәнҹә верилмәсинин арашдырылмасыны истәмишди. Анҹаг Баш Прокурорлуг ишҝәнҹә шикајәти үзрә ҹинајәт иши ачылмасындан имтина етмишди. Һазырда прокурорлуғун һәмин гәрары мәһкәмә гајдасында мүбаһисәләндирилиб. Бәлкә сабаһ мәһкәмә блоҝерә доғрудан да ишҝәнҹә верилдији гәнаәтинә ҝәләҹәк? Мәнҹә, мәһкәмә ән азы ишҝәнҹә иддиасы илә бағлы бүтүн проседурларын битмәсини ҝөзләмәли иди”.
Диҝәр тәрәфдән, һүгугшүнас дејир ки, бу гәрар Авропа Мәһкәмәсинин бөһтан вә тәһгирлә бағлы преседент һүгугунун позунтусудур. Авропа Мәһкәмәси ифадә азадлығына ҝөрә һәбс ҹәзасыны истисна едир. Она ҝөрә дә блоҝерин ифадә азадлығына һәбс формасында мүдахилә ганунсуздур. Мартын 3-дә Сураханы Рајон Мәһкәмәси блоггер Меһман Һүсејновун 2 ил азадлыгдан мәһрум едилмәси барәдә һөкм чыхарыб. Блоггер мәһкәмә залында һәбс едилиб.
Диггәт! Хәбәрдән истифадә етдикдә мәнбәјә истинад лазымдыр!
