Әһли Бејт -АБНА- хәбәр аҝентлијинин вердији хәбәрә әсасән: Тәһсил Назирлији гаршысында кечирилмиш “Һиҹаба азадлыг!” аксијасына ҝөрә һәбс олунанлардан бешинә - Әлван Һүсејнов, Рөвшән Мәммәдов, Нурани Мәммәдов, Араз Исмајылов вә Рүфәт Миријевә һөкм октјабрын 7-дә охунаҹаг. Буну октјабрын 4-дә кечирилән мәһкәмә просесиндә һаким бәјан едиб.
Просесдә Әлван Һүсејнов вә Рөвшән Мәммәдов сон сөзлә чыхыш едибләр. Онлар мајын 6-да Тәһсил Назирлији гаршысында кечирилән аксија заманы даш атдыгларыны етираф едибләр вә бундан пешман олдугларыны дејибләр. Еләҹә дә һүгугларынын мүдафиәсинә ҝөрә вәкил Анар Гасымлыја, әдаләтли олдуғуна ҝөрә дөвләт иттиһамчысы Елфаг Сәфәрова өз миннәтдарлыгларыны билдирибләр. Һәр ики тәгсирләндирилән шәхс диҝәр тәгсирләндириләнләрә дә шәрти ҹәза верилмәсини һакимдән хаһиш едибләр.
Диҝәр тәгсирләндириләнләр сон сөзлә чыхыш етмәк үчүн һакимдән вахт истәјибләр.
Просес октјабрын 7-дә давам едәҹәк.
Сентјабрын 27-дә дөвләт иттиһамчысы јүнҝүлләшдириҹи һаллары әсас ҝөтүрәрәк Әлван Һүсејновун вә Рөвшән Мәммәдовун 2 ил сынаг мүддәти олмагла 3 ил 6 ај мүддәтинә шәрти ҹәза илә мәһкәмә залындан дәрһал бурахылмасыны истәмишди.
Башга тәгсирләндирилән шәхсләрә ҝәлинҹә, прокурор Араз Исмајыловун 4 ил, Нурани Мәммәдов вә Рүфәт Миријевин һәр биринин 3 ил 6 ај мүддәтинә азадлыгдан мәһрум олунмасыны истәјиб.
Мајын 6-да Тәһсил Назирлијинин бинасы гаршысында кечирилән аксијаја ҝөрә 15 нәфәр ҹинајәт мәсулијјәтинә алынараг һәбс едилиб. Һүгуг мүһафизә органларынын мәлуматына ҝөрә, аксија иштиракчылары 4 шәхси автомобилә, бир нечә иҹтимаи-иашә вә тиҹарәт објектинә зијан вурублар, 26 полис әмәкдашы хәсарәт алыб.
Диггәт: Хәбәрдән истифадә етдикдә мәнбәјә истинад лазымдыр
