Әһли Бејт -АБНА- хәбәр аҝентлијинин вердији хәбәрә әсасән: “Мән тәәссүф едирәм ки, Азәрбајҹанын дөвләт башчысы шајиә характерли сөһбәтләр јајмагла мәшғулдур”. Президент Илһам Әлијевин “Әл-Ҹәзирә” телевизијасына мүсаһибәсиндә сәсләндирдији фикирләрә мүнасибәт билдирән АХҸП сәдри Әли Кәримли “Медиа форум” сајтына белә дејиб.
Әли Кәримли гејд едиб ки, дөвләт башчысында һансы мүхалифәт лидеринин һансы бејнәлхалг тәшкилатын тәмсилчиси илә ҝөрүшүндә Дағлыг Гарабағы ермәниләрә вермәк фикри сәсләндирмәсинә даир конкрет мәлумат, факт варса, онлары ачыгламалы вә һәмин шәхсдән сијаси мәсулијјәт тәләб олунмалы иди: “Неҹә ки, биз Илһам Әлијевдән сијаси мәсулијјәт тәләб едирик. Чүнки о, Дағлыг Гарабағын јекун статусунун ишғал олунмуш Дағлыг Гарабағда кечириләҹәк референдумла мүәјјәнләшдирилмәсини мүзакирәјә чыхарыб. Мадрид принсипләринин бир бәнди Дағлыг Гарабағын јекун статусунун Дағлыг Гарабағ әразисиндә кечириләҹәк референдумла мүәјјәнләшдирилмәсини нәзәрдә тутур. Өзү Дағлыг Гарабағы әслиндә тәслим етмәјә һазырлашан бир сијасәтчинин һеч бир әсас олмадан башгаларыны бунда иттиһам етмәси тамамилә абсурддур.
Азәрбајҹанын мүхалифәт лидерләри милли азадлыг һәрәкатындан кечмиш инсанлардыр. Бизим үчүн Гарабағ мүгәддәсдир. Биз Илһам Әлијевин Гарабағын статусуну референдумла мүәјјәнләшдирмәсинә белә имкан вермәк фикриндә дејилик. Биз буна чох сәрт формада етираз едирик вә мөвгејимизи һәр јердә ачыг формада билдиририк. Она ҝөрә дә белә бөһтанлар бизә јапышмаз.
Мән 1980-ҹи илин сонларында, 90-ҹы илләрин әввәлләриндә Бакы Дөвләт Университетинин һүгуг факүлтәсинин әјани шөбәсинин тәләбәси оланда 90 нәфәр тәләбә јолдашымы ҝөтүрүб Азәрбајҹан сәрһәдләринә, Гарабағын мүдафиәсинә ҝетмишдим. Илһам Әлијев өзүнә һесабат версин ки, о заман һансы ишләрлә мәшғул иди. Инди онун һаггы вармы ки, бизә вәтәнпәрвәрлик өјрәтсин? Өзүнүн дә, бизим дә кечмишимизә бахсын вә фикирләшсин ки, онун белә бир һаггы вар, ја јох”.
АХҸП сәдри мүхалифәтин зәиф олмасы һагда фикирләрлә дә разы дејил: “Чох тәәссүф едирәм ки, дөвләт башчысы Азәрбајҹаны дүнја мигјасында позитив тәмсил, тәгдим етмәк фүрсәтиндән јанлыш истифадә едиб. “Әл-Ҹәзирә” телевизијасы дүнјанын ән нүфузлу телевизијаларындан биридир. Дөвләти тәмсил едән шәхсин борҹу бу телеканалдан Азәрбајҹанын вә азәрбајҹанлыларын позитив имиҹинин формалашдырылмасы үчүн истифадә етмәк иди. Амма о нә едиб? Өз оппонетләрини ашағыламаг үчүн бүтөвлүкдә Азәрбајҹаны ашағылајыб.
Азәрбајҹан нә вахт вәтәндаш мүһарибәсиндән кечиб? 1993-ҹү илин ијун һадисәсиндән сөһбәт ҝедирсә, о заман Илһам Әлијевин атасынын баш назир тәјин етдији Сүрәт Һүсејновун адамлары Президент Гвардијасынын 19 әсҝәрини ҝүлләләјибләр. Бу гәдәр. Һеч ҹаваб атәши дә, атышма да олмајыб. Һеч бир вәтәндаш мүһарибәси дә олмајыб.
1995-ҹи илдә “ОМОН”а гаршы әмәлијјатда үч дәфә артыг инсан һәјатыны итириб. Биз буну вәтәндаш мүһарибәси сајдыгмы? 1993-ҹү илдә бунлар гануни һакимијјәтә гаршы гијам галдырыбларса, гијамчыларын атәши нәтиҹәсиндә 19 әсҝәр өлдүрүлүбсә вә гијамчылара ҹаваб атәши ачылмајыбса, буну неҹә бүтүн дүнјаја вәтәндаш мүһарибәси кими тәгдим етмәк олар? Дөвләт башчысы һәгигәтә ујғун олмајан мәлуматы дүнја мигјасында тражламағы өзүнә неҹә рәва ҝөрүр?
Мүхалифәтин вәзијјәтинә ҝәлинҹә, бүтүн дүнја билир ки, Азәрбајҹанда фундаментал һүгуглар мәһдудлашдырылыб. Алты илдир Азәрбајҹанда мүхалифәт телевизијаја бурахылмыр. Һансы нормал өлкәдә белә бир һал вар? Алты илдир нәинки митинг, јүрүш, һеч нормал пикет кечирмәјә дә имкан јохдур. Алты илдир АХҸП-нин гәрарҝаһыны әлиндән алыблар. Бизә һәтта иҹарәјә јер ҝөтүрмәјә имкан верилмир. Мәним хариҹи сәфәрләримин гаршысы алыныб.
Сон 18 илдә Азәрбајҹанда һәр заман сијаси мәһбуслар олуб. Јүзләрлә сијасәтчи сијаси мәһбус һәјаты јашајыб. Өлкәдә мүлкијјәт, дини етигад азадлығы, сөз вә мәтбуат азадлығына тәминат јохдур. Гәзетләрин 90 фаизи һакимијјәтин нәзарәтиндәдир. Һәбсханаларда, истинтаг мәнтәгәләриндә онларла инсан ишҝәнҹәләр нәтиҹәсиндә һәјатыны итирир. Бу вәзијјәти бүтүн дүнја билир. Дүнјанын ән нүфузлу тәшкилатларынын сахталашдырылан сечкиләр, позулан инсан һүгуглары илә бағлы һесабатлары вар. Она ҝөрә дә бүтүн дүнја билир ки, Азәрбајҹанда һүгуглар мәһдудлашдырылыб вә мүхалифәтин фәалијјәт мејданы дардыр. Дуруб бунун әксини иддиа етмәк һеч нәји дәјишмир”.
Диггәт: Хәбәрдән истифадә етдикдә мәнбәјә истинад лазымдыр
