Әһли Бејт -АБНА- хәбәр аҝентлијинин вердији хәбәрә әсасән: Сумгајыта башчы ҝәләндән сонра Елдар Әзизов јерли саһибкарлара гаршы әмәлли-башлы «сәлиб јүрүшүнә» кечиб. Белә ки, мүхтәлиф бәһанәләр алтында саһибкарлардан пул топлајан иҹра башчысы һәм дә бу ишдә јерли МТН-нин ҝүҹүндән дә истифадә едир.
Бу шок мәлуматы ПИА.АЗ-а верән Сумгајыт саһибкарларындан биринин сөзләринә ҝөрә, Елдар Әзизов о гәдәр гүдрәтли фигурдур ки, Сумгајыта МТН рәисини дә өзү тәјин етдириб: «Ону өзү илә Ҝәнҹәдән ҝәтириб вә бу ҝүн онун ҝүҹү илә саһибкарлара диван тутур».
Мәнбә билдирир ки, һәр бир саһибкардан 1000-3000 манат арасы пул тәләб едән Елдар Әзизов тәләб олунан мәбләғи өдәмәјән вә јахуд да өдәмә имканы олмајан саһибкары Сумгајытын хүсуси хидмәт идарәсинин әлинә верир: «МТН ишчиләриндән санки гочу кими истифадә олунур. Пулу вермәјәнләр МТН-чиләр тәрәфиндән ганунсуз олараг һәбс олунараг, јерли МТН-нин зирзәмисинә салыныр».
Мәлуматда о да гејд олунур ки, Елдар Әзизовун ИҺ башчысы постунда олдуғу илк ҝүнләрдә бу мәсәлә даһа да интенсивләшмишди: «Сон ҝүнләр мәтбуатын мүдахиләси онлары мүәјјән гәдәр еһтијатлы олмаға сөвг едиб. Амма јенә дә саһибкарларын үзәриндә бир МТН хофу вар».
Диггәт: Хәбәрдән истифадә етдикдә мәнбәјә истинад лазымдыр
