Ортада ки гәрәз, тәәссүб, суизән олду, һәгигәти сүбута јетирмәк дөнүр “Лазымын Гарабағы алмасы” кими маһал бир ишә. Дилдә биринҹи олан мәним кими бир груп мүсәлман елә мәнәм-мәнәм үзүндән ел демишкән билдијини дәдәсинә дә вермәз. Бир адамын һаггында дејилсә ки, билдијини дәдәсинә дә вермәз, демәк, бу адам мүсәлман дејил, јәни Аллаһ гаршысында тәслим оланлара һеч бир аидијјаты јохдур. Онун Исламы һеч Америка Исламы да дејил, өз Исламыдыр, өзү үчүн дин јарадыб. Кәнд дилиндә данышырам ки, шәһәр ушаглары чох да нараһат олмасын.
Дәгиг јадымда дејил, 20-25 ил габаг Ҹәлилабадын Ҝөјтәпә (Пришиб) гәсәбәсиндә Молла Бәјләр адлы ариф бир руһани варды. О заман Гуран дәрси евләрдә кечиләрди. Молла, мәрһум Молла Бәјләр кими мүбариз, мүҹаһид, фәдаи оланда һөкумәтин һәссаслығы артарды. Молла Бәјләр о руһаниләрдән иди ки, өзү вә еви даим нәзарәт алтында сахланыларды. Чүнки бу адамын ҝөзүнә ҝүллә сыхылсајды да һаггы наһагга вермәзди. Онун шүҹаәти сајәсиндә Совет дөврүндә, 80-ҹи илләрин ахырларында Масаллынын Хоҹавар кәнд мәсҹидиндә Ҹүмә намазы гыланарды. Әлбәттә ки, бу намаз фигһи бахымдан ҹәмијјәт намазы иди, амма әтраф рајонларын диндарлары мәһз ҹүмә ҝүнләри бу мәсҹидә јығышдығындан биз Ҹүмә намазы дејәрдик.
Молла Бәјләрин тәләбәси олмаг һәр адамын иши дејилди. Мүвәффәг тәләбәләриндән бири һазырда бир анти-јевровижн чыхышына ҝөрә шәрләниб һәбсә алынан Һаҹы Илгардыр. Мәрһум Молла Бәјләрин һүзурунда Ислам елмләринә саһиб оланлардан бири дә бу ҝүн сөзбазларын “мәшһурлашдырмагда” олдуғу Һаҹы Әһлиман (Рүстәмов) иди. Һаҹы Әһлиман Ҹәлилабадын уҹгар кәндләриндән бириндән бир ҝүн машынла, бир ҝүн пијада Молла Бәјләрин евинә дәрсә ҝәләрди. Шәһәр ушаглары, ҝеҹә евдә тәк јатмагдан үшәнәнләр, сојуг су илә дәстәмаз аланда сәтәлҹәм оланлар Һаҹы Әһлиман вә онун кими онларла, бәлкә дә јүзләрлә руһанинин бу ҝүнә гәдәр өтүб-кечдији гаранлыг, итли-гурдлу јоллары ашкарда ҝөрмәјиб, арзуламырам да. Амма һеч олмаја јухуда ҝөрсәјдиләр бәлкә инсафа ҝәләрдиләр. Һәлә Совет һөкумәтинин ахтарыша вердији мәрһум Молла Һүсејнин мешәдә ағаҹ алтында дәрс кечмәсини, мешәјә дәрсә ҝедәнләри гојаг бир јана.
Кечәк мәтләбә. Дини сајтлары нәзәрдән кечирәндә бир сајтда башлыг ҝөрдүм: “Һаҹы Әһлимандан бәјәнилмәјән төвсијә”. Аллаһу Әкбәр! Бәндә о адамлардан дејиләм ки, бир сајт, гәзет, ја телеканалын сөзү илә Аллаһ верән ағлымы кәнара гојуб лафа инаным. Мүсәлман мүсәлман һаггында һәр нә пис сөз ешитсә, дәрһал дөнмәмәли, һәтта бәзи ејбләри ҝөзү илә ҝөрдүкдә ҝөзүнүн зиддинә шәһадәт вермәлидир. Буну мән демирәм, мәсумларымызын сөзүдүр. Нә исә, јазыны охудум. Һаҹы Әһлиман бир нәсиһәтамиз сөзүнә ҝөрә иттиһам олунурду. Тапыб, Һаҹынын сөзләрини дә охудум. Ајдын олду ки, дини ҹамеәмиздәки гаршыдурмалары, парчаланмалары, дидишмәләри нәзәрдә тутан Һаҹы Әһлиман бу ибадәт ајында (рамазанда) мәсләһәт ҝөрүб ки, башынызы ашағы салын, ибадәтинизлә мәшғул олун. Һаҹы Әһлиманы таныјанын ағлына да ҝәлмәз ки, о диндарлары көләлијә чағырсын. Һаҹынын бу сөзүнә илмә атан биринҹи адам мәним оғлум олуб. Әҝәр бу кампанијаја старт верән мәним оғлум олмасајды мөвзудан јан кечәрдим. Онсуз да инди сөјһасөјдү, билинмир ким һансы мәзһәбә гуллуг едир. Истәјирсән јахшы бир иш ҝөрәсән, өзүнә дүшмән газанырсан. Дејирсән гәләт еләмишәм, әл чәкин. Амма ит моталдан әл чәкир, мотал итдән әл чәкмир.
Оғлумун Һаҹынын үнванына атмаҹасына дәрһал шәрһ јаздым. Јаздым ки...
Салам, Һаҹы Әһлиман! Сәнә гаршы башланмыш ушаг ојуну бу гүрбәтдә мәни јаман гәрибсәтди. Ҝөзүмдән ҝилдир-ҝилдир јаш төкүлүр. Бу нә зәманәдир ҝәлиб чыхдыг! Һардасан, ај Бәјләр әми, Аллаһдан бизә ҝөрүш истә. Јығышаг башына, лап гәдимдәки кими, ҹан дејиб, ҹан ешидәк. Сәнин Илгарына наркоман дамғасы вурублар, Әми! Мән ҝүнаһкарын сәси бир јерә чатмыр, Сән ки Аллаһла һәмсөһбәтсән, нә олар дәрдимизә чарә истәсән! Нәсиһәт вермәји сәндән өјрәнмиш Әһлиманына сөз атанлар мәни үздүсә, ҝөр о нә чәкир!
Бағышла мәни, Һаҹы Әһлиман, тәгијјәјә сәбрим чатмады. Шејтанын ахыр фитнәләри үзүб ичими, гырыб сәбрими. Өзүмү базарда ҝөрүрәм, нә бөјүк билән вар, нә кичик. Рамазаны ФБ сәһифәми бағладым. Оғлум јериндә ҝәнҹ диндара гурбан олум дејирәм, дејир сән ја гафилсән, ја һијләҝәр... Нә едәк, тәркидүнја олаг?! Үз чевириб ҹәмијјәтдән дағлара чыхаг?! Мән оғлума нә лазымса дедим. Иншаалаһ, пешман олар. О бириләрини тапшырдым Аллаһа, белеләри илә данышмаг фајдасыздыр. Тәкҹә Аллаһ! Тәкҹә Аллаһ гәрәзли адама диз чөкдүрә биләр. Бизи тәнһа бурахма, ја Рәбб!
Арзу Ејвазов
Диггәт: Хәбәрдән истифадә етдикдә мәнбәјә истинад лазымдыр
