Әһли Бејт -АБНА- хәбәр аҝентлијинин вердији хәбәрә әсасән: Бу ҝүн Иҹтимаи Палата саат 17-дә “Нәриманов” кинотеатрынын гаршысында аксија кечирмәк нијјәтиндәдир. Бакы Шәһәр Иҹра Һакимијјәти Конститусијаны вә “Сәрбәст топлашмаг азадлығы һаггында” гануну кобуд шәкилдә позараг митинглә бағлы мүраҹиәтә мәнфи ҹаваб вердикдән сонра ИП Координасија Шурасы мәһз бу мәканы динҹ митингин кечирилмәси үчүн сечиб.
Буҝүнкү аксијаја ҹидди һазырлашан ИП нечә һәфтәдир бүтүн ресурсларыны бу тәдбирә һазырлыға сәрф едиб. ИП-јә дахил олан партијаларын фәаллары илә јанашы хејли сајда битәрәф вәтәндашларла чохлу ҝөрүшләр кечирилиб.
Нурәддин Мәммәдли: “19 ијун аксијасы гаршысына гојдуғу мәгсәдләрә чатаҹаг”
АХҸП сәдринин мүавини Нурәддин Мәммәдлинин фикринҹә, һазырлыг просесинин ҝедишинә вә ортада олан нәтиҹәләрә әсасән әминликлә сөјләмәк олар ки, 19 ијун аксијасы гаршысына гојдуғу мәгсәдләрә чатаҹаг. Аксијанын ҝүнү мәлум оландан АХҸП-нин һазырлыг просесинә старт вердијини дејән Н.Мәммәдли әлавә етди ки, ИП үзвү олан диҝәр тәшкилатлар, гурумлар да өтән мүддәт әрзиндә митингә һазырлығы бир нөмрәли мәсәлә елан етмишдиләр: “Бу аксија инсанларын өлкәдәки дурума етиразынын тәзаһүрүдүр. Иҹтимаи Палатанын нөвбәти митинги бир даһа һакимијјәтин маһијјәтини чылпаглығы илә ортаја гојаҹаг. Ҝөстәрәҹәк ки, һакимијјәт аксијаја иҹазә вермәмәк вә диҝәр аддымлары илә ҹәмијјәтдә гаршыдурманын јаранмасында мараглыдыр. Һәлә дә өлкәдә инсанларын сијаси һүгуглары позулур вә онлара гаршы бөјүк зоракылыг вар. Амма һакимијјәтин бүтүн зоракы аддымларына бахмајараг, биз динҹ мүбаризәмизи давам етдирмәк нијјәтиндәјик”.
Һүсејн Мәликов: “Буҝүнкү аксија да издиһамлылығы илә јадда галан олаҹаг”
Мүсават Партијасынын Сәбаел рајон тәшкилатынын сәдри, ИП үзвү Һүсејн Мәликовун да фикринҹә, ИП-нин нөвбәти аксијасы да издиһамлылығы илә јаддагалан олаҹаг. Партијада аксија илә бағлы әһвал-руһијјәнин јүксәк олдуғуну дејән Һ.Мәликов вурғулады ки, партија үзвләри илә јанашы сырави вәтәндашларла ҝөрүшләр ҝөстәрир ки, ҹәмијјәтдә һазыркы идарәчиликдән бөјүк наразылыг вар: “Һакимијјәт тәмсилчиләри, һүгуг-мүһафизә органларынын тәмсилчиләри аксијагабағы мүхтәлиф бәјанатлар вермәклә митингин издиһамлылығына тәсир едәҹәкләрини дүшүнүрләр. Амма онлар јанылырлар. Будәфәки аксија һәм сајына, һәм дә ҹошгусуна ҝөрә әввәлкиләри ҝеридә гојаҹаг. Аксија бир даһа ҝөстәрәҹәк ки, топлумун бөјүк әксәријјәти бу игтидарын јүрүтдүјү сијасәти бәјәнмир вә ҹидди ислаһатлар тәләб едир”.
Әнвәр Әлијев: “Әминәм ки, Иҹтимаи Палатанын аксијалары артан хәтлә ҝедәрәк бөјүк иҹтимаи һәрәката чевриләҹәк”
ИП үзвү, Милли Азадлыг һәрәкатынын өнҹүлләриндән Әнвәр Әлијевин дә фикринҹә, тәмсил олундуғу тәшкилатын сијаси мүһитә ҹанланма ҝәтирән аксијаларла чыхыш етмәси алгышланандыр. Азәрбајҹанын һазыркы дурумунда һагг уғрунда мүбаризә апармағын зәрури олдуғуну дејән Ә.Әлијев билдирди ки, һазырда дүнјада баш верәнләри диггәтлә изләмәк лазымдыр: “Иҹтимаи гынаг, иҹтимаи тәпки бүтүн дүнјада ән уғурлу мүбаризә формасыдыр. Һазырда дүнјада баш верәнләр дә ҝөстәрир ки, бу ҹүр мүбаризә јолуну сечәнләр сонда уғур газанырлар. Әминәм ки, Азәрбајҹанда да Иҹтимаи Палатанын тәшүббүсү илә кечирилән етираз аксијалары артан хәтлә ҝедәрәк сонда бөјүк бир иҹтимаи һәрәката чевриләҹәк”.
Алмаз Әлигызы: “Өз һаггымыз, һүгугларымыз уғрунда мүбаризәјә чыхаҹағыг”
ИП үзвү Алмаз Әлигызы да һесаб едир ки, реал мүхалифәт гүввәләринин ҹәмләшдији Иҹтимаи Палатанын аксија гәрары вермәси ҝүнүмүзүн реаллығына ујғундур: “Иҹтимаи Палатанын демократик ислаһатлар тәләби илә аксија кечирмәсинә чох нормал бахырам. Бу, һазырда бүтүн дүнјанын тәләбидир. Әтрафымызда баш верән һадисәләр дүнјада јени просесләрин ҝетдијини ҝөстәрир. Вә бир чох өлкәләр өзләрини демократик ҝөрмәк истәјирләр. Ијунун 19-да да биз өз һаггымыз, һүгугларымыз уғрунда мүбаризәјә чыхаҹағыг. Сәрбәст топлашмаг һүгугу һәр бир вәтәндашын гануни һаггыдыр вә онун мәһдудлашдырылмасы јолверилмәздир”.
Кәмалә Хәлилова: “ИП-нин мүбаризәси Азәрбајҹана шәрәф ҝәтирән јолдур”
ИП үзвү Кәмалә Хәлилова да билдирди ки, һазырда апарылан мүбаризә вә тутулан јол Азәрбајҹана шәрәф ҝәтирән јолдур. ИП-нин Азәрбајҹанын һагг сәси үчүн мүбаризәјә галхдығыны дејән К.Хәлилова вурғулады ки, һазыркы дөнәмдә дөвләтин үзәринә дүшән вәзифә халгын тәләб етдији ислаһатлары апармагдыр: “Мән шәхсән аксијада иштирак едәҹәм. Бизим тәләбимиз дүнјада баш верәнләрә ујғун олараг Азәрбајҹанда да демократик ислаһатлара старт верилмәсидир. Амма һәләлик бу истигамәтдә һеч бир аддым атылмыр. Бәзән һакимијјәт тәмсилчиләри Иҹтимаи Палатанын аксијаларынын баш тутмадығы аргументи илә чыхыш едирләр. Амма онлар унудурлар ки, әҝәр аксијалар һәгигәтән дә баш тутмасајды, һөкумәт әһалинин коммунал хәрҹләрини ашағы салмаз, бир сыра ҝүзәштләр елан етмәзди. Азәрбајҹан сосиал партлајыш әрәфәсиндәдир. Дәјишикликләр гачылмаздыр”.
К.Хәлилованын сөзләринә ҝөрә, будәфәки аксијанын әсас тәләбләриндән бири дә һәбсдә олан сијаси мәһбусларын азадлыға бурахылмасыдыр.
Диггәт: Хәбәрдән истифадә етдикдә мәнбәјә истинад лазымдыр
