Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Азәрбајҹан Президент Администрасијасынын иҹтимаи-сијаси шөбәсинин мүдири Әли Һәсәнов Ван-Ирәван авиарејсинин ачылмасына мүнасибәт билдирәркән дејиб: “Азәрбајҹан дәфәләрлә бәјан едиб вә јенә дә бәјан едир ки, ишғалчы Ермәнистан дөвләти вә Дағлыг Гарабағдакы сепаратчы режимлә һәр һансы тәмаса һәссаслыгла јанашырыг. Хүсусилә дә бу тәмас бизим дост дөвләтләр тәрәфиндән олдугда”.
Онун сөзләринә ҝөрә, рәсми Бакы бу ҹүр тәмаслара ишғалчы өлкәјә дәстәк вә онун ҝүҹләндирилмәси кими јанашыр: “Бу дәстәк исә ишғал фактыны узадыр. Буну Азәрбајҹанла стратежи мараглары үст-үстә дүшән дөвләтләр реаллашдырдыгда, буна икигат гысганҹлыгла јанашырыг. Бу, тәк бизим дејил, ејни заманда Түркијә иҹтимаијјәтинин дә мүнасибәтидир”.
Ә.Һәсәнов хатырладыб ки, бир мүддәт әввәл Ермәнистан-Түркијә сәрһәдләринин ачылмасы мәсәләси ортаја чыханда да бу мәсәлә Түркијә иҹтимаијјәти, сијаси партијалар вә Түркијә һөкумәти тәрәфиндән дәстәкләнмәјиб: “Ван-Ирәван авиарејсинин ачылмасыны Ермәнистандакы ишғалчы режимә һансыса формада верилмиш рәсми дәстәк кими гијмәтләндиририк”.
Диггәт: Хәбәрдән истифадә етдикдә мәнбәјә истинад лазымдыр
