Әһли Бејт -АБНА- хәбәр аҝентлији- Норвечин пајтахты Ослода 77 нәфәри өлдүрмүш террорчу Андерс Брејвикин мәһкәмә просеси башлајыб. Мәһкәмәдә гатил төрәтдији ҹинајәтләри етираф етсә дә, билдириб ки, бу әмәли христиан тәәссүбкешлијиндән ирәли ҝәлиб.
Әҝәр мәһкәмә А.Брејвикин бу гәтлиамы анлаглы вәзијјәтдә төрәтдијини үзә чыхарса, ону 21 ил һәбс ҹәзасы ҝөзләјир. Бу о демәкдир ки, Андерсдә шизофренија әламәтләринин олмасы һагда әввәл ирәли сүрүлән мүлаһизә тәсдигләнсә, 77 инсанын гатили психиатрик хәстәханаја мүалиҹәјә ҝөндәриләҹәк.
Олај Авропанын ҝөбәјиндә, Норвеч кими дүнјанын ән ҹазибәдар өлкәсиндә баш верир. 77 инсаны (онларын арасында ушаглар вә гоҹалар да вар) гәтлә јетирән 150 нәфәри јаралајан гатил максимум 21 ил ҹәза алаҹаг.
Телевизијада Андерсин мәһкәмә салонуна ҝәтирилмәси сәһнәсинә бахдыгҹа вә јухарыда гејд етдијим билҝиләри динләдикҹә ҝөзүмүн өнүнә Маҹарыстанда өмүрлүк һәбсә мәһкум едилмиш забитимиз Рамил Сәфәровун мәһкәмә просеси ҝәлди.
Мәкан јенә дә Авропадыр – Маҹарыстан. Өзләрини инсана, инсан һагларына дәјәр верән мәканын парчалары һесаб етдикләри үчүн јәгин ки, Маҹарыстанла Норвеч ганунвериҹилији арасында о гәдәр дә бөјүк фәрг јохдур.
Анҹаг Авропа мәканынын бир өлкәсиндә 1 нәфәри өлдүрәнә өмүрлүк һәбс ҹәзасы, 77 нәфәри өлдүрәнә 21 ил иш истәнилир…
Авропанын, еләҹә дә христиан аләминин дүнјада бир чох мәсәләләрә икили стандартдан јанашмасындан әзијјәт чәкәнләрдәник. Адәтән, Азәрбајҹанын ишғал олунмуш торпагларына мүнасибәтдә бу ајрысечкилији ҝөрмүшүк. Анҹаг Авропада христиан тәәссүбкешлијинин һәтта онларла инсаны гәтлә јетирән гатилин ишинә белә јарадығыны дүшүнәндә, адамын түкләри биз-биз олур.
Дүнја сијасәтиндә икили стандартлар анлашыландыр, һәр дөвләтин өз марағы вар. Амма әндазәсиз икили јанашма нә гануна, нә динә сығыр.
Бу мүгајисәдә мәгсәдим, нә үчүн Андерсә дә өмүрлүк һәбс ҹәзасы верилмәмәсини ортаја чыхармаг дејил. 21 ил һәбсдә јатмаг да, она “һәјаты баша сала биләр”. Анҹаг Андерслә мүгајисәдә 76 дәфә аз ҹинајәтдә иттиһам олунан Рамил Сәфәрова өмүрлүк һәбс ҹәзасы верилмәсиндә артыг нә Авропа дәјәри, нә әдаләтли һөкм, нә дә инсан һүгугу вар.
Рамилин башлыҹа ҝүнаһы мүсәлман, азәрбајҹанлы, түрк, гафгазлы олмасыдырмы? Вә ја гатил олмаг үчүн мүтләг авропалы, христиан олмаг шәртдирми?
Диггәт: Хәбәрдән истифадә етдикдә мәнбәјә истинад лазымдыр
