Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Гошун Исмајыллыдан чыхарылды. Бу барәдә мәлуматы рајон сакинләри вериб. Онларын сөзләринә ҝөрә, өтән ҝүндән артыг Дахили Гошунларын вә Чевик Полис Алајынын 200-ә јахын әмәкдашы рајону тәрк едиб. Сәбәб кими ҝуја Исмајыллыда ҝәрҝинлијин олмамасыдыр.
Рајон сакинләри дејирләр ки, Исмајыллыда ҝәрҝинлик һәлә дә галмагдадыр. Онлар билдирирләр ки, рајонда ҝәрҝинлик олмасајды гоншу рајонлардан да полис гүввәләри чыхарыларды. Мәлумата ҝөрә, Гәбәләдә вә Исмајыллыја гоншу башга рајонларда һәлә дә полис гүввәләри вар. Исмајыллыда исә мүлки ҝејимли шәхсләр ҝөзә дәјмәкдәдир. Онлар вәтәндашларла сөһбәт едир, үмуми вәзијјәти өјрәнирләр. Рајон сакинләриндән алдығымыз мәлумата ҝөрә, Исмајыллы олајына ҝөрә һәбс олунан сакинләрин вәзијјәти јахшы дејил. Онлар дејирләр ки, һәбс олунан шәхсләри полис бөлмәләриндә дөјүрләр вә онлардан өзләринә сәрф едәҹәк ифадә алмаг истәјирләр.
Исмајыллыдан “Азадлыг”а үнванланан мәктубда башга мәтләбләрә дә тохунулуб. Онлар јазырлар ки, рајону башдан-баша олигарх-мәмурлар зәбт едиб.
Белә ки, рајонун Ивановка кәндиндә Әмәк вә Әһалинин Сосиал Мүдафиәси назири Фүзули Әләкбәровун 10-дан чох маликанәси вар. Назир колхозчуларын евләрини әлә кечирәрәк өзүнә ҝөз охшајан имарәтләр уҹалдыб. Исмајыллы Әләкбәровларын курасијасында олса да, анҹаг бу о демәк дејил ки, бурадакы бүтүн имарәтләр бу ики гардашындыр. Ивановкада вә рајонун башга кәндләриндә дә диҝәр мәмурларын виллалары вар. Белә ки, Ивановкада Нәглијјат назири Зија Мәммәдовун, онун депутат гардашы Елтон Мәммәдовун, Әдлијјә назири Фикрәт Мәммәдовун, Губанын иҹра башчысы Мүбариз Ағајевин, Фүзули Әләкбәровун мүавини олмуш Нәби адлы шәхсин дә сөзүҝедән кәнддә вилласы вар.
Рајон сакинләринин мәлуматына ҝөрә, зәбт олунмуш әразиләрин сијаһысында Исмајыллынын Басгал кәнди дә вар. Бу кәнддә исә ашағыда адлары һалланан мәмур-олигархларын маликанәләри вар. Дахили ишләр назири Рамил Усубов, Тәһсил назири Мисир Мәрданов, Нәглијјат назири Зија Мәммәдов, Гафгазын шејхи Аллаһшүкүр Пашазадә, Президенти Администрасијасынын Һүгуг-мүһафизә органлары илә иш шөбәсинин мүдири Фуад Әләсҝәров, АЗАЛ-ын президенти Ҹаһанҝир Әсҝәров, “Бинә” тиҹарәт мәркәзинин саһиби Кәбирә Мәммәдова, Дипломат Академијасынын ректору, (Меһрибан Әлијеванын әмиси) Һафиз Пашајев, халг шаири Зәлимхан Јагуб вә башга шәхсләрин Басгалда имарәтләри уҹалдылыб.
Исмајыллынын Бујнуз кәндиндә исә рајонун полис рәиси Низами Гоҹајевин, Сәбајел рајон полис идарәсинин рәисинин виллалары вар.
Исмајыллынын Чајговушанкәнд дејилән әразисиндә Фүзули Әләкбәровун, Мүдафиә Назирлијинин Баш Гәрарҝаһ рәиси Нәҹмәддин Садыговун, Милли тәһүлкәсизлик назиринин мүавини Һилал Әсәдовун маликанәләри уҹалдылыб.
Исмајыллыда тикилән објектләрин чоху исә Әләкбәровлара мәхсусдур. Белә ки, Ивановкада чөрәк сехи, рајонун мәркәзинә јахын әразидә тикилән кәрпиҹ заводу назирин курасијасындадыр.
Фүзули Әләкбәровун Мәммәдағлы кәндиндә хариҹдән ҝәтирдији хариҹи ҹинс һејванлары бәсләјән фермасы вар. Мәлуматлара ҝөрә, назир ферманын иншасына ҝөрә јахынлыгда јашајан бүтүн сакинләри бир аз узаға көчүрмәли олуб.
Рајонун Вәләсин јајлағы адланан үнванда Фүзули Әләкбәровун даһа бир бөјүк имарәти вар ки, илин чох вахтыны бурада кечирир. Бурадан ова ҝедән назирин вә онун јахынларынын бу имарәтә ҝәлмәк үчүн вертолјотдан истифадә етдији сөјләнилир.
Диггәт: Хәбәрдән истифадә етдикдә мәнбәјә истинад лазымдыр
