Әһли Бејт -АБНА- хәбәр аҝентлијинин вердији хәбәрә әсасән әлијевләр режими нөвбәти дәфә хариҹи сијасәтиндә гајаја чарпылды. Бу дәфә дә әлијевләрин технологлары дүз һесаблаја билмәдиләр. Сөһбәт Исраилдән 1 милјард 600 милјон долларлыг силаһ алынмасындан ҝедир. Тәбии ки, рәгәмдән дејил, фактдан.
Азәрбајҹан бир дөвләт кими, Иран вә Исраиллә мүәјјән мүнасибәтләрә маликдир. Тәбии ки, Исраиллә даһа сых әмәкдашлығ едир. Бу, бизим тәнгид һәдәфимиз дејил. Иранла да хејли рәсми вә гејри-рәсми бизнес әлагәләри вар.
Диҝәр тәрәфдән, Теһран өзүнә гаршы һәрби мүдахилә тәһлүкәсини Гәрбин реҝиондакы мүттәфигләриндән ҝөрүр. Јәни, онларын транзит кими истифадә олунмасындан. Теһрандан Бакыја гаршы ирәли сүрүлән сонунҹу иттиһам исә Иранын нүвә мүтәхәссисләрини өлдүрмәкдә шүбһәли билинән Исраил кәшфијјатчыларынын ора Азәрбајҹандан кечмәси барәдә олуб. Азәрбајҹан һакимијјәти исә, бу тәһдидләр вә иттиһамлар сәнҝимәмиш Исраилдән ашкар шәкилдә силаһ алыр. Бу, Азәрбајҹаны ачыг шәкилдә Иранын һәдәфинә чевирмәкдән башга бир ишә јарамајаҹаг. Сөһбәт тәкҹә силаһ алмагдан да ҝетмир. Силаһы мәһз Исраилдән алмагдан ҝедир.
Нә етмәк оларды?
Бу силаһланманын идеја мүәллифи Вашингтон ола биләрми? Бир гәдәр сојуг дүшүнсәк, ҝөрәрик ки, хејр. Она ҝөрә ки, Иранын башлыҹа һәдәфи ола биләҹәк Бакы-Тбилиси-Ҹејһаны горумаг имканы јохдур. Бу мәнада Иранын Азәрбајҹана гаршы агрессивләшмәси Вашингтонун ишинә јарамаз.
Азәрбајҹан рәһбәрлијинин бу аддымы сөзсүз ки, өзфәалијјәтдир. Сөһбәт ондан ҝетмир ки, мүстәгил дөвләт силаһланаркән башгасы илә мәсләһәтләшмәлидир, јохса јох. Мәсәлә бурасындадыр ки, Иран вә Исраилә мүнасибәт һазырда һеч бир дөвләтин тәкҹә өз иши ола билмир. Һәр ики дөвләт Азәрбајҹанла вә онун башлыҹа мүттәфиги олан Түркијә илә, АБШ-ла мүхтәлиф антогонист мүнасибәтләрдәдир.
Азәрбајҹан исә Исраилдән силаһ аларкән тәкҹә Ираны јох, һәм дә Түркијәни дүшүнмәли иди. Исраил “ермәни сојгырымы”ны таныја биләҹәјини бәјан етдији, ејни заманда “Таксим”дә он минләрин “Хоҹалы!” һајгырдығы бир вахтда тәбии ки, Анкараја ағыр зәрбә олду.
Бу силаһлары Азәрбајҹан Түркијәдән алсајды, онун истифадә тәјинатыны Ермәнистан олараг, изаһ етмәк даһа асан оларды. Амма Исраилин бу реҝионда јалныз Иран әлејһинә силаһлар сатдығы мәлумдур. Бу исә бир даһа Азәрбајҹаны Иранын һәдәфинә чевирәҹәк.
Рәсми Бакынын Гәрбә јахынлашмаг үчүн бу јолу сечдији ајдындыр. Јәни, “Ирандан тәзјигләр ҝүҹләндикҹә Гәрб Азәрбајҹан һакимијјәтинә дәстәк верәҹәк” кими бир пландан сөһбәт ҝедир. Буну исә һамыдан әввәл Авроатлантик мәканда анлајырлар. Һәгиги әмәлијјатларда блеф һеч кимә көмәк етмәдији үчүн ондан истифадә олунмур вә ја олунса да, мүәллифә зијан вурур. Әлијевләр исә бу фајдасыз блефин нәтиҹәсини ҝөрәҹәкләр.
P.S. Неҹә ки, Саaкашвили бунун нәтиҹәсин (јәни АБШ вә гәрб гүввәләринин сөз вериб далында дурмамалары) 2008-да Ҝүрҹүстан-Абхазија мүһарибәсиндә ашкара ҝөрдү.
Диггәт: Хәбәрдән истифадә етдикдә мәнбәјә истинад лазымдыр
