Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Республикасында давам едән әлијевләрин анти-ислам вә анти-милли сијасәтләринә етираз әламәти олараг Зијалыларын Иҹтимаи Форуму кечирилиб. Сыраларында Рүстәм Ибраһимбәјов, Рафиг Әлијев, Әкрәм Әјлисли, Рамиз Рөвшән кими зијалылары бирләшдирән Зијалыларын Иҹтимаи Форуму һакимијјәтә чағырыш едиб.
Зијалыларын Кечиртдики Форумун ачыгламасын сајтымызын зијарәтчиләринә тәгдим едирик.
1. Форум Азәрбајҹан вәтәндашларынын һүгуг вә азадлыгларына әмәл олунмасына бөјүк диггәт јетирир.
2. Ҝәнҹ фәаллара гаршы һәбс вә мәһкәмә тәгибләри илә мүшајиәт олунан тәзјигләрин јолверилмәзлијини бәјан едир.
3. Форум мүәјјән едиб ки, мәһкәмә тәгибләринә сәбәб олан һалларын мүтләг әксәријјәти өлкә вә ҹәмијјәт гаршысында ҹинајәтлә јох, буҝүнкү реаллыглар, јүрүдүлән дөвләт сијасәтинә мүхтәлиф бахышларын вә мөвгеләрин тоггушмасы илә бағлыдыр. Азәрбајҹанда сәрбәст топлашмаг азадлығы һүгугунун реаллашмасы илә бағлы ҹидди проблемләр вар. Форум дөвләт органларыны топлашмаг азадлығыны реаллашдырмаг үчүн даһа мәгбул јерин мүәјјән олунмасына вә шәраитин јарадылмасына, һәмчинин митинг кечирилмәсинә ҹәһдлә әлагәдар барәсиндә мәһкәмә просеси башламыш сијаси вә ҝәнҹ фәалларын азад олунмасына чағырыр.
4. Форум “һиҹаб” проблеми илә әлагәдар диндарларын һәбсиндән вә тәгиб олунмасындан ҹидди нараһатлығыны билдирир. Форум парламенти бу мәсәләләри дәгиг тәнзимләјән ганун һазырламаға вә гәбул етмәјә чағырыр. Белә ганунун гәбулундан әввәл исә форум һакимијјәти һәбс олунмуш диндарлары азад етмәјә чағырыр.
5. Форум алтернатив хидмәт һаггында ганунун һазырланмасыны вә гәбулуну ваҹиб һесаб едир. Белә ки, бу, өлкәнин бејнәлхалг өһдәликләриндән биридир. Гурум Бәхтијар Һаҹыјев вә Ҹаббар Саваланлынын һәбсдән азад олунмасына чағырыр.
6. Форум нүмајәндәләри Рүстәм Ибраһимбәјов, Рафиг Әлијев, Әкрәм Әјлисли, Рамиз Рөвшән вә Елдар Намазов Әдлијјә Назирлијинә мүраҹиәт едәрәк һәбсдә олан ҝәнҹ фәаллара баш чәкмәјә иҹазә верилмәсини хаһиш едирләр. Форум һәбсдә олан фәаллара мүәллиф имзалары илә китабларын чатдырылмасы кампанијасына башлајыб. Гурум һесаб едир ки, онларын ҹәмијјәтдән тәҹрид олунмасы дөвләтин марагларына ҹаваб вермир.
7. Форум коррупсија, тәһсил, сәһијјә, мүстәгил мәһкәмә иҹрааты, әсас һүгуг вә азадлыгларын горунмасы проблемләри илә бағлы һакимијјәт вә вәтәндаш ҹәмијјәти арасында ачыг диалога чағырыр.
Зијалыларын Иҹтимаи Форуму 2009-ҹу илдә јарадылыб. Гурумун миссијасы өлкәдә иҹтимаи рәјин формалашмасы вә гәрар гәбул етмә просесинә тәсири артырмаг үчүн зијалылары топарламаг, өлкәнин сабит вә давамлы инкишафы үчүн зәрури олан мүтәрәгги ислаһатларын һазырланыб һәјата кечирилмәсиндә Азәрбајҹанын вәтәндаш ҹәмијјәтинин ролуну артырмагдыр.
Диггәт: Хәбәрдән истифадә етдикдә мәнбәјә истинад лазымдыр
