“Ҹиһад тәгванын либасыдыр” – бујурур Әмирәлмөминин (ә). Гурани-кәримин Әраф сурәсиндә дә бу ифадә ишләдилир.
Нәдир тәгва? Руһи вә әхлаги чиркинликләрдән паклыг! Һәгиги мүҹаһид һәгиги тәгваја саһиб оландыр. Һәсәд, тәкәббүр, һәрислик, пахыллыг һиссләрини ајаг алтына алмыш инсан Мән бүтүнү ајаг алтына алмышдыр вә әсил мүҹаһиддир.
Маидә сурәсиндә бујурулур ки, иман ҝәтириб јахшы ишләр ҝөрәнләрә пис әмәлләрдән чәкиндикләри тәгдирдә һалалдан даддыглары шејләрә ҝөрә ҝүнаһ тутулмаз вә Аллаһ јахшы иш ҝөрәнләри севәр! Демәк, иман, салеһ әмәл вә тәгва јанашы зикр едилир. Ики мүһүм нөгтә: бири иман вә тәгва, диҝәри һәјат фәлсәфәси вә инсан һаглары. Билдирилир ки, немәтләр инсан үчүндүр, инсан исә иман, әмәл, тәгва үчүн.
Һәҹҹ сурәсиндә бујурулур: “Аллаһ јолунда лајигинҹә ҹиһад един. О (өз дини үчүн) сизи сечди вә диндә сизин үчүн һеч бир чәтинлик гојмады – атаныз Ибраһимин дининдә олдуғу кими. Аллаһ бундан (Гуран назил олмамышдан) әввәл дә, бунда (Гуранда) да сизә мүсәлман адыны верди ки, (гијамәт ҝүнү) Пејғәмбәр (динин тәблиғи, сизин она иман ҝәтирмәјиниз, итаәт етмәјиниз барәдә) сизә, сиз дә (әввәлки пејғәмбәрләрин Аллаһын һөкмләрини өз үммәтләринә чатдырдыглары һалда) инсанлара шаһид оласыныз. Елә исә (вахтлы-вахтында) намаз гылын, зәкат верин вә Аллаһа сығынын. (Аллаһ) сизин ихтијар саһибиниздир. О нә јахшы ихтијар саһиби, неҹә дә ҝөзәл имдада јетәндир!”
Бир чох тәфсирчиләр бурада ҹиһад сөзүнү саваш јох, “Аллаһ јолунда тәлаш” мәнасында гәбул едир. Бәли, ән чәтин ҹиһад нәфслә ҹиһаддыр – гәлбин бир күнҹүндә ҝизләнмиш сәсини чыхармајан шәр гүввә.
Аллаһ јолунда ҹиһада галханда чох заман өзүмүзү унудуруг. Унудуруг ки, Аллаһ өнҹә бәндәнин көнлүнә мүштәридир.
ҺаггЈолу
Елм вә Мәдәнијјәт бөлмәси
