Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, бу ҝүн гондарма “Нардаран иши” илә бағлы нөвбәти мәһкәмә просеси давам етдирилиб.
Бакы Ағыр Ҹинајәтләр Мәһкәмәсиндә “Мүсәлман Бирлији” һәрәкатынын сәдр мүавини Шиә руһаниси Елчин Гасымов вә диҝәр танынмыш Шиә руһаниләри Сејјид Сејфәддин Ширванов, Фәрһад Мурадов, Рамил Әлијев, Елҝүн Ахундов, Вүсал Алыш, Иса Ибраһимов, Ағаәли Јәһјајевин, Наһид Гәһрәманов, Сејмур Асланов, Әли Шаһбазов, Әмирли Әлијев ҹинајәт иши үзрә мәһкәмә просеси давам етдирилиб.
Мәлумата ҝөрә, әдаләтсиз һаким Мајыл Бајрамовун сәдрлик етдији просесдә ШӘРЛӘНӘН шәхсләрдән Иса Ибраһимовун вәкили Азәр Нағыјев мүдафиә етдији шәхсин јанында отурмасы барәдә вәсатәт вериб. Мәһкәмә вәсатәти тәмин етмәјиб.
Даһа сонра иҹласда тәгсирләндирилән шәхсләрдән Сејјид Сејфәддин Ширванов вә Рамил Әлијев ифадә вериб.
Сејјид С.Ширванов истинтаг заманы ишҝәнҹәјә мәруз галмадығыны дејиб:
"2015-ҹи ил декабрын 8-дә 13-ҹү Полис Бөлмәсиндән мәнә мүстәнтиг зәнҝ едиб деди ки, машынла бағлы бөлмәјә ҝетмәлијәм. Мән дә дедим ки, машыным јохдур. Деди: "Ҝәл, ајдынлашдыраг".
Декабрын 9-да ҝедән кими мәндән Талеһ Бағырзадәни таныјыб-танымамағымы сорушду. Мән дә дедим ки, онунла ушаглыгдан достуг. Бундан сонра мәни рәисин отағына апарды. Рәис истәди мәни тәһгир едиб, вурсун. Лакин мән дуа охудум, истәдијин едә билмәди. Мән "Мүсәлман Бирлији" Һәрәкатында тәблиғат шөбәсинә рәһбәрлик етмишәм. Һәр заман дини тәблиғат апармышам. Бу тәблиғат милли дәјәрләрлә әлагәдар олуб. Даһа сонра мәни "Бандотдел"ә апардылар. Орада Микајыл Гулијев адлы мүстәнтиг мәндән ифадә алды. Мән алты сәһифәлик ифадә вердим. Вәкил мәнә ишарә еләди охујум, сонра имза едим. Лакин мән баша дүшмәдим вә охумадан имзаладым. Сонра ашағы дүшәндә јадыма дүшдү ки, мәнә он беш сәһифәлик ифадә имзалатдырды. Лакин мән алты сәһифәлик ифадә вермишдим. Даһа сонра мәнә евимдән ҝүја силаһ чыхмасы барәдә сәнәдә гол чәкдирмәк истәдиләр. Мән имза етмәјәндә дедиләр, һәјат јолдашын имзалајыб. Әҝәр сән имтина етсән арвадыны тутуб онун адына јазаҹағыг. Мән дә горхумдан имзаладым. Бир нечә ајдан сонра јолдашымла данышанда бу барәдә сорушдум. Деди ки, евдә ҝәлиб ахтарыш апарыблар. Лакин һеч нә тапа билмәјибләр вә бу барәдә јолдашыма имза еләтдирибләр. О заман алдатдыгларыны баша дүшдүм. Мүстәнтиг Микајыл Гулијев чох горхаг адам иди. Нә вахт мәнлә ҝөрүшүрдү, дејирди, һаггыны һалал елә".
О, истинтаг заманы дөјүлмәдијини дејиб.
Даһа сонра иҹласда фасилә елан едилиб. Фасилә заманы гыса чыхыш едән тәгсирләндирилән шәхсләрдән Ағаәли Јәһјајев дејиб ки, онун бир јашында олан өвлады хәстәдир:
"Ушаг үрәк гүсуру илә доғулуб. Ганунла онун мүалиҹә вә мүајинәси дөвләт тәрәфиндән апарылмалыдыр. Бунунла бағлы Һејдәр Әлијев Фондуна вә Нәрҝиз Пашајеванын фондуна мүраҹиәт етдик. Лакин бизә мүсбәт ҹаваб верилмәди. Бундан сонра гардашлар пул топладылар. Ушаг бир нечә ҝүнә әмәлијјата ҝирәҹәк".
Руһани Елчин Гасымов исә чыхыш едәрәк һүгуг мүдафиәчиси Лејла Јунуса тәшәккүр едиб:
"Лејла Јунуса тәшәккүр едирәм ки, јүзләрлә кишинин етмәдијини едир. Бизим һагг сәсимизи дүнјаја чатдырыр. О вә јолдашы һәбс едиләндә биз онлары мүдафиә едирдик. Биз демишдик ки, Азәрбајҹанда һүгуг мүдафиәчиси һәбс едилиб 7-8 ил азадлыгдан мәһрум едилирсә, һүгугдан данышмаг әсассыздыр. Бундан сонра иҹра нүмајәндәси атамы чағырыб демишди: "Оғлуна де ермәнипәрәсти мүдафиә етмәсин". Огтај Ҝүлалыјевә тәшәккүр едирәм ки, сијаси мәһбусларын сијаһысыны һазырлајыр. Тәәссүфләр олсун ки, Азәрбајҹанда әдаләтли мәһкәмә јохдур. Телеканалларда дебатлар тәшкил едилир, сифаришли адамлар чыхыб радикал мүхалифәтдән данышыр. Радикаллыг едәнләр бизә мүсибәт едәнләрдир. Бизә хәбәрләр чатыр ки, Ҝәнҹәдә, Ағаҹабәдидә Мәсҹидләр сөкүлүр. Мәсҹид һәм дә милли дәјәрдир. Әксәр сарај моллалары Мәсҹидләрдән өз мүлкләри кими истифадә едир. Һансы Мәсҹиддә исә һагг сөз данышылыр, ораја тәзјигләр олур. Бунун архасында һансы чиркин мараглар дурур? Бүтүн ҹамеәдән буну арашдырмағы хаһиш едирәм. Ислам ојунлары тәшкил олунан, Ислам Һәмрәјлији иИи олан өлкәдә Ислам дининә тәзјиг едилир. Бунлар ганунлары ајаг алтына алыблар. Инанырам сивил мүбаризә даим давам едәҹәк. Өлкәдә ким һаггы дејир, олур радикал. Бизи данышығымыза ҝөрә тутублар, анҹаг јенә дә сусдура билмирләр. Дејирик, өлдүрүн, дејирләр, шәһидлик имканынын сизә вермәрик. Бу залымларын сону олаҹаг. Биз истәјирик Азәрбајҹанда һәр шеј сивил јолла олсун".
Фасиләдән сонра тәгсирләндирилән шәхсләрдән Рамил Әлијев ифадә вериб. О билдириб ки, сонда халг онларын ҝүнаһсыз олдугларынын шаһиди олду:
"Бүтүн имамлар залым һакимләрин дөврүндә јашајыблар вә чох гурбан верибләр. Динин инкишафы залым һакимләрин сајәсиндә баш вериб. "Бандотдел"дә мәним башыма о гәдәр вурдулар ки, ахырда һушуму итирдим. Мәним әсәбләрим орада позулуб".
О, һакимләрә дә мүраҹиәт едиб:
"Сизин үзәринизә бөјүк мәсулијјәт дүшүр. Һаким өз һакимилијини Аллаһдан алыр. Аллаһ сизә буну гисмәт едиб. Гәлбиндә Аллаһ горхусу олан шәхсин бизим ишимизә бахмасыны истәмирәм. Әҝәр аиләнизи, өзүнүзү дүшүнүрсүнүзсә, бу ишә бахмагдан имтина един".
Һаким М.Бајрамов исә она тәшәккүр едиб вә маһијјәти үзрә ифадә вермәсини истәјиб. Р.Әлијев исә ифадәсинин давамында дејиб ки, тутулан ҝүндән һүгуглары позулуб:
"Бизә гаршы едиләнләр бүтүн Азәрбајҹан халгына гаршы едилән һөрмәтсизликдир. Биз һәр заман сөзүмүзү демишик. Бир ҹинајәтин сүбута јетирилмәси үчүн ики нәфәрин шаһидлији кифајәт едир. 68 нәфәр дејир, "Бандотдел" бизә зүлм едиб, һеч ким әһәмијјәт вермир. Әмәлијјатчылар, мүстәнтигләр дејирләр: "Бизә јухарыдан белә тапшырыг верилиб". Беләликлә, президенти, назирләри ҝөздән салырлар. Мүсәлманлара олан зүлмләр битмир. Билирик ки, бундан сонра да һәбсләр олаҹаг. Бизи дә нараһат едән мәсәлә будур. Дин елә бир гүввәдир ки, ону јандырыб күл етмәк олмур. Биз һагсызлыға етираз етдијимиз үчүн бурадајыг. Бүтүн иттиһам әсассыздыр. Ишҝәнҹә верибләр, нә десәјдиләр, имза едәҹәкдим".
Даһа сонра һаким дејиб ки, тәгсирләндирилән шәхсләрин ишҝәнҹәјә мәруз галмаларынын арашдырылмасы үчүн Баш Прокурорлуға мүраҹиәт едиләҹәк.
Гејд едәк ки, адлары чәкилән шәхсләрин бир гисми "Мүсәлман Бирлији" Һәрәкатынын үзвүдүр. Тәшкилатын сәдри, илаһијјатчы Талеһ Бағырзадә 2015-ҹи ил нојабрын 26-да Нардаранда кечирилмиш әмәлијјат заманы һәбс олунуб. Мәһкәмәнин һөкмү илә 20 ил мүддәтинә азадлыгдан мәһрум едилиб.
Елчин Гасымов исә Нардаран һадисәләриндән өнҹә - нојабрын 5-дә тутулуб. О, Инзибати Хәталар Мәҹәлләсинин 310-ҹу (полис ишчисинин гануни тәләбинә гәсдән табе олмама) маддәси илә ШӘРЛӘНДИРИЛИБ вә 30 сутка инзибати һәбс ҹәзасы алыб. Даһа сонра барәсиндә ҹинајәт иши башланыб, Нәсими Рајон Мәһкәмәсинин гәрары илә барәсиндә һәбс-гәтимкан тәдбири сечилиб. Гасымов Елчин Камал оғлу Ҹинајәт Мәҹәлләсинин 28, 214.2.1, 28, 214.2.3, 214-2, 220.2, 228.3, 228.4, 278, 279.1, 281.2, 283.2.3, 320.1, 320.2, 221.2.2 ве 315.1-ҹи маддәләри, Јәһјајев Ағаәли Елдар оғлу 28, 214.2.1, 28, 214.2.3, 214-2, 220.2, 228.3, 228.4, 233, 278, 279.1, 281.2, 283.2.3 вә 315.2-ҹи маддәләри, Гәһрәманов Наһид Нәсиб оғлу, Ширванов Сејфәддин Нурулла оғлу, Мурадов Фәрһад Мирзәһәсән оғлу, Әлијев Рамил Забил оғлу, Ахундов Елҝүн Әнвәр оғлу, Алыш Вүсал Надир оғлу, Ибраһимов Иса Тофиг оғлу, Асланов Сејмур Тәрлан оғлу, Шаһбазов Әли Атабала оғлу вә Әлијев Әмирәли Исмајыл оғлу Ҹинајәт Мәҹәлләсинин 28, 214.2.1, 28, 214.2.3, 214-2, 220.2, 228.3, 228.4, 278, 279.1, 281.2, 283.2.3-ҹү маддәләри илә ШӘРЛӘНИЛИРЛӘР.
Нөвбәти гондарма мәһкәмә просеси февралын 24-дә давам едәҹәк.
Диггәт: Хәбәрдән истифадә етдикдә мәнбәјә истинад лазымдыр
