Әһли Бејт -АБНА- хәбәр аҝентлијинин вердији хәбәрә әсасән: Азадлыг гәзетинин мүхбири бу барәдә арашдырма апармагдан өтрү Гул Базарында олан инсанларла сөһбәт етмишдир. Онун јазысыны диггәтинизә чатдырырыг.
Гадынларын “гул базары”
Онлар дајандыглары јери “фәһлә базары” адландырырлар. Бакыда белә јерләр аз дејил. Ҹамаат буралара “гул базары” дејир. Буранын исә бөјүк бир фәрги вар. Бурада кишиләр дејил, гадынлар дајаныр. Онларын јери Нәсими базарынын арха тәрәфидир. Өјрәндик ки, буна охшар мәканлардан бири дә Бакынын Маштаға кәндиндә вар.
“Нәсими” базарынын архасындакы бу ишчи базары јени дејил. Ылләрдир ки, гадынлар бура јығышыр. Бәзиләри бир нечә ајдыр бура ҝәлиб-ҝедир. Бәзиләри исә дејир ки, артыг 10 ил олуб.
“Шәклимизи чәкмә!”
Јолун кәнарында, сәкинин үстүндә отурублар. Ҝүн тәпәләринә дөјүр. Чох јорғун ҝөрүнүрләр. Журналист олдуғуму биләндән сонра да раһатлашмырлар. Хаһиш едирләр ки, шәкилләрини чәкмәјим. Онлары биртәһәр инандырырам ки, шәкил чәкмәјәҹәм.
Ҹибимдән диктафон чыхармаг истәјирәм ки, јенә һәрәси бир тәрәфә гачыр. Сәсләрини јазмајаҹағыма да сөз верирәм...
“Евдән чыханда оғланларым билмир һара ҝедирәм”
40-45 јашларында гадынлар һәр ҝүн бура пул газанмаг үчүн ҝәлирләр. Онлары евләрә апарыб ишләдирләр. Гадынлар шүшә силирләр, отаглары тәмизләјирләр. Нә иш олса, ҝөрүрләр. Тәки пул олсун...
Һәр ҝүн 15-ә јахын гадын јығышыр бура. Ҝөрдүкләри ишин әвәзиндә 10-30 манат пул алырлар. Ҝүн јандырмасын дејә, үзләрини бағлајырлар. Бу, һәм дә јолдан өтәнләрин онлары танымамасы үчүндүр. Бахмајараг ки, өзләри буну инкар едир.
“Мән евдән чыханда оғланларым билмир һара ҝедирәм. Елә билирләр ки, һансыса евдә ишләјирәм. Һәр ҝүн ҝәлиб бурада дајандығымдан хәбәрләри јохдур. Әҝәр јахынларымдан кимсә билсә, утандығымдан јерә ҝирәрәм. Кирајә галырыг. Доланмаг олмур. Елә олур ки, ҝүнләрлә иш тапылмыр”, - дејә сөһбәтләшдијимиз гадынлардан бири аҹынаҹаглы дурумундан данышыр.
“Бәзән елә варлы адамларын виллаларына ҝедирик ки...”
“Башга јердә иш олса, әлбәттә ки, ҝедәрик. Биз дә анајыг. Ким истәјәр анасы ҝәлсин бурада дајансын?! Машынларын габағына гачсын... Бәзән елә варлы адамларын виллаларына ҝедирик ки, адам ҝөрәндә дәли олур. Бахырсан, чохлу машыны, беш-алты јердә еви вар. Нолар ки, бир дәфә биз касыблара әл тутсалар?!”, - буну да башга бир орта јашлы ханым дејир.
Гадынлардан бири данышаркән ағламаға башлајыр. Дәфәләрлә хаһиш едир ки, онун адыны вә шәклини гәзетдә вермәјим. Нијә ағладығыны сорушурам. Јашадығы һәјатдан бездијини дејир: “Әрим јохдур. Ыки јетимимлә галырам. Онлары мән сахлајырам. Сәһәр сәккиздән ҝәлиб бурада дајанмышам. Ындијә кими бир манат да олсун газанмамышам. Бундан габаг кафедә габјујан, ашбаз көмәкчиси, ширнијјат сехиндә ишләмишәм. Ҝүнә 7-8 манат верирдиләр. Бу пулла ушаг сахламаг олмур ахы... Президент һәр ҝүн биналар тикдирир, јоллар чәкдирир. Баһалы-баһалы ағаҹлар ҝәтириб булварда әкирләр. Бунларын әвәзинә јетим-јесирә, касыб-кусуба көмәк еләсәләр, нә олар?!”
Ҝөзәлләр “базары өлдүрүр”
Кишиләрин ишчи базарында олдуғу кими, гадынлар да дајанан машынларын габағына гачырлар. Һәр кәс чалышыр ки, ирәли кечсин. Буна ҝөрә араларында тез-тез дава-далаш олур. Һамы “иш тутмаға” чалышыр.
Она ҝөрә бир-бирләриндән шикајәтләнирләр: “Бурада бәзиләри вар, даһа ҝөзәлдиләр, даһа ҹавандылар. Она ҝөрә онлары даһа чох апарырлар ишләмәјә”.
Диггәт: Хәбәрдән истифадә етдикдә мәнбәјә истинад лазымдыр
