Әһли Бејт -АБНА- хәбәр аҝентлији- Алманијанын нүфузлу нәшри "Шпиҝел" Азәрбајҹан һагда нөвбәти мәгаләсини чап едиб. Мәгалә журналист Аннете Лангерин "Азадлыг" радиосунун мүхбири Хәдиҹә Исмајыл, "Азадлыг" гәзетинин әмәкдашы Видади Мәммәдов вә ҝәнҹ блоҝҝер Ҹаббар Саваланлы илә сөһбәти әсасында һазырланыб.
Мәгаләни олдуғу кими тәгдим едирик:
"Бөјүк гардаш Бакыда"
Онлар инсанлары ҹинси әлагә заманы чәкир, иҹтимаијјәтә јајыр, дөјүрләр. "Еуровисион" маһны мүсабигәси габағы журналистләрә тәзјиг ҝүҹләнир. Мүхалифәт хәбәрдарлыг едир: һәтта алман журналисти вә поп-туристләр дә еһтијат етмәлидир.
7 мартда Хәдиҹә Исмајылова ичәрисиндә 6 интим характерли фото олан аноним мәктуб алыб. Һадисәдән бир һәфтә сонра журналистин интим ҝөрүнтүләри интернетдә јајылыб. Ејни вахтда Хәдиҹә Исмајылованы әхлагсызлыгда ҝүнаһландыран ики һөкумәт гәзети видеонун интернет үнваныны ҝөстәрән јазы да чап едиб. Журналистин ҝөзләринин алтындакы гаралтыдан бәлли олур ки, сон һәфтәләрдә о түкәниб.
"Һөкумәт мәни һәдәф објектинә чевирди, ҹәмијјәт исә дәстәкләди".
Бир нечә һәфтәдән сонра бурада "Еуровисион" јарышмасы кечириләҹәк. Илһам Әлијев авторитаризминин мемарлыг символунун флагманы олан "Аловлу гүллә"ләрин мави фасадындан јаз шүалары әкс олунур. Бу гарајахма кампанијасынын архасында һакимијјәтдәки јүксәк вәзифәли шәхсләрин дајандығына һеч бир шүбһә јохдур.
"Онлар дүшүнүрдү ки, мән ҝери чәкиләҹәм. Анҹаг онлар сәһв едирдиләр. Ҝеријә бирҹә аддым атсајдым, мәғлуб олардым".
Хәдиҹәнин гәрарлылығы өз сөзүнү деди. Һәтта һөкумәтјөнлү КИВ-ләр дә онун ҝизли чәкилмиш видео ҝөрүнтүсүнү вә фотоларыны јајмагдан имтина етдиләр.
"Мәһкәмәләри сүбутлар марагландырмыр"
Исмајылова мәсәлә илә бағлы шикајәт вериб. Һал-һазырда истинтаг ҝедир. Амма буна бөјүк үмид бәсләмир: "Јерли мәһкәмәләр сүбут едибләр ки, онлар сијаси сифариши јеринә јетирирләр. Сиз ахырынҹы мәһкәмә инстансијасына гәдәр ҝедәҹәксиз. Сонра исә Авропа Мәһкәмәсинин инсан һаглары мәсәләсиндә верәҹәји мүсбәт гәрары ҝөзләјәҹәксиниз". Мүсәлман ҹәмијјәтиндә бу ҹүр гаралама кампанијасы даһа дағыдыҹы олур, әҝәр һәдәф олан инсан аиләлидирсә. Бахмајараг ки, дүнјәви дөвләт тәһсил мүәссәләриндә баш өртүсүнә гадаға гојур вә мәсҹидләрин тикилмәсинә иҹазә вермир, дини гајдалар инанҹлы инсанларын һәјатында мүһүм рол ојнајыр. Хәдиҹә Исмајылова дини рәһбәрләрин дә ону дәстәкләдијини билдириб: "Онлар баша дүшүр ки, бу шәхси бир шеј дејил, сијасәтдир".
“Биз журналист дејилик, партизаныг”
"Биз журналист дејилик, партизаныг" - диссидент "Азадлыг" гәзетинин узун илләр әмәкдашы олан Видади Мәммәдов белә дејир. О вә јолдашлары дәфәләрлә тәһдид вә тәгибләрә мәруз галыблар. "Бизи билирик ки, бизи кимләр шантаж едир. Бизи һәбс едә, дөјә, өлдүрә биләрләр. Амма биз сөз азадлығы уғрунда мүбаризә апарырыг. Буну борҹумуз сајырыг".
Һәр ҝеҹә Хәдиҹә Исмајылова "Азадлыг” радиосунда ҹанлы ефирдә верилиш апарыр. Хүсусилә арашдырмачы журналистикада тәҹрүбәли мүхбирдир. О, мәгаләләриндә президент аиләсинин дөвләт мүәссәләрини ганунсуз өзәлләшдирмәси фактларыны үзә чыхарыб. Елә бу јахынларда Панамада офшор ширкәтдә гејдијјатдан кечән Лејла вә Арзу Әлијеваларын "Азәрфон" ширкәтиндәки пајыны арашдырыб.
"Һәр кәс нараһат олмалыдыр"
Дүнјанын һүгуг мүдафиәчиләри өлкә һаггында тәсәввүр јаратмаг үчүн "Еуровисион" јарышмасы заманы Бакыја ҝәләҹәкләр. Хәдиҹә Исмајылова хариҹи журналистләрә отел отагларында изләнилмәси барәдә хәбәрдарлыг едир: "Һәр кәс нараһат олмалыдыр. "Бөјүк Гардаш" һәр кәси изләјир".
Буна "Шпиеҝел Онлине"нын журналистләри дә әмин олду. Азәрбајҹан мүхалифәтинин лидерләриндән бири илә кафедә мүсаһибә ҝөтүрәркән гоншу столда отуран ики нәфәр һәр сөзү динләјирдиләр. Ики нәфәр мүлки ҝејимли тәһлүкәсизлик әмәкдашы исә гапыда нөвбә тутмушдулар. Ән азы ики нәфәр күчәдә ҝөзләјирди. Диҝәрләри фотомузу чәкирди.
“Видео ҝөстәриләндән сонра евимдә чадыр гурдум”
"Анҹаг јорған алтында, ишыглары сөндүрәрәк севишин" - "Азад Ҝәнҹлик" тәшкилатынын фәаллары "Еуровисион" јарышмасы заманы Бакыја ҝәләнләрә бу төвсијјәни верир.
Журналистләрә вә мүхалифәт фәалларына иҹтимаи тәзјиг кампанијасы илк һал дејил. 2010-ҹи ил парламент сечкиләриндән бир аз әввәл "Лидер" каналында "Азадлыг" гәзетинин баш директору һаггында "Мүхалифәт һаггында чылпаг һәгигәт" башлығы алтында сензурадан кәнар видео ефирә верилмишди. Канал Илһам Әлијевин әмисиоғлуна мәхсусдур. Хәдиҹә Исмајылованын һәмкарлары тәкрар-тәкрар белә кампанијанын һәдәфинә чеврилирләр. Хәдиҹә Исмајылова: "Илк видео ҝөстәриләндән сонра мән евимдә һеч олмаса бир гәдәр мәхфи галмаг үчүн чадыр гурдум. Чох ҝүлмәли ҝәлди. Сонра исә чадыры сөкдүм".
Азәрбајҹан 2001-ҹи илдән Авропа Шурасынын үзвүдүр вә Инсан Һаглары үзрә Конвенсијаја имза атыб. Гәрбдә модерн ҝөрүнмәк, пуллары васитәсилә Авропа аристократијасы илә јахын олмаг, Хәзәр саһилиндә јени Дубај јаратмаг истәјән һаким аиләнин ағылсыз вә архаик методларла идарә етмәси горхунҹ ҝөрүнүр.
“Гәзәбим горхумдан даһа артыгдыр”
Бәшәри дүшүнҹәјә малик, тәһсилли, ҝәнҹ азәрбајҹанлылар вар ки, күчәләрдә индики режимә гаршы чыхырлар. 21 јашлы блоггер вә ҝәнҹ фәал Ҹаббар Саваланлы онлардан ән танынмышдыр. О, мүхалифәтчиләрин вә полисин тез-тез үз-үзә ҝәлдији "Араз" кафесиндә отуруб, ҝурултулу мусиги алтында јағлы нохуд шорбасы јејир. 2011-ҹи илин февралында Ҹаббар Саваланлы һәбс едилиб. Онун дедијинә ҝөрә, полис әмәкдашлары ҹибиндән тирјәк чыхарыблар. Евә чатаркән һәбс олунуб вә наркотик сахламагда ҝүнаһландырылыб. Мај ајындакы гәрарла 2 ил 6 ај азадлыгдан мәһрум едилиб. 2011-ҹи илин декабрында о вахтындан әввәл азадлыға чыхыб. Авропа Парламенти вә "Амнестј Интернатионал" онун азад олунмасы уғрунда ҝениш кампанија апарыблар. О, әминдир ки, ону Әлијевләр аиләсинин үнванына јаздығы тәнгиди јазыја ҝөрә һәбс едибләр. "Һәбсдә кечирдијим вахтда мән даһа да мөһкәмләндим. Мән истәјирәм ки, халгымыз ојансын, өз һаггларыны билсин вә онун уғрунда мүбаризә апарсын".
Мүсаһибәсинин сонунда Хәдиҹә Исмајылова ҝери чәкилмәјәҹәјини билдирәрәк дејиб: "Мәним гәзәбим горхумдан даһа артыгдыр".
Диггәт: Хәбәрдән истифадә етдикдә мәнбәјә истинад лазымдыр
