Билдијимиз кими, Мәсумлардан (әлејһимус сәлам) башга һамынын ҝүнаһы вар. Амма әмәлләрә диҝәр бир тәрәфдән нәзәр салдыгда ҝөрүрүк ки, инсанлар ики дәстәдир:
Бәзиләри ҝүнаһа јол вердикдә пешман олур, ҝөрдүјү ишдән виҹдан әзабы чәкир, һәтта өзүнә нифрәт едир. Мәһз бу пешманчылыг сәбәбиндән төвбә едир вә гәрара ҝәлир ки, бир даһа белә бир иш ҝөрмәсин. Беләләри ҝүнаһ јүкүнү јүнҝүлләшдирмәк үчүн хејир ишләр ҝөрүр, ҝүнаһларыны јумаға чалышыр.
Диҝәр бир дәстә исә давамлы шәкилдә ҝүнаһа јол верир, амма пешманчылыг чәкмир, төвбә һаггында дүшүнмүр. Онлар санки ҝөрдүкләри ишин ҝүнаһ олдуғундан хәбәрсиздирләр. Унудурлар ки, ҝүнаһын давамы ону бөјүк ҝүнаһа чевирир, һәтта Аллаһын рәһмәт гапысыны инсанын үзүнә бағлајыр. Давамлы ҝүнаһ нәтиҹәсиндә инсан әбәди әзаба дүчар олур. Гур`ани-мәҹиддә беләләринин агибәти һаггында бујурулур: “Бәли, етдикләри һарам әмәлләр ҝүнаһа јол верәнләри башдан-баша бүрүјүр. Беләләри од әһлидир вә орада әбәди галаҹаглар.”
Ујғун мөвзу илә бағлы һәзрәт Әли (әлејһис сәлам) бујурур: “Ән ағыр ҝүнаһ о ҝүнаһдыр ки, саһиби ону кичик сајсын.”
Ҝүнаһ Аллаһла мүхалифәтчилик, илаһи ганунлара е`тинасызлыг, гәһр-гәзәб саһиби олан Аллаһ гаршысында өзбашыналыгдыр. Бә`зән ҝүнаһкар хилафа јол вердијини, Аллаһ гаршысында һәдди ашдығыны, ҝүнаһ васитәси илә тәгва вә фәзиләтдән мәһрум олдуғуну, бир сөзлә, өз хәтасыны е`тираф едир вә нараһат олур. Бә`зән исә ҝүнаһкар өз ҝүнаһыны кичик сајыр, Аллаһ ганунуну поздуғуну дүшүнмүр. О, тәсәввүр етмир ки, бу ҝүнаһ васитәси илә һимајәдән мәһрум олуб сүгута јахынлашыр. Өзүнү елә апарыр ки, санки ади бир иш ҝөрмүшдүр.
Ајдындыр ки, һәр ики шәхс ҝүнаһа јол вермишдир. Амма онларын ҹәзалары ејни дејил. Биринҹи шәхс заһирән бөјүк ҝүнаһа јол версә дә јүнҝүл ҹәзаландырылар, икинҹи шәхс исә кичик ҝүнаһа јол версә дә ағыр ҹәзаландырылар. Аллаһ ганунларыны позан инсанлар Гијамәтдә әмәлләринә ҝөрә ҹәзаландырылар. Салеһ иш ҝөрәнләр өз ишинин фајдасыны әлдә едәр. Имам Садиг (әлејһис сәлам) һәзрәт Әлинин (әлејһис сәлам) дилиндән нәгл едир: “Гијамәт ҝүнү фајдалы олан иш кичик дејил. Һәмин ҝүн зијанлы олан иш дә кичик сајылмыр. Аллаһын сизә вердији хәбәрләри өз ҝөзүнүзлә ҝөрүрмүш кими олун.”
Имам Һәсән Әсҝәри (әлејһи сәлам) һәзрәт Пејғәмбәрин (сәлләллаһу әлејһи вә алиһ) дилиндән нәгл едир: “Еј Аллаһ бәндәләри, ҝүнаһдан, ҝүнаһы јүнҝүл сајмагдан чәкинин. Чүнки ҝүнаһ өз саһибини алчалдыб бәдбәхт едир. Белә ки, инсан јол вердији ҝүнаһдан да бөјүјүнә дүчар олуб даим ҝүнаһ едир. Етдији ҝүнаһы јүнҝүл сајдығы үчүн, бәдбәхт олуб бөјүк ҝүнаһа батыр. Нәһајәт, Пејғәмбәр (сәлләллаһу әлејһи вә алиһ) вәсисинин (ҹанишинин) вилајәтини инкар едир, Пејғәмбәр (сәлләллаһу әлејһи вә алиһ) рисаләтиндән үз дөндәрир. О, Аллаһын бирлијинин инкары учурумуна јуварлананадәк ҝүнаһыны давам етдирир.”[156] Диҝәр бир рәвајәтдә һәзрәт Пејғәмбәр (сәлләллаһу әлејһи вә алиһ) ҝүнаһын давамыны ҝүнаһдан да пис сајыр: “Ҝүнаһдакы дөрд шеј ҝүнаһын өзүндән даһа писдир: Ҝүнаһы кичик сајмаг, ҝүнаһла өјүнмәк, ҝүнаһа батмагла мүждәләмәк, ҝүнаһы давам етдирмәк.”
ҜҮНАҺЫН ДАВАМЫ НӘТИҸӘСИНДӘ РУЗИНИН АЗАЛМАСЫ
Һәр бир ҝүнаһын хүсуси тәсири вар. Һәзрәт Әлинин (әлејһис сәлам) нәзәринҹә, ҝүнаһ инсанын рузисини кәсир, ону вә аиләсини јохсуллуға дүчар едир: “Ҝүнаһын давам етдирилмәси рузинин кәсилмәсинә сәбәб олур.”
ҜҮНАҺЫН ДАВАМЫ НӘТИҸӘСИНДӘ АХИРӘТДӘ САЛЕҺ ӘМӘЛЛӘРИН РӘДД ОЛУНМАСЫ
Инсан руһу хәлг олундугдан сонра әбәдидир. Бу, ахирәтә апаран бир јолдур. Ҝүнаһы давам етдирмәклә ахирәтимизи виран гојмајаг. Имам Садигин (әлејһис сәлам) нәзәринҹә, ҝүнаһын давамы инсаны салеһ әмәлләрин мүкафатындан мәһрум гојур. Јәни инсан өзү өз әли илә ахирәтини виран гојур. Имам (әлејиһс сәлам) бујурур: “Анд олсун Аллаһа, Аллаһ ҝүнаһын давамы илә мүшајиәт олунан һеч бир итаәти гәбул етмәз.”
Исламда ҝүнаһлар вә ҹәзалар
Һүсејн Кәрими Зәнҹани
Диггәт: Хәбәрдән истифадә етдикдә мәнбәјә истинад лазымдыр
