Әһли Бејт -АБНА- хәбәр аҝентлијинин вердији хәбәрә әсасән: Ијулун 14-дә ахшам Ағ Евдә Русија ХИН рәһбәри Серҝеј Лавров илә ҝөрүшләр вә данышыглар олаҹаг. Русијалы назирин сәфәрини “Туран”а шәрһ едән јерли експертләр гејд едирләр ки, әсас диггәт ракет әлејһинә мүдафиә мәсәләсинә јөнәлдиләҹәк.
Мәлум олдуғу кими, сон вахтлар Москва бир сыра кәскин бәјанатлар верәрәк билдириб ки, Авропада Американын РӘМ системинин јарадылмасыны сакит мүшаһидә етмәјәҹәк.
Белә вәзијјәтдә Русијанын иҹарәјә ҝөтүрдүјү Гәбәлә РЛС-ин ролу вә әһәмијјәти артыр. Москва глобал РӘМ елементи кими бу стансијадан бирҝә истифадә олунмасы идејасыны ирәли сүрмәкдә давам едир. Лакин 2012-ҹи илдә иҹарәнин мүддәти баша чатыр. Бакы исә иҹарә һаггыны артырмаг нијјәтиндәдир. Сирр дејил ки, Бакынын әһвалына Гарабағ низамланмасында васитәчи олан Русијанын давранышы тәсир ҝөстәрир.
Бакыдакы мәлуматлы мәнбәләрдән бәлли олуб ки, Казан ҝөрүшүндә Гәбәлә РЛС мәсәләси дә ҝүндәмә ҝәлиб. Лакин буну Гарабағла әлагәләндирмәк ҹәһдләри Илһам Әлијевин наразылығына сәбәб олуб вә о, вахтындан әввәл (ҹыдыр мәрасиминдә иштирак етмәдән) нүмајишкаранә шәкилдә Казаны тәрк едиб. Јухарыда дејиләнләри нәзәрә алсаг, ҝүман етмәк олар ки, Лавровун гаршысында мәгсәд гојулуб ки, РӘМ мәсәләсиндә (Гәбәлә РЛС амили нәзәрә алынмагла) Вашингтонла һәрәкәтләри разылашдырсын вә Казан ҝөрүшүндә уғурсузлуг нәзәрә алынараг Гарабағ низамланмасына даир данышыгларын нөвбәти мәрһәләсинин мәзмуну һагда разылыға ҝәлинсин.
Диггәт: Хәбәрдән истифадә етдикдә мәнбәјә истинад лазымдыр
