Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән бу ҝүн Бакы Ағыр Ҹинајәтләр Мәһкәмәсиндә "Азадхебер" сајтынын баш редактору, Исламчы журналист, виҹдан мәһбусу Ниҹат Әлијев вә онунла бирликдә тәгсирләндирилән диндарлар Нәсиров Елвин, Ҹамалов Горхмаз, Һүсејнов Елимхан, Һүсејнов Самир, Тофиги Емин, Мәммәдов Сәфәр, Әлијев Әлинин нөвбәти мәһкәмә иҹласы кечирилиб.
Һаким мәһкәмә иҹласында иштирак етмәјән бәзи шаһидләрин мәҹбури ҝәтирилмәләри барәдә гәрар гәбул едиб.
Даһа сонра шаһид гисминдә Әлијев Самид мәһкәмә истинтагына ифадә вериб.
О вердији ифадәдә билдириб ки, "Мән һадисә баш верән ҝүн ахшам саат 7-дә саһиби олдуғум ҝејим мағазасына ҝетдим. Орада олан мүлки ҝејимли полис ишчиләри мәни Јасамал Рајон 27-ҹи полис бөлмәсинә апардылар. Ҝеҹә саатларына гәдәр дәһлиздә ҝөзләдим. Даһа сонра мәни баш идарәјә апардылар."
Шаһид ифадәсини битирдикдән сонра Дөвләт Иттиһамчысы вә Вәкилләр шаһидә бир сыра суаллар үнванлајыб.
Д.И- Ниҹат Әлијеви неҹә вә нә шәкилдә танымысан?
Шаһид- Мүштәри кими таныјырам.
Д.И- Ниҹат Әлијеви ахырынҹы дәфә нә вахт ҝөрмүсүнүз?
Шаһид- Узун мүддәт иди ҝөрмүрдүм.
Д.И- Сәни ахшам дүкана бахыш үчүн ҝәтирәндә орада нә ҝөрдүн?
Шаһид- Һечнә ҝөрмәмишәм.
Д.И- Илкин истинтаг дөврү әрзиндә вердијиниз ифадәләри тәсдиг едирсиниз?
Шаһид- Бәли тәсдиг едирәм. Амма мәни полис бөлмәсинә апаранда орада ҝеҹә мәнә бир сәнәд имзалатдылар. Даһа сонра дедиләр ки, ҝедә биләрсән. Јәни дедиләр ки, сәнлик бир шеј јохду.
Вәкил- Сизин иштиракынызла протокол тәртиб олунмушду?
Шаһид- Хејр.
В- Бәс нијә билмәдијиниз протокола гол чәкмисиз?
Шаһид- Јәгин ҝеҹә мәнә имзалатдырылан сәнәдләр иди о дедијиниз протокол. Амма билмәмишәм протокол олдуғуну.
Шаһид Әлијев Самид ифадәсини битирдикдән сонра Нәсиров Елвинин вәкили һаким гаршысында вәсадәт галдырараг мәһкәмә иҹласынын гапалы кечирилмәсини хаһиш едиб. О буна сәбәб олараг, Нәсиров Елвинин мәһкәмә истинтагына ифадәни гапалы шәкилдә кечирилән просесдә вермә тәләби олуб. Просес гисмән гапалы кечирилиб. Елвин Нәсиров вә Ҹејһун Сәфәрли билдирибләр ки, етираф ифадәләринә имза атмаг үчүн онлара дәһшәтли ишҝәнҹәләр верилиб.
Нөвбәти мәһкәмә иҹласы ијун ајынын 14-ү саат 10:30-а тәјин олунуб.
Диггәт: Хәбәрдән истифадә етдикдә мәнбәјә истинад лазымдыр
