Әһли Бејт -АБНА- хәбәр аҝентлијинин вердији хәбәрә әсасән Милли Мәҹлисин сон иҹласында халг артисти, милләт вәкили Зејнәб Ханларова һөкумәт мәмурларыны кәскин тәнгид едиб. Әһалинин сосиал дурумуна ҝөрә нараһатлығыны ифадә едән депутат һәмчинин, Иҹтимаи Палатынын аксијаларында полис зоракылығына мәруз галан гадынларын да мүдафиәсинә галхыб. Депутат Азәрбајҹан гадынларынын ајаглар алтында галмасына, јерлә сүрүндүрүлмәсинә дөзмәдијини дејәрәк, полисин һәрәкәтинә етираз билдириб.
Дахили Ишләр Назирлијинин мәтбуат хидмәтинин әмәкдашы Еһсан Заһидов гәзетимизә ачыгламасында халг артистинин полисә јөнәлик бәјанатыны дәјәрләндириб: «Һамымызын фәхри вә севимлиси олан Зејнәб ханымын «Азәрбајҹан гадыны ајаглар алтында галырды» ифадәсини сәсләндирәркән ҝөрүнүр, әсәби олуб. Һеч вахт Азәрбајҹан гадыны ајаглар алтында галмыр вә гала да билмәз. Буна азәрбајҹанлы киши вә Азәрбајҹан полиси һеч вахт имкан вермәз. Чүнки гадын һамымызын башынын таҹыдыр. О ки галды иҹтимаи асајиши позмаға ҹәһд едән бир груп адамын ганунсуз һәрәкәтләринин полисләр тәрәфиндән гаршысынын алынмасына, бурада һеч бир гәбаһәт јохдур. Ән демократик дөвләтләрдә бу ҹүр һәрәкәтләрин гаршысыны атларла алырлар».
Диггәт: Хәбәрдән истифадә етдикдә мәнбәјә истинад лазымдыр
