Мән бу шәхс һаггында ешитмишдим. Әлбәттә ки, һәр кәс кими мән дә онунла ҝөрүшмәк истәјирдим. Бир ҝүн мөминләрлә бирликдә Губаја јола дүшдүк. Онун евиндә гонаг олдуг. Һәгигәтән онунла илк танышлығымда ешитдијим шәхсин мәнәви бир адам олмасына шүбһәм галмамышды…
Илаһи, инсан гонаг ҝәлмәсинә, өзүдә илк дәфә ҝөрдүјү бир гонағын ҝәлмәсинә белә севинәрми? Данышығындакы сәмими тәвазө, бахышындакы сахталыгдан узаг еһтирам, рәфтарындакы һәгиги гардашлыг…
Чох ирфандан дәм вуранлар ҝөрмүшүк. Сонрадан онларын “кәрамәт”ләринин шаһиди дә олмушуг. “Аз јемәклә бағлы һәдис”ләрдән данышанларын јемәк сүфрәсиндән дурмаг истәмәдијини, тәкәббүрдән аз гала өлмәк тәһлүкәсилә оланларын “јаланчы тәвазө” етмәсини, өлмүш гардашынын әтини јемәјин пислијини данышанларын гејбәтлә бәрабәр бөһтандан горхмадығыны аз ҝөрмәмишик.
Анҹаг бу шәхс һәгигәтән һеч данышмадан әмәли илә өзүнүн кимлијини мөминләр арасында сүбут етмишди.
Азәрбајҹанда елә бир руһани јохдур ки, онун “сәһви”ни тутмасынлар. Анҹаг бу шәхсин мәнәви бир шәхс олмасына бу ҝүнә гәдәр, киминсә (ағыллы бир ираддан сөһбәт ҝедир, тәккәббүрлү вә ријакарлары нәзәрдә тутмурам) ирад тутмасыны ҝөрмәмишәм.
Өлкәдә мәнәви јолу тутан адларыны гејд етмәк истәмәдијим руһаниләр белә, онун зијарәтинә ҝедәр, ондан мәсләһәтләр алардылар. Сүфрәдә аз једијини, гејбәтә зәмин јарадан сөһбәтләрдән гачдығыны, дуалардакы шөвгүнү, касыблара әл тутмасыны вә диҝәр билмәдијим фәзиләтләрини ҝөрмәмәк олармы? Бир шәхси Аллаһ әзиз етмәк истәсә, ким бу истәјин гаршысыны ала биләр?
Кечән јазыларымын бириндә техники бир сәһв едиб, онун адыны дуаларымда јазмамышдым. Кимләрсә буну “гәсдлә едилдијини” зәнн етмишди. Үстү-өртүлү јумшаг месажлар да алмышдым. Анҹаг јәгин белә мәсләһәтмиш ки, бу шәхс барәсиндә ајрыҹа бир јазы јазым. Мәһз кимләрисә разы салмаг үчүн дејил, ашағыдакы һәдисә ҝөрә мән бу шәхс һагда гыса бир јазы јазмаг гәрарына ҝәлдим.
Имам Багир (ә) бујурур ки, бир шәхсин фәзиләтләрини демәсән пахылсан, әҝәр бир кәси һәддиндән артыг тәриф етсән, јалтаг.
Барәсиндә бәһс етдијим шәхс сөзү вә әмәли бир олан руһани Һаҹы Мөвсүм Сәмәдовдур. Јухарыда гејд етдијим шәхсдә мәһз одур. Әлбәттә ки, Һаҹы Мөвсүм Сәмәдов, Һаҹы Вагиф Абдуллајев, Һаҹы Абҝүл Сулејманов, Һаҹы Илгар Әлијев, Һаҹы Илһам Әлијев, Сејјид Фәрамиз Аббасов кими руһаниләрин, алимләрин барәсиндә нәинки бир јазы, һәтта онларла, јүзләрлә китаб јазмаг лазымдыр. Чүнки, бу шәхсләр бизә баша салдылар ки, “һүсејнчи” кимә дејирләр? Чүнки бу шәхсләр васитәсилә Ислам Дүнјасында “азәрбајҹанлы диндар”лары танымаға башладылар. Ола билсин кимләрсә, бу фикирлә разы олмасын, анҹаг мараглансалар онда бу фикирин дүз олмасыны өзләри ҝөрәрләр. Гәбул етмәсәләр јемәкләринә (һарам тикә) фикир вермәклә јанашы кимин вә ја нәјин гаршысында әл ачдыгларыны јада салсынлар...
Бир мүддәт әввәл Азәрбајҹан Зијалылар Бирлији Һаҹы Мөвсүм Сәмәдову “Илин мәнәвијјат адамы” сечиб. Әлбәттә бу тәшкилата үзв олан зијалылара бөјүк һөрмәтим вар. Вә дүшүнүрәм ки, сечимләриндә зәррә гәдәр јанылмајыблар. Белә бир гәрар вердикләринә ҝөрә онлара тәшәккүр едирәм. Үмидварам ки, бүтүн мөмин вә мөминәләр, һәмчинин бу јола гәдәм гојан мүсәлманлар да бу фикирлә разыдырлар.
Рамин Бајрамов
Диггәт: Хәбәрдән истифадә етдикдә мәнбәјә истинад лазымдыр
