Әһли Бејт -АБНА- хәбәр аҝентлији- Бу јахынларда һамымыз Тәбриз јахынлығында баш верән зәлзәлә илә сарсылдыг, зәлзәләнин фәсадларындан нараһат олдуг. Чадыр шәһәрҹикләриндәкиләрин аҹыларыны дәрк етмәкдән исә һеч данышмырам. Тәбии ки, бу тәбии фәлакәтдән сонра кимимиз дуамызла, кимимиз пулумузла әлимиздә олан имканлардан истифадә едиб, Иранда јашајан азәрбајҹанлылара көмәк етмәк истәдик. Чүнки һәр шејдән өнҹә биздән буну виҹданымыз тәләб едирди. Фәрг етмәз Ирандакы зәрәрдидәләр түрк олсун, фарс олсун, өнәмлиси одур ки, онлар да Аллаһын јаратдығы Адәм өвладларыдыр.
Бу милләтдә јахшы бир хүсусијјәт вар ки, зәрәр чәкәнин әлиндән тутур, она көмәк едир. Бу дәфә дә мүсбәт хүсусијјәтимизи ҝөстәрдик. Амма бәзиләримиз она бир гәдәр сијаси дон ҝејиндирдик. Кампанијалар башлады, пул јығылды, јардым ҝөндәрилди, зәлзәлә азәрбајҹанлылар јашајан бөлҝәдә баш вердији үчүн милләтчиләр бәјанатлар верди. Бу кими бир сыра ишләр. Ән әсасы да Сомалидәки јетимләрин башына әл чәкмәји өзүнә вәзифә билән депутатымыз јерлә јексан олан кәндләрә ҝетди. Орадан ексклүзив ҝөрүнтүләр, мүсаһибләр ҝәлди бу тәрәфә. Чох ҝөзәл. Бәзи депутатларымыз бурдан бир баша бәјанатлар верди ки, Иран һакимијјәти Тәбризи нијә силкәләјиб? Вә ја сосиал шәбәкәләрдә Саркисјана "јубка" ҝејиндирмәклә тәскинлик тапан типик инсанлар боғаздан јухары статуслар јазды, мүзакирәләр апарды. Дејә биләрсиниз ки, ај балам бунун нә јери вар ахы инди. Ҹамаат јараларыны сармагла мәшғулдур, сән инди ојанмысан?! Әслиндә дүз дә дејирләр. Чүнки онлар инди нәинки јараларыны сармаг, һәтта јени инша олунаҹаг евләринин хәјаллары илә јашајырлар. Нә исә кечәк мәтләбә.
Јәгин ки, сизи дә бу суаллар дүшүндүрүр. Бәлкә дә һагг верәҹәксиниз.
Ҝөрәсән Тәбриздә зәлзәләдән зәрәр чәкәнләрин мүдафиәсинә галхан депутатлармыз Бакыда евләриндән һача-пача чыхарыланлары ҝөрмүрдүләрми? Јохса онда виҹданлары "димидрол" атыб јухуја ҝетмишди. Јәгин ки, “Гыш булвары”нын тикинтиси апарылаҹаг саһәдә, “Бајраг мејданы”нын салындығы јердә апарылан дәһшәтли сөкүнтүләри һеч ким унутмајыб. О заман Бакыда сүни шәкилдә зәлзәлә төрәдилирди вә сакинләр чарәсиз шәкилдә налә едирдиләр. Бу наләләр һәлә дә гулагларымызада ҹинҝилдәјир.
Күр дашгынларындан су алтында галан евләри һәлә дә бәрпа едә билмәјән сакинләри бәс неҹә?
Сулутәпә евләри башларына учуруланлары демирәм һәлә. Идрак Аббасовун өлүмҹүл дөјүлмәси дә јаддан чыхмајыб.
Һәр ҝүн өлән әсҝәрләрин ганы неҹә?
Мәҹбури көчкүнләрин бир нечә јатагханасы јанды. Буну һара јазаг. Онларла һансы мәмур вә ја милләт вәкили марагланыб?
Вә јүзләрә бу ҹүр һагсызлыглар.
Демәли бу ҹанфәшанлыгларымыза сијасәт дону ҝејиндирилиб. Сифаришлә мүгәддәслик, мәләк симасы алмышыг. Лазым оланда чыхырыг ортаја, бир ики сөз данышырыг, кампанијалар апарырыг, вәссалам. Бәлкә өлкәмиздәки јетимләри дүшүнмәјә вахтымыз олмур?
Нә заман бу проблемләримизә танынмыш сиамларымызын гарнымыз дојаҹаг гәдәр ачыгламасыны вә онларын һәлли јөнүндә чалышдығыны ҝөрсәм, ондан диҝәр ачыгламаларынын сәмимилијинә дә инанаҹам.
Кампанијаларынызы өлкә хариҹиндә јох, өлкә дахилиндә ҝөрмәк үмиди илә...
Диггәт: Хәбәрдән истифадә етдикдә мәнбәјә истинад лазымдыр
