Әһли Бејт -АБНА- хәбәр аҝентлијинин вердији хәбәрә әсасән Астаранын Әрчиван кәндиндә етираз аксијасы кечирилмәси барәдә күтләви информасија вастәләриндә хәбәр верилмишди. Белә ки, февралын 25-дә кәндин 300-дән чох сакини Астарадан Иран Ислам Республикасына ҝедән бејнәлхалг јолу бағлајыб. Етираз аксијасына сәбәб сакинләрин Иран Ислам Республикасындан әрзаг маллары ҝәтирмәсинә јарадылан проблемин сон ҝүнләр даһа да кәскинләшмәсидир. Ҝөмрүк ишчиләри сон вахтлар Ирандан әрзаг маллары ҝәтирмәсинә имкан вермирләр. Кәнд әһалиси исә орада нисбәтән уҹуз олдуғу үчүн бир сыра әрзаг мәһсулларыны Ирандан алыб ҝәтирирләр. Ҝөмрүкдә сакинләрин маллары әлләриндән алыныб мәһв едилир. Сакинләр дә буна етираз едир.
Ҹамаатын проблемләри илә иҹра һакимијјәтинин һәр һансы бир мәсул ишчиси марагланмајыб. Өтән ҝүн мәлум олду ки, ҝөмрүкдә проблемләр давам едир. Рајон сакинләриндән бири дејир ки, өтән ҝүнләрә нисбәтән бир аз јумшалма вар: “Инһисарчылыг јаратмаг истәјирләр. Әввәлләр ҝүн әрзиндә Ирана 800-1000 нәфәр кечирдисә, һазырда бу рәгәм 100-150 нәфәрә гәдәр ениб. Тојуғун ҝәтирилмәсинә гадаға гојулуб. Бүтүн мәһсуллар алынараг јандырылыр. Һәр адама јалныз бир тојуг кечирмәјә иҹазә верирләр”.
Сакинләр дејирләр ки, онлардан алынан мәһсуллар јетимләр евинә, јахуд бағчалара верилсәјди нормал гаршылајардылар: “Олмазмы биздән алдыглары мәһсуллары кимсәсизләрә версинләр? Тәбии ки, бу, онлара сәрф етмир. Чүнки бағчаја, јахуд кимсәсизләрә версәләр бүдҹәдән пул оғурлаја билмәјәҹәкләр”.
Астарада јајылан мәлуматлара ҝөрә, бу һадисәнин јаранмасында сәбәб иҹра башчысы Талеһ Гарашовла ҝөмрүјүн рәиси Һикмәт Мәммәдов арасындакы конфликтдир: “Бүтүн бунлар садә вәтәндашларын башында чатлајыр. Биз анлаја билмирик, бизим һөкумәт бу ҹүр гајда-ганун тәтбиг етмәклә Ираны блокадада сахламаг истәјир, јохса бизи јашамаг уғрунда мүбаризәдә сынаға чәкир?!”.
Диггәт: Хәбәрдән истифадә етдикдә мәнбәјә истинад лазымдыр
