Әһли Бејт -АБНА- хәбәр аҝентлијинин вердији хәбәрә әсасән:
Партијанын мәтбуат хидмәтиндән дахил олан ҹавабда билдирилир ки, Ф.Ағамалынын чыхышы олдугҹа мәсулијјәтсиздир вә бу чыхыш минләрлә инсанын, вәтәнпәрвәр, халгына, дөвләтинә, торпағына, дининә, әгидәсинә сәдагәтли инсанын сијаси фәалијјәтинә, ачыг шәффаф фәалијјәтинә ләкә јахмаг, гараламаг мәгсәди дашыјыр, бөһтандыр.
“Әввәла ону гејд етмәлијәм ки, бу ҝүн Азәрбајҹан Ислам Партијасына гаршы гәрибә тенденсија јашаныр. Өлкәнин мүхтәлиф јерләриндә мүхтәлиф иттиһамларла тәгсирләндирилән шәхсләр, бу әмәлләрә аидијјәти олмајан Ислам Партијасына бағланыр, исламчылара бунунла горху вә хоф јашадылыр. Мән һәтта ајры-ајры исламчыларын белә, һәрәкәтләрини вә ја һәр һансы бир фикир, дүшүнҹәләрини әсас ҝөтүрәрәк үмумән партијаны характеризә етмәјин, сијаси хәттини, мәгсәд вә вәзифәләрини мүәјјәнләшдирмәјин тәрәфдары дејиләм, буну гәбул етмирәм.
Әввәла, Азәрбајҹан Ислам Партијасы күчә вә ҹәнҝәллик ганунлары илә дејил, ваһид Низамнамә вә Мәрамнамә әсасында гурулуб фәалијјәтини ҝөстәрир. Бу Низамнамә вә Мәрамнамә Азәрбајҹан Республикасынын Конститусијасына, “Сијаси Партијалар Һаггында Ганун”а ујғун тәртиб олунмуш, һазырланмыш, партијанын сон гурултајында гәбул едиләрәк һәр бир үзвә тәгдим олунмушдур. Бу сәнәддә партијанын әсас мәгсәди вә вәзифәләри ачыг ҝөстәрилмишдир. Бунлар Азәрбајҹан дөвләтчилијинин ҝүҹләндирилмәсиндән, инкишафындан, азад вә әдаләтли ҹәмијјәтин гурулмасындан, ҹәмијјәтдә иҹтимаи һәмрәјлијин јарадылмасы, вәтәндаш ҹәмијјәтинин өлкәнин сијаси һәјатында иштирак етмәсини тәмин етмәкдән ибарәтдир. Диҝәр партијалар кими АИП гаршыја гојдуғу мәгсәдләрә чатмаг үчүн дөвләт ганунлары чәрчивәсиндә күтләни информасијалар јаратмаг, күтләни тәдбирләр кечирмәк, хариҹи өлкәләрин сијаси партијалары, иҹтимаи гејри-һөкумәт тәшкилатлары илә әлагәләр јаратмаг, сазишләр имзаламаг, бејнәлхалг гејри-һөкумәт тәшкилатларына үзв олмаг һүгугуна маликдир. АИП бир нечә дәфә өлкәдә кечирилән Милли Мәҹлис, бәләдијјә, президент сечкиләриндә бу вә ја диҝәр шәкилдә иштирак етмишдир.
Ф. Ағамалынын һансы аргументләрә сөјкәндији мәним үчүн чох мүәммалыдыр. Онун АИП-ин фәалијјәтини, исламчыларын мәгсәдләрини гијмәтләндирмәсинә ҝөрә өлкәдә ҹидди бөһран јашаныр. Һүгуг-мүһафизә органлары, онун дүшүнҹәләри илә јанашсаг ифлиҹ вәзијјәтдәдир, дөвләт тәһлүкәсизлији системи демәк олар ки, Ф. Ағамалыја ҝөрә ишләмир.
Мәни ән чох марагландыран исә одур ки, Ф. Ағамалыда Азәрбајҹан Ислам Партијасына бу гәрәзли мүнасибәт нәдән гајнагланыр? Бәлкә үч ҹүт бир тәк үзвү олмајан Ана Вәтән Партијасынын АИП-ә гысганҹлығындан? Онун нәзәринә чатдырмаг истәјирәм ки, АИП һакимијјәтә ҝәләҹәксә, әдаләтли ҹәмијјәт гурмагла да кечмиш рүшвәтхорлары ҹидди ҹәзаландырмаг фикри, дүшүнҹәси, програмы јохдур. Сон сөз олараг демәк истәјирәм ки, бир партија һаггында бүтөвлүкдә бу кими бөһтанлар демәк, тәмиз, әгидәли, вәтәнпәрвәр инсанлары ағына-бозуна бахмадан хаин чыхармаг садәҹә ајыбдыр.”
Хатырладаг ки, Ана Вәтән Партијасынын сәдри Фәзаил Ағамалынын сәсләндирдији фикир бу шәкилдә иди: “Бу ҝүн Азәрбајҹан Ислам Партијасынын рәһбәрлијиндә дајанан шәхсләр кәнардан, ачыг десәк, Иран Ислам Республикасындан идарә олунурлар. Вә онлардан тәлиматланараг бу вә ја диҝәр шәкилдә фәалијјәт програмы гурурлар. Азәрбајҹан Ислам Партијасы маһијјәт етибары илә өзләринин фәалијјәтинә ҝөрә, Азәрбајҹан дөвләтчилијинә гаршы ән сон радикал мөвгедә дајанырлар. Һәм дә онларын бахышларында Азәрбајҹан дөвләтчилијинә, Конститусијанын маддәләринә кифајәт гәдәр зидд әмәлләр вар вә фикирләр вар. Онлар Азәрбајҹанда Ислам дөвләти јаратмаг истәјини ачыг шәкилдә заман-заман етираф едирләр”.
Диггәт: Хәбәрдән истифадә етдикдә мәнбәјә истинад лазымдыр
