Әһли Бејт -АБНА- хәбәр аҝентлијинин вердији хәбәрә әсасән: Илһам Әлијев “Әл-Ҹәзирә” телевизијасына мүсаһибәсиндә дејиб ки, Азәрбајҹанда ҝөрүлән ишләр мүхалифәтин мәканыны даралдыр: “Чүнки онларын мүбаһисә апармасы үчүн ҹидди һеч нә јохдур. Ән ваҹиб мәсәлә - Дағлыг Гарабағ мәсәләсиндә бизим һөкумәт милли марагларымызын даһа ҝүҹлү мүдафиәчисидир. Бизә бәзән белә мәлуматлар ҝәлиб чатыр ки, бәзи мүхалифәт лидерләри бәзи хариҹи нүмајәндәләрлә шәхси үнсијјәтләри заманы бејнәлхалг гүввәләрин онлары дәстәкләјәҹәји һалда Дағлыг Гарабағы Ермәнистана вермәк, тәслим етмәк нијјәтләрини ифадә едирләр”.
Мүсават Партијасынын башганы Иса Гәмбәр вердији ачыгламасында дөвләт башчысынын бу иттиһамыны ҹавабландырыб: “Илһам Әлијев сон заманлар бејнәлхалг медиада мүхалифәти тез-тез һәдәфә алыр. Бу да онун мүхалифәтдән еһтијатланмасындан ирәли ҝәлир. Мүсават Партијасынын Дағлыг Гарабағ мүнагишәсинин һәлли илә бағлы мөвгеји мәлумдур. Һесаб едирик ки, мүнагишә Азәрбајҹанын әрази бүтөвлүјү чәрчивәсиндә һәлл олунмалыдыр. Биз һәм иҹтимаијјәт гаршысында, һәм дә ҝөрүшләримиздә ејни фикирләри сөјләјирик. Илһам Әлијев исә бир сыра тәслимчи өһдәликләр ҝөтүрүб. Бунун нәтиҹәсидир ки, Мадрид принсипләри кими тәслимчи бир һәлл варианты ортаја чыхыб”.
Иса Гәмбәр Илһам Әлијевин мүсаһибәдәки башга фикирләринә дә мүнасибәт билдириб. “Мусават.ҹом”а данышан башган гејд едиб ки, президентин мүсаһибәсиндә хејли реклам характерли, һәгигәтә ујғун олмајан тезисләр вар: “Азәрбајҹанын ҝуја Әлијевләр дөврүндә демократија јолу кечмәси, Авропаја интеграсија јолуну сечмәси, ортаг дәјәрләрлә бағлы бөјүк аддымлар атылмасы илә әлагәдар дејиләнләр һәгигәтә ујғун дејил”.
Мүсават башганы гејд едиб ки, Илһам Әлијевин мүхалифәтлә бағлы сөјләдији фикирләр һәгигәтдән узагдыр: “Биринҹи фикри будур ки, мүхалифәтин чох зәиф олмасы бизим ҝүнаһымыз дејил, биз онлара мәһдудијјәт гојмуруг. Әввәла, ҹидди мәһдудијјәтләр вар вә бу да һәр кәсә бәллидир. Мүхалифәт телевизијалара бурахылмырса, сәрбәст топлашмаг азадлығы јохдурса, сәрбәст топлашмаг азадлығыны илләрлә реаллашдырмаг истәјән мүстәгиллијин мемарларындан бири Ариф Һаҹылы, бизим ҝәнҹләримиз, Мүсаватдан, АХҸП-дән, башга гүввәләрдән олан, мүстәгил ҝәнҹләрин бу ҝүн һәбсдә олмасы мәһдудијјәт дејилсә, бунун ады нәдир?
Мүхалифәтин зәиф олмасы һаггында дејилән фикир дә һәгигәт дејил. Мүхалифәт кифајәт гәдәр ҝүҹлүдүр. Әҝәр Илһам Әлијев мүхалифәтин зәиф олмасы дүшүнҹәсиндәдирсә, бизим сәрбәст топлашмаг азадлығыны реаллашдырмаг имканларыны мәһдудлашдырмасын. О заман мүхалифәтин ҝүҹү ҝөрүнәҹәк. Нормал бир сечки кечирилсин, сәсләр дүзҝүн сајылсын, о заман Илһам Әлијевә дә, һәр кәсә дә бәлли олаҹаг ки, мүхалифәтин сәси нә гәдәрдир, Илһам Әлијевин, ЈАП-ын сәси нә гәдәрдир”.
Диггәт: Хәбәрдән истифадә етдикдә мәнбәјә истинад лазымдыр
