“Нахчыван Али Мәҹлисинин сәдри Васиф Талыбовун гардашы Мәһәррәм Талыбова мәхсус ”Ҝәмигаја" ширкәтинин Батумидә инша етдирдији објектләрин тикинтиси дајандырылыб". Бу барәдә Ҝүрҹүстандакы мәнбәләрдән мәлумат дахил олуб.
Мәнбәнин дедијинә ҝөрә, һәлә өтән ил Нахчыван Али Мәҹлисинин сәдри Васиф Талыбов Батумијә сәфәри заманы бешулдузлу һотелин тикинтиси барәдә јерли мерија илә разылыг әлдә етмишди. Лајиһәјә ҝөрә, көһнә “Ритса” һотелинин јериндә тикиләҹәји ҝөзләнилән вә “Лондон” адланаҹаг һотелин тикинтиси исә һазырда дајаныб.
Мәлумата ҝөрә, тикинти ишләринә рәсмән өтән илин ијулун 26-да башланыб. Һотелин әрсәјә ҝәлмәси үчүн илкин олараг 15 милјон доллар вәсаит ајрылыб. Амма ортада бир шәрт дә олуб. Шәрт ондан ибарәт имиш ки, гәдим тарихи олан “Ритса” һотелинин әввәлки ҝөркәминә зәррә гәдәр дә хәләл ҝәлмәмәлидир. Бундан башга, һотелдә чалышаҹаг ишчиләрин әксәријјәти Ҝүрҹүстан вәтәндашлары олмалыјмыш.
Амма “Ҝәмигаја” бу шәртләрин һеч биринә риајәт етмәјиб. Һотелин тикинтисиндә, ишчи гүввәсинин әмәк һаггындан тутмуш, тикинти материалларынын алынмасына гәдәр - бүтүн мүһасибат хәрҹләри, неҹә дејәрләр, “гара мүһасибат” јолу илә апарылыб.
Јајылан хәбәрләрә ҝөрә, Ҝүрҹүстанын јени һөкумәти “Ҝәмигаја” ширкәтини тикинти просесиндән мүвәггәти узаглашдырыб, һазырда отел әтрафында ҹидди малијјә јохламалары апарылыр. Отелдә әввәлки кими 60 отағын олаҹағы планлашдырылса да, Талыбовлар отагларын сајынын 96-ја чатмасыны истәјибләр. Бу исә көһнә һотелин мејарларына ујғун ҝәлмәјиб. Јери ҝәлмишкән, һотел 2013-ҹү илин мајында истифадәјә верилмәли имиш.
Мәнбәнин дедијинә ҝөрә, бундан башга, “Ҝәмигаја” Ҝүрҹүстанын Кетски рајонунда чахыр заводуну да алыбмыш. Бу заводун алынмасы илә бағлы да ҹидди ганун позунтуларынын олдуғу да иддиа едилир.
Талыбовларын Кобулети рајонунда истираһәт мәркәзләринин тикинтиси дә јарымчыг галыб. Бу лајиһәләрә дә милјонларла доллар хәрҹләнибмиш.
Мәнбә дејир ки, Батумидә казино вә һотелчиликлә мәшғул олан Түркијә ширкәтләринин дә фәалијјәти ҹидди тәфтишә мәруз галмагдадыр.
