Азәрбајҹан-Иран мүнасибәтләринин ҝәрҝин атмосфердә олдуғу бир заманда игтидар тәрәфиндән “милләт вәкили” тәјин едилмиш Заһид Оруҹ өлкәмиздә Ирана гаршы етиразларын давам етмәсини, рәсми Бакынын Теһрана гаршы блока гошулмасыны дәстәкләјиб: “Һесаб едирәм ки, Гәрбин Ирана гаршы санксијаларына вә игтисади блокадасына Азәрбајҹан да гошулмалыдыр.”
З.Оруҹ кими милләтин дәрдини нәинки чәкмәјән, һәтта дәрдиндән хәбәрсиз олан бирисинин белә сөз демәси тәәҹҹүблү дејил. Мүстәгил фикир саһиби олмајыб, һакимијјәтин сифаришилә данышмаға адәт етмиш бу марионет фигур һардан билсин ки, Азәрбајҹан әһалисинин бөјүк һиссәси мәһз Иранын һесабына аиләсини доландырыр, ән ади хәстәликләринин мүајинә вә мүалиҹәси үчүн мәһз Ирана јолланыр, минләрлә вәтәндашымызын һәјатыны Иран һәкимләри хилас едир, дәва-дәрманыны, сәрһәдјаны рајонларын ҹамааты исә һәтта ади ҝүндәлик әрзаг мәһсулларыны, тәләбат малларыны белә Ирандан алыб ҝәтирир.
Ким билмәсә дә, биз нахчыванлылар чох ҝөзәл билирик ки, ән ағыр ҝүнләрдә биз Ирана сөјкәниб ајага дура билмишик. Евләримиздә 30 дәрәҹә шахта олан дөврдә Иран газы оҹагларымызы гыздырды, балаларымызы донмаға гојмады. Гаранлыға гәрг олмуш Нахчыван Ирандан верилән еликтрик енержиси сајәсиндә ишыгланды. Азәрбајҹанын диҝәр әразиси илә јеҝанә маҝистрал јол мәһз Иран әразисиндән тәмин едилди. Бу јол бир һәфтә бағланса, газ бир гыш мөвсүмү верилмәсә, ишыглар кәсилсә, сәрһәдимиз бир ај гапанса, биз билирик нәләр чәкәрик. Буну Заһид Оруҹ кими һарам јолла мандат алыб, һарам јолла аиләсинин чөрәјини чыхаранлар, милләтин сәрвәтини талајыб, ҹибини сојуб, торпағыны сатыб, һарынлајанлар, ади хәстәлијини Америкада, Авропада мүалиҹә етдирәнләр, балаларыны хариҹдә охутдуранлар, јајлары океан адаларында динҹәлиб, гышлары Исвечрәдә хизәк сүрәнләр, Азәрбајҹана јалныз ҝәлир мәнбәји кими бахыб, балаларына, нәвәләринә хариҹи дөвләтләрдә баһалы виллалар, дәм-дәстҝаһлар аланлар вә онлардан тула пајы алыб сифаришлә данышанлар билмәз!
Гәрбин Ирана гаршы санксијаларына вә игтисади блокадасына Азәрбајҹан да гошулмагла, нәјә наил олмаг истәјирик? Иран игтисадијјатынын чөкмәсинәми? Бу баш вердикдә, бундан ахы бизләр, сырави Азәрбајҹан вәтәндашлары да әзијјәт чәкмиш оларыг. Үстәлик, Аразын о тајында јашајанлар елә бизим милләт дејилми? Башга вахт Тәбриз дејиб бағыранлар инди о тајда јашајан милләтимизин игтисадијјатыны чөкдүрмәји, тәбризлини дә бизим кими мөһтаҹ етмәји тәклиф едирләр.
Сијаси бәјанатлар милли гејрәтдән, ләјагәтдән, сәмимијјәтдән узаг олдугда, сарсылан Азәрбајҹан-Иран мүнасибәтләри јох, бизим милли гејрәтимиз, ләјагәтимиз вә шәрәфимиз олур. Заһид Оруҹун бәјанаты гардашы гардаша гаршы гојмаға, о тајдакы гардашларымызын чөрәјини тапдаламаға, балаларыны аҹ гојмаға сәсләјир. Бу адама һеч мараглы да дејил ки, Гәрбин Ирана гаршы санксијаларына вә игтисади блокадасына Азәрбајҹан да гошулмагла, бундан ән чох зәрәр чәкән Иран игтисадијјаты јох, Азәрбајҹан игтисадијјаты олаҹаг. Игтисадијјатдан азаҹыг башы чыханлар үчүн ајдын мәсәләдир ки, бир ај Иранла сәрһәдләримиз бағланса өлкәмизин игтисадијјаты үчүн һансы фәлакәтләр үз вермиш олар.
Ирана гаршы санксијалара гошулмагла, гардашларымыза гаршы савашда дүшмән сәнҝәриндә јер алмағы тәклиф едән Заһид Оруҹ һәлә утанмадан дејир ки, “Иран нормал гуруҹу мүттәфиглик үчүн нә гәдәр јарарсыздырса, дүшмәнчилик, дахили сабитлији позма имканлары да о гәдәр бөјүкдүр”. Амма кор-кор, ҝөр-ҝөр! Дүшмәнчилик вә дахили сабитлији позма амалыны ким дашыјыр, Иран, јохса Заһид Оруҹ кими марионетләрин ипини ојнадан игтидар?!
Әли Мәммәдов
Нахчыван, мүәллим
Диггәт: Хәбәрдән истифадә етдикдә мәнбәјә истинад лазымдыр
