Суаллар: Гуран һансы ҝеҹә назил олду? Гуран нечә шәкилдә назил едилди? Гәдр ҝеҹәси һаггында нә билирсиниз?
Гәдр сурәсинин мәтни һаггында: Сурәдә охујуруг: «Һәгигәтән, биз (Гураны) гәдр ҝеҹәси назил етдик; Сән нә билирсән ки, гәдр ҝеҹәси нәдир? Гәдр ҝеҹәси мин ајдан даһа үстүндүр; О ҝеҹә мәләкләр вә руһ Рәббинин изни илә һәр бир ишә ҝөрә јерә енәрләр; О ҝеҹә дан јери сөкүләнә кими саламатлыг, әмин-аманлыгдыр.»
Сурәдә Гуранын гәдр ҝеҹәси назил едилдији бәјан олунур. Бу ҝеҹә мин ајдан үстүн сајылыр.
Әлбәтдә гејд етмәлијик ки, Гуран Кәрим ики шәкилдә назил олмушдур:
1. Сурәнин 1-ҹи ајәсиндә ҝөстәрилдији кими, Гуран Кәрим әввәлҹә бүтөв шәкилдә назил олуб вә белә бир ҝөндәриш «инзал» адланыр. Бу мәрһәләдә Гуран Кәрим ваһид руһ кими һәзрәт Пејғәмбәрә бүтөвлүкдә назил олмушдур. Һәзрәтин малик олдуғу бу руһ «Гуран руһу» адланыр.
2. Гуран Кәрим икинҹи мәрһәләдә тәдриҹән назил олмушдур вә белә бир ҝөндәриш «тәнзил» адланыр. Бу мәрһәләдә Гуранын кәлмәләри, нәгл олунмуш әһвалатлар мүхтәлиф мүнасибәтләрдә һәзрәт Пејғәмбәрә тәдриҹән 23 ил әрзиндә назил олмушдур. Гәдр ҝеҹәсинин мин ајдан үстүн олмасы онун дәјәрини ҝөстәрир. Гуран гәдр кеҹәси назил олмушдур. Рәвајәтләрдә билдирилир ки, гәдр ҝеҹәси олунан ибадәт мин ајлыг ибадәтдән үстүндүр. Гәдр ҝеҹәси илин ҝеҹәләриндән биридир. Гаршыдакы илдә баш верәҹәк һадисәләр һәмин ҝеҹә мүәјјәнләшир. Бу ҝеҹә мүбарәк рамазан ајынын 19, 20, 21-ҹи ҝеҹәләриндән биридир.
Гәдр ҝеҹәси јерлә ҝөј арасында әлагә јараныр. Ҝөјүн гапылары јерин үзүнә ачылар, санки ҝөјлә јер бирләшир. Мәләкләр вә руһ һәмин ҝеҹә инсана назил олар. Әлбәттә ки, мәләкләрин назил олмасы үчүн инсанын гәлби мүнасиб һалда олмалыдыр.
Һәмин ҝеҹә сүбһәдәк әмин-аманлыгдыр. О ҝеҹә Аллаһын мәрһәмәти она үз тутмуш бүтүн бәндәләрә шамил олар. Һәмин ҝеҹә шејтанларын һијләси тәсирсизләшәр. Гәдр ҝеҹәси әзаб гапылары бағлы, Аллаһын мәрһәмәт гапылары исә ачыгдыр.
Диггәт: Хәбәрдән истифадә етдикдә мәнбәјә истинад лазымдыр
