Азәрбајҹандакы јандаш мүхалифәтин парлаг сималарындан бири шәксиз, Гүдрәт Һәсәнгулијевди. Ону “мүсәлман” исламофобларын ҝөркәмли нүмајәндәләриндән дә сајмаг олар. “Көләлијин инсанларын ҝенинә кечмәсиндә Исламын бөјүк ролу олуб” кими зијанлы фикрин мүәллифи олан бу депутат јенә динҹ дурмајыб, мүбарәк Рамазанда белә иман адамларынын һејсијјәти илә ојнајыб. Бары әзиз ајда дил зинасындан пәһриз сахлајајды.
Адамын јәгин хәбәри јохду ки, бу ҹүр әҹаиб ачыгламалары илә өзүнү артыг икиајаглы вәһши Андерс Брејвикин бурдакы һавадарларындан биринә чевириб. 70-дән чох ҝүнаһсыз инсаны өлдүрүб сонра да мәһкәмәдә һырылдајараг “Буну Норвечи, Авропаны Ислам мүлтимәдәнијјәтиндән хилас еләмәк үчүн төрәтдим” дејән христиан террорчусу Брејвикин! (Мараглыдыр ки, үстүндән бир ил өтсә дә бу гаты исламофоб һагда демократик Авропанын ҝөбәјиндә һөкм чыхарылмајыб).
Бәс Һәсәнгулијев бу дәфә нә дејиб? Һеч нә, әнәнәсинә садиг галараг бујуруб ки: “Ислам дүнјаҝөрүшүндән ҝәлән Шәрг деспотизми узун илләр инсанларын ҝенләринә һопуб. Зәифи әзмәк, өзүндән ҝүҹлүнүн гаршысында тәзим етмәк... Азәрбајҹанда бу вәзијјәти дәјишмәјин јеҝанә јолу парламентли республикаја кечиддир. Рәсулзадә вә онун тәрәфдарлары һәгигәтән чох мүдрик инсанлар олублар. Елә инсанлар бир әсрдә бир дәфә дүнјаја ҝәлир. Онлар Азәрбајҹаны парламентли республика етдиләр...”
“Зәифи әзмәк, өзүндән ҝүҹлүсүнүн гаршысында баш әјмәк...” Буну јенә мүхалифәтчи дилә ҝәтирсәјди дәрд јарыјды. Мәҝәр “Шәрг деспотизми”нин чағдаш нүмунәләриндән бири Азәрбајҹанда бәргәрар дејил?!
Амма биз нефтли-газлы варлы Азәрбајҹанын халгыны бир гарын чөрәјә мөһтаҹ едән, сәрвәтләрини дәдә малы кими мәнимсәјән, Һәсәнгулијевин дә мәдһ вә тәблиғ еләдији сүмүрҝәчи һаким дәстәнин үзвләринин башында әммамә-зад ҝөрмүрүк. Әксинә, галстуклу бу ЈАПовулчу игтидар мәсҹид учуран, азана, һиҹаба јасаг гојан, түрбанлы ханымлара паспорт үчүн шәкил чәкмәји гадаған едән зүмрә кими ад чыхарыб дүнјада.
Бу зүмрәнин Ислама, һагг-әдаләтә нә гәдәр дәхли варса, ҹәнаб Һәсәнгулијевин дә космонавтикаја о гәдәр аидијјәти олар. Үмумијјәтлә, һагг басан, һарам јејән, зүлм едән “мүсәлманын” Ислама, Гурана нә дәхли? Һансыса дәләдуз һаким, прокурор, мүстәнтиг рүшвәт алыб иш ҝөрәндә, сифаришли һөкм-гәрар чыхаранда, буна ҝөрә һүгуг системи, Ҹинајәт Мәҹәлләси (ҸМ) сучланырмы? Ҝүнаһкар ҸМ-дир, конститусијадыр, јохса онлары саја салмајан һаким, прокурор, јахуд Гүдрәт бәјин һүзурунда мил тәки дајандығы мәмур олигарх(лар)?!
Азәрбајҹанын индики конститусијасы, Сечки Мәҹәлләси (СМ) нормал сәнәдләрдир. Амма һакимијјәт салфет кағызы кими онлара бурун силирсә, Гүдрәт бәјин өзү илләрдир сахта мандатла парламентдә башгасынын һалал јерини зәбт едибсә, конститусија, СМ нә еләсин буна?
Гурани-Кәрим дә илаһи әхлаг кодексидир, она әмәл едән бу дүнјада да ниҹат тапар, Ахирәтдә дә, етмәјәнсә - јох. Һәр ил дүнјада минләрлә христиан көнүллү шәкилдә Ислама үз тутур, онда руһани раһатлыг ахтарыр, мүсәлман Азәрбајҹанында исә оланын дәјәрини анламајан ниһилистләр вар...
Нәһајәт, бир јандан бөјүк өндәримиз Мәммәдәмин Рәсулзадә вә онун гурдуғу парламентли республика һагда хош сөзләр данышыб, о бири јандан үчрәнҝли бајрағымызын јашыл рәнҝинә һәгарәтин ады нәдир? Ахы һамы билир ки, өндәр дин, иман адамы олараг халгын инанҹына бөјүк һөрмәт бәсләјиб. Јери ҝәлмишкән, бу, о Һәсәнгулијевди ки, Милли Мәҹлисдә һимнимизи гысалтмағы тәклиф еләмишди. О һәмчинин мәктәбләрдә һиҹаба јасағы гануниләшдирмәјин гызғын тәрәфдарларындандыр (Гануна салынмаса да, артыг бу гадаға ишләјир)...
Ҝөрәсән динимизә аси кәсилән бу адамын гоһум-әгрәбасында намаз гылыб оруҹ тутан руһани бир шәхс јохму ки, она дүнјанын фанилији һагда ики кәлмә десин? “Елә ет ки, дүнјадан күчәндә мејитин урватсыз олмасын, сәни дә мүсәлман гајдасында кәфәнә бүкән, үстүндә ҹәназә намазы гылан тапылсын” өјүдү версин?
***
... Тарихдә һәмишә идеолоҝијаларын дашыјыҹылары јох, брејвикләр, салман рүшдүләр, гүдрәт һәсәнгулијевләр јетишдирән идеолоҝијалар, идеологлар горхулу олуб. Бу үч исми нәјин бирләшдирдијини јәгин етдиниз? Тәшәккүрләр.
Заһид СӘФӘРОҒЛУ
Диггәт: Хәбәрдән истифадә етдикдә мәнбәјә истинад лазымдыр
