Аллаһ-Таалаја шүкүр едирик ки, севҝили мәмләкәтимиздә Доктор Мөвсүм Сәмәдов кими бир инсан вар. Сорушурсунуз ки, неҹә инсандыр? Бундан өтрү онунла үнсијјәтдә олмаг, јолдашлыг етмәк ән јахшы јолдур. Чүнки Азәрбајҹан адлы мәмләкәтдә Аллаһын севимли бәндәсини террорчу, наркоман кими тәгдим етмәк ади иш олуб. Елә бил ки “јүз ешитмәкдәнсә бир ҝөрмәк јахшыдыр” мәсәли Азәрбајҹан үчүн дејилиб. Бу өлкәдә ән пис адамын президент администрасијасында, ән јахшынын исә һәбсханада олмасы нормал һалдыр. Доктор Сәмәдов али тибби вә дини тәһсил алыб, Азадлыг һәрәкатында иштирак едиб, Ислам Партијасынын сәдри сечилиб. Сонда Азәрбајҹан Республикасынын президенти постуну тутмуш Илһам Әлијеви тәнгид етдији үчүн шәрләнәрәк 12 ил азадлыгдан мәһрум едилиб.
* * *
Салам, Мөвсүмҹан! Бәлкә дә сәнин танымадығын, амма сәни јахшы таныјан достлар чох дарыхыблар һәм сөзүн, һәм өзүн үчүн. Саатларла сакит отурмағы баҹаран, гызғын мәҹлисдә сејрчи мөвге тутан Һаҹы Мөвсүмүмүзүн бөјүк саваш үчүн барыт топладығы кимсәнин ағлына ҝәлмәзди. Биз данышдыг, сән гәзәбини јығдын вә президентлији Бөјүк Азәрбајҹан Халгы үчүн ләкә сајылаҹаг шәхсә нә лазымдыса дедин. Бүтүн дүнја ешитди ки, Азәрбајҹан адлы мәмләкәтдә халга јолдан өтәнин бири һакимлик едир. Бунунла да Аллаһын вердији өмрү ән сәмәрәли шәкилдә истифадә етдин. Тарихә јазылды ки, Губанын саф һавасында боја-баша чатмыш, садә, пак бир инсан Аллаһын әмрини ејнән һәзрәт Муса кими Азәрбајҹанын Фиронуна чатдырды вә 12 ил һәбс алды. Сәнин бу ҝүнүнә гибтә етмәјимиз кимләрәсә тәәҹҹүблү ҝөрүнә биләр. Дејәрләр ки, Һаҹы Мөвсүмә 12 ил иш верибләр, өмрү зинданда, аилә-ушагдан аралы кечәҹәк. Буну бәдбәхтлик биләнләр тәбии ки Әлијев вә онун әлалтыларыны хошбәхт сајырлар. Чүнки Аллаһа, ахирәтә, сорғу ҝүнүнә, һалал-һарама етигадлары јохдур. Сәни бәдбәхт сајанлар дүнәнә гәдәр Мүбарәк, Гәддафи, Бин Әлијә дүнјанын ән хошбәхт адамлары кими гибтә едирдиләр. Бир вахт ҝәләҹәк ки, Әлијевә дә гибтә етдикләрини хәҹаләтлә јада салаҹаглар.
Мөвсүмҹан, сән арзуна чатдын. Залыма сөзүнү дејиб, галан өмрүнү һәбсханада азад кечирмәјә гәрар вердин. Бу Сејјидүш-шүһәда Һүсејнин (ә) јолу иди. Бунунла сүбут етдин ки, Аллаһ јолунда һәр шејиндән кечмәјә һазырсан. Ибраһим өз Исмаилини гурбан вердији кими сән дә дүнја раһатлығыны, аилә-өвлад севҝисини бу јолда гурбан вериб әсил рәһбәр олдуғуну сүбута јетирдин. Зәррәҹә шүбһә етмирик ки, бу чиркаба батырылмыш ҝөзәл мәмләкәтдә сәнин үчүн ән раһат јер елә һәбсханадыр. Бајырда әл-ајағы ачыг мәһбус олмагданса һәбсханада әл-ајағы гандаллы азад оласан – Мөвсүм кими! Биз сәнинлә гүрур дујуруг, биз сәнә гибтә едирик. Зәррәҹә шүбһәмиз јохдур ки, аилә-өвладын да ејнән Әһли-бејт (ә) кими дин јолунда мәшәггәтләрдән ләззәт алыр. Дејирдиләр Азәрбајҹан халгы үмидсиздир, сүстдүр, һаггыны истәјән дејил. Сән вә сәнин силаһдашларын – 50 нәфәрәдәк Аллаһ ашиги инди өз мәбуду илә һәбсханадан данышыр. Инди Аллаһ-Таала өз садиг бәндәләринин зүмзүмәләрини Азәрбајҹан һәбсханаларындан динләјир.
Мөвсүмҹан! Аллаһ бирини учурума јуварлатмаздан габаг онун ағлыны алар. Бу динсиз режим ағлыны әлдән верди. Халг нә нефт, нә торпаг, нә гызыл-ҝүмүш – Аллаһын әмри илә һиҹаб истәди. Бунлар ағылларыны нә гәдәр итирдиләр ки, көрпә гызлара һиҹабла мәктәбә ҝетмәји јасагладылар! Бунунла да истефа әризәләрини јаздылар. Бунунла да Аллаһын китабында адларынын габағына кафир сөзүнү гејд етдиләр. Дүшүндүләр ки, 40-50 диндары һәбсханаја атмагла Исламын габағына сәдд чәкәҹәкләр. Шүбһәсиз ки, сәрхош олублар бу гәрарлары чыхаранда, Һәзрәт Пејғәмбәрин (с) Мәккәдән неҹә чыхмасы вә Мәккәјә неҹә гајытмасы да јадларына дүшмәјиб. Дүшүнмәјибләр ки, Һаҹы Мөвсүмү һәбсханаја салмаг онун адына мәмләкәт боју мәктәбләр ачмагдыр. Инди орта мәктәбләрдә һиҹабы олмајан көрпә гызлар да бу режимә ләнәт охујур. Инди сәни бүтүн Азәрбајҹан таныјыр. 12 илә билирсәнми нәләр баш верәҹәк? Буну гојаг Аллаһ-Тааланын ихтијарында. Һәр һалда Аллаһ сечилмиш мөминләрин һәбсхана ағрысыны, режим гулдурларынын күбар һәјатыны сејр етмәклә кифајәтләнмәјәҹәк.
Мөвсүмҹан! Сиз ишинизи баша чатдырдыныз. Амма бајырда галмыш он милјонлуг халг, минләрлә диши додағыны кәсән мөмин ҝәнҹ ҝөтүр-гој едир, Аллаһ гаршысында вәзифәси барәдә дүшүнүр. Һеч шүбһәсиз мәст башчылар бир ҝүн халгын нәрәсинә јухудан дик атылаҹаг. Нә вахт? Олсун ки бу нәрә Сизи дә һәбсханада диксиндирди. Амма о ҝүн узагда дејил.
Мөвсүмҹан! Јахшы билирсән ки, садә халг бир гарын чөрәкдән өтрү һансы һәгарәтләрә дөзүр. Гулдур башчыларын тәблиғат машыны ҝеҹә-ҝүндүз ишләјир ки, ким бу дөвләтә гаршы чыхырса вәтән хаинидир, хариҹдән ҝөстәриш алыр. Амма халг о гәдәр дә авам дејил ки, азғын башчыларын һијләсинә ујсун. Тарихә бахсаг шаһид оларыг ки, бүтүн дин башчылары, һәтта пејғәмбәрләр вә имамлар белә бөһтанларла үзләшиб. Амма залымларын мәһви һөкмүнү Аллаһ верир. Бунун гаршысыны нә чиркин тәблиғат, нә дөвләт сәвијјәсиндә террор, нә дә һәбсләрлә алмаг олар. Аллаһын бәласы ејнән јағыш кими сәмадан енир. Әбабил гушлары јолдадыр. Онларын залымларын башына јағдыраҹағы дашлар гаршысында дәмир-бетон дамлар таб ҝәтирмәк ҝүҹүндә дејил.
Биз бајырдакы мәһбуслар Сиз һәбсханадакы азадларын дуасына мөһтаҹыг. Сизин әлиниз Аллаһын әтәјиндәдир. Сиз бу милләтә хош ҝүн истәјин.
Бир груп тәләбә
