Әһли Бејт -АБНА- хәбәр аҝентлији- Һүгуг мүдафиәчиси, журналист Һилал Мәммәдов бу һакимијјәтдә бабат бир вәзифә тутсајды, бүдҹәнин бир тәрәфиндән дә о дүшүб хымыр-хымыр јесә, дәнизин бир һиссәсини дә о һасарласа, ушаглары исә Бакынын ҝөбәјиндә автошлуг етсә, митингчи дөјсә, чохдан дөвләт гуллуғундакы хидмәтләринә ҝөрә өдүлләндирилмишди.
Амма һакимијјәтә гаршы олунҹа “дөвләтә хәјанәт”дә сучландырылды.
Дүнән Республика Прокурорлуғу илә Дахили Ишләр Назирлијинин Һилал бәјин һәбси илә бағлы јајдығы мәлуматы һәр кәсин дөнә-дөнә, диггәтлә охумасыны төвсијә едирәм. Бу мәлуматын өзү бу һәбсин сифаришли, ирәли сүрүлән иттиһамларын исә ујдурма, филфило олдуғуну сөјләмәк үчүн кифајәтдир. Орада “ҹасуслуғу илә дөвләтә хәјанәт етмишдир”, “ашкар сурәтдә милли ајры-сечкилијин вә дүшмәнчилијин салынмасына јөнәлән һәрәкәтләрә јол вермишдир” кими ифадәләр итинәтөкдүр. Бир сөзлә, прокурорлугла ДИН нөвбәти дәфә һүгуга, ганунлара түпүрәрәк һеч бир мәһкәмә-филан олмадан, елә бәри башдан өз јанынданҹа Һилал Мәммәдову ҹинајәткар елан едиб. Неҹә дејәрләр, өзләри доғуб, өзләри дә ҝөбәјини кәсибләр.
Тәкҹә буна ҝөрә Һилал Мәммәдовун виҹдан мәһбусу сајылмасы гачылмаздыр. Авропа Инсан Һаглары Мәһкәмәси илләрдән бәридир бунлары баша сала билмир ки, бир аз адам олун, һеч кими мәһкәмә гәрары олмадан ҹинајәткар елан етмәјин, тәгсирсизлик презумпсијасына һөрмәтлә јанашын, бунун инсан һүгуг вә азадлыгларынын тәмәл принсипләриндән олдуғуну өјрәнин, амма хејри јохдур, кор тутдуғуну бурахмајан кими, режим дә бу вәрдишиндән әл чәкмир, әл чәкмәк истәмир.
Нәтиҹәдә нә олур? Авропа Инсан Һаглары Мәһкәмәси бунларын наданлығы, савадсызлығы, гәрәзи уҹбатындан Азәрбајҹан дөвләтини бир уҹдан ҹәримәләмәкдә давам едир. Нә веҹләринә, неҹә олса да, һәмин ҹәримәләри өз ҹибләриндән өдәмирләр ки? Һәмин ҹәримәләр бунларын арвад-ушагларынын ширкәтләринин һесабындан чыхмыр ки? Ҝедән јенә дөвләтин ҹибиндән ҝедир. Бах, инди Һилал Мәммәдов да пулларыны бир овуҹ адамын дәдә малы кими саға-сола сәпәләдији белә бир дөвләтә “хәјанәт” етдији үчүн ичәри атылыб.
Һилал бәјин ҹасуслугда сучландырылмасына ҝәлинҹә, суаллар чохдур. Бир һалда ки, о, бу гәдәр ағыр ҹинајәт әмәлләри илә мәшғул иди, нијә елә әввәлҹәдән буна ҝөрә сахланылмырды? Нијә биринҹи наркотик иттиһамы илә сахланылмышды? Һансы ағлы башында олан ҹасус һәм дә наркотика илә мәшғул олар? Бир һалда ки, Һилал Мәммәдов 1992-ҹи илдән “Иран аҝенти”дир, бәс нијә о јалныз 20 илдән сонра һәбс едилир? Бу гәдәр мүддәтдә нәји ҝөзләмисиниз, нијә ҝөз јуммусунуз она?
Мән, әлбәттә, бу суаллара һеч бир мәнтигли ҹаваб ҝөзләмирәм, бунлар әслиндә ҹавабы өзүндә олан суаллардыр.
Ајдын мәсәләдир ки, бурада сөһбәт “ҹасус”дан-заддан јох, “ҹасус” сөзүнүн икинҹи һеҹасындан ҝедир - “сус”магдан.
Бу өлкәдә Һилал Мәммәдовдан вә үмумијјәтлә, һәр биримиздән тәләб олунан будур: Сус!
Сусмадынса, демәли, кимсән? Ҹасус!
Таныш мәнзәрәдир. Бәјәм бу ҝүнәдәк биз бу өлкәдә коррупсија әлејһинә јазан адамын елә коррупсија...
“Ҝәнҹләрә иҹтимаи, сијаси фәалијјәт имканы верин ки, онлар зәрәрли вәрдишләрдән узаг дурсун” дејән ҝәнҹин наркотик иттиһамы илә ичәри атылдығыны азмы ҝөрдүк?
Мәнә ән ҝүлмәли ҝөрүнән исә Һилал Мәммәдовун Иранын “Сәһәр” телеканалында данышмасынын да она гаршы иттиһам кими ирәли сүрүлмәсидир.
Сорушурам: сиз әввәлҹә ону дејин ҝөрәк, сизин вәтәндашларыныз Азәрбајҹан телеканалларында нијә даныша билмирләр? Нијә Һилал Мәммәдов “Сәһәр”дә, Гәнимәт Заһид “Медја ТВ”дә данышмалыдыр? Сиз нә вахт бу өлкәнин телеканалларында данышмаг имканы вердиниз ки, Һилал Мәммәдов дүшүндүкләрини ордан демәди? Һәлә ону демирәм ки, ҹасуслар нә вахтдан телевизијаја чыхыр, өзүнү һамыја нишан верир?
Јери ҝәлсә, “Сәһәр”-зад бош шејдир, Азәрбајҹан әлејһинә, Азәрбајҹанын сивил, ујғар, модерн бир дүнја өләси олмасы әлејһинә Азәрбајҹан телеканалларындан чох һеч јердә данышмырлар.
Јалтаглыг исә һеч дә ҹасуслугдан јүнҝүл ҹинајәт дејил.
Е.Астанбәјли
Диггәт: Хәбәрдән истифадә етдикдә мәнбәјә истинад лазымдыр
