Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Октјабрын 26-да Бакы Ағыр Ҹинајәтләр Мәһкәмәсиндә "Мүсәлман Бирлији" Һәрәкатынын һәбсдә олан сәдри Тале Бағырзадә, АХҸП сәдринин мүавини Фуад Гәһрәманлы вә диҝәрләринин ҹинајәт иши үзрә мәһкәмә просеси кечирилиб.
Истәјирик ганунлар һамы үчүн ишләк олсун
Мәлумата ҝөрә, просесдән әввәл чыхыш едән Талеһ Бағырзадә дејиб ки, онларын мәгсәди Ислам дөвләти гурмаг дејил:
"Биз истәјирик ки, ганунвериҹиликлә олсун һәр шеј тәтбиг олунсун. Бизим ҝөзәл ганунларымыз вар. Истәјирәм ки, ганунлар һамы үчүн ишләк олсун. Октјабрын 18-и Мүстәгиллик Ҝүнүдүр. Лакин бајрам кими гејд етмирләр. Бунларда дөвләт анлајышы јохдур, анҹаг пландыр. Елә билирләр ки, Һејдәр Әлијев һәр шејдир. Бизим тарихимиз, шәхсијјәтләримиз вар. Биз она ҝөрә савашырыг ки, дөвләтчилијимиз ҝүҹләнсин. Елә билирләр ки, анҹаг Һејдәр Әлијев вә онун ушаглары һакимијјәтдә олмалыдыр. Бунлары ән чох горхудан бизим Әли Кәримли вә Милли Шура илә бирлыикдә олмағымыздыр. Биз диндарлара да баша салырыг ки, Милли Шура, Әли Кәримли дүз јолдадырлар вә онларла бағлы дејилән јаланлара инанмасынлар.
Милли Шура диндарлары мүдафиә едир вә бизим архамыздадыр. Фуад Гәһрәманлы да бизи мүдафиә етдији үчүн һәбс едилиб. Бунлар јерә дә ҝирсәләр, ҝөјә дә чыхсалар, бизә нәсә едә билмәзләр. Ҝаһ дедиләр, Ирана ишләјирәм, ҝаһ дедиләр, Америкаја. Һеч олмаса бирини дејәрдиләр. Бизим киминсә малијјәсинә еһтијаҹымыз јохдур. Аллаһ бунлара өз әлләри илә тәлә гурублар. Бунлар да чабалајырлар вә чабалајанлар да тез батырлар".
Әнвәр Сејидов бизә сөз верди
Даһа сонра Талеһ Бағырзадә ҝәнҹ фәал Гијас Ибраһимова һөкм охујана һаким Әнвәр Сејидовла бағлы арајыш вериб: "Бир мүддәт әввәл Әнвәр Сејидов ҝәлиб бизә деди ки, нараһат олмајын, сизи бурахаҹаглар. Биз дә она дедик ки, Гијас Ибраһимовла бағлы әдаләтли гәрар чыхарсын. О да бизә сөз вериб ҝетди. Лакин һамы ҝөрдү ки, неҹә ағыр ҹәза верди. Бунунла сүбут етди ки, һакимијјәтин әлалтысыдыр. Дејирди ки, нәсли сејиддир. Сејид она гәним олсун ки, ҝәнҹ вә ҝүнаһсыз бир адама елә ағыр ҹәза верди".
Мүлки ҝејимли полисләр залдан чыхарылды
Даһа сонра иҹласда Нардаран сакини шаһид Валеһ Аббасов ифадә вериб. О, јазыб-охумағы баҹармадығыны, истинтаг заманы вердији ифадәни охумадығыны дејиб. Буна ҝөрә онун истинтаг заманы вердији ифадәси елан едилиб. Ыстинтаг заманы вердији ифадәсиндә дејиб ки, Талеһ Бағырзадәнин Әбүлфәз Бүнјатовун евиндә гонаг олмасыны билиб, ораја ҝедиб. Талеһ Бағырзадә ислам дөвләти јаратмагдан, силаһланмагдан, дөвләт чеврилиши етмәкдән данышыб. В. Аббасов мәһкәмә заманы дејиб ки, елә бир ифадә вермәјиб.
Даһа сонра иҹласда мәлум олуб ки, Сабунчу рајон Полис Идарәсинин 14-ҹү Полис Бөлмәсинин әмәлијјатчылары мүлки ҝејимдә залда әјләшибләр. Тәгсирләндирилән шәхсләрин тәләбиндән сонра онлар залдан чыхарылыб. Һаким дејиб ки, ачыг просес олдуғу үчүн һәр кәс иҹласда иштирак едә биләр. Фуад Гәһрәманлы исә дејиб ки, әҝәр бир даһа белә бир һал тәкрарланса, етиразла гаршылајаҹаглар.
Мәним елә чыхышым олмајыб
Иҹласда шаһид гисминдә Бәхтијар Ашуров да ифадә вериб. Маштаға сакини олан Б. Ашуров дејиб ки, јолда ҝедән заман полис әмәкдашлары ону сахлајыб ифадә алмаға апарыблар. О, истинтаг заманы вердији ифадәни охумадығыны дејиб. Онун да истинтаг заманы вердији ифадә елан едилиб. О, ифадәсиндә дејиб ки, Талеһ Бағырзадәни мәсҹиддә чыхыш едән заман ҝөрүб. Т. Бағырзадә дини дөвләт гурмагдан, дөвләт чеврилиши етмәкдән данышыб.
Талеһ Бағырзадә исә дејиб ки, онун елә бир чыхышы олмајыб: "Мәним бүтүн чыхышларым интернетдә вар. Әҝәр белә ифадә олсајды, чохдан үзә чыхмышды".
Фуад Гәһрәманлы дејиб ки, бу ҹүр ифадәләр иттиһамы тәсдиг јох, ифша едир.
Шаһид Самир Бабајев исә дејиб ки, өтән ил нојабрын 5-дә Елчин Гасымовун һәбсинин сәбәбини өјрәнмәк үчүн Сабунчу рајон Полис Идарәсинә ҝедибләр. Бу заман онлары тутуб идарәдә ишҝәнҹә верибләр: "Ағәли Јәһјајевин шалварыны ҹырыб, ҹинсијјәт үзвүнә ток вердиләр. Бизи јыхыб јерә дөјүрдүләр. Сорушурдулар ки, пешмансыныз. Дејирдик јох, јенә дөјүрдүләр. Мәни бир ҝүн сахлајандан сонра азадлыға бурахдылар".
С. Бабајев дејиб ки, Нардаран һадисәләриндән сонра ону Баш Мүтәшәккил Ҹинајәткарлыгла Мүбаризә Идарәсинә чағырыб диндирибләр: "Мәни диндирәндә Ислам Ағабәјов да орада иди. Талеһ Бағырзадәнин нәдән данышмасы һаггында сорушдулар. Мән дә дедим ки, диндән данышыб. Сонра Һаҹы Әлинин вә башгаларынын шәклини ҝөстәриб дедиләр јаз ки, бунлар дөвләтә гаршы чыхыблар. Мән дә дедим ки, ҹәһәннәм одундан горхурам, едә билмәрәм. Ифадәни имзалјанада исә охумаг истәдим, гојмадылар". О, ифадәләринин бир һиссәсини тәсдиг етмәјиб.
Вәкилләр исә дејибләр Ислам Ағабәјов иш үзрә зәрәрчәкмиш кими танынан полисләрдән биридир вә мәһкәмәдә ифадә верән заман ондан иш үзрә һансыса истинтаг тәдбириндә иштирак едиб-етмәмәси барәдә сорушуланда, о "јох" ҹавабыны вериб. Вәкилләр һәмин мәсәләнин арашдырлмасы үчүн И. Ағабәјовун јенидән мәһкәмәдә диндирилмәси барәдә вәсатәт верибләр. Мәһкәмә вәсатәти тәмин етмәјиб.
Дәфәләрлә ганымы ахыдыблар
Талеһ Бағырзадә дејиб ки, Азәрбајҹан һакимијјәти шиддәтдән, адам өлдүрмәкдән истифадә едир: "Һаҹы Мәммәдов, Акиф Чөвдаров ҝөз габағындадыр. Дәфәләрлә мәни апарыб дөјүб, ганымы ахыдыблар. Амма мән киминсә ганыны төкмәмишәм. Бәзән гандан данышанда сәһв баша дүшүрләр. Биз өз ганымыздан данышырыг. Азәрбајҹан һакимијјәти репрессијалары чохалда биләр. Биз дә өз ганымызда онлары боға биләрик. Өлдүрсәләр дә, бу јолдан дөнән дејилик".
Аббас Һүсејнов исә дејиб ки, о һәбс олунмаздан әввәл Балаханыда ишләјиб: "Мән тәхмини Ислам Ағабәјовун евинин јерини билирәм. Орада ишләјәндә ешитдим ки, Балаханыдакы наркобаронлара Ислам Ағабәјов "кришалыг" едир".
Даһа сонра иҹласда шаһид гисминдә Илгар Атакишијев ифадә вериб. О билдириб ки, истинтаг заманы она Фуад Гәһрәманлы һаггында суаллар верилиб.
Вәкил Немәт Кәримли ондан сорушуб ки, Фуад Гәһрәманлынын статусларыны охујандан сонра онда дөвләт чеврилиши етмәк фикирләр јараныб, јохса статуслар онун фикринә тәсир етмәјиб?
Шаһид белә бир фикир јаранмадығыны дејиб.
Даһа сонра онун истинтаг заманы вердији ифадәси елан едилиб. О, ифадәсиндә билдириб ки, Ф. Гәһрәманлы радикал олдуғу, халгы митингләрә, иғтишашлара чағырдығы үчүн онун фикирләрини гәбул етмир.
Бу ифадәјә мүнасибәт билдирән шаһид исә ифадәсини там охумадан имзаладығыны дејиб: "Ифадәми компүтердә јазыб вердиләр. Мән дә имзаладым ки, тез бурадан чыхыб ҝедим".
Просес октјабрын 28-дә давам едәҹәк.
Диггәт: Хәбәрдән истифадә етдикдә мәнбәјә истинад лазымдыр
