Әһли Бејт -АБНА- хәбәр аҝентлијинин вердији хәбәрә әсасән: Ҝүҹүстан мүсәлманларынын Пашазадәнин идарәчилијинә етираз әламәти олараг өз ислами мүгәддәратларыны өзләринин мүстәгил формада, Бакысыз һәлл етмәк истәмәләри сон ҝүнләрдә галмагала чеврилмиш, актив бир мәсәләјә дөнмүшдүр. Беләки бу рүсвајчылыгдан јајынмаг истәјән Гафгаз Мүсәлманлары Идарәсинин сәдри Пашазадә мәсәләнин һәллини мүхтәлиф өлкәләрә сәфәр етмәкдә ҝөрүр. Буна ҝөрәдә өзүнүн башчылыг етдији нүмајәндә һејәти илә мајын 17-дә Өзбәкистана сәфәрә јола дүшүб.
Идарәдән верилән мәлумата ҝөрә, нүмајәндә һејәтинә Гафгаз халглары Али Сарај Дини Шурасынын үзвләри – Гафгаз мүфтиләри дахилдирләр. Мајын 21-дәк давам едәҹәк сәфәрдә мәгсәд Өзбәкистанда мәдрәсә вә али дини тәһсил алмыш Гафгазын сарај дин хадимләринин вахтилә тәһсил алдыглары КГБ-нин дини тәһсил оҹагларына баш чәкмәләри, һабелә Өзбәкистан дөвләтинә вә халгына сәмими миннәтдарлыгларыны јетирмәкдир.
Сәфәр заманы Пашазадә вә Гафгаз мүфтиләри Бухарадакы Мир-Әрәб мәдрәсәси, Дашкәнд Ислам Университетиндә олаҹаг, тәләбәләрлә ҝөрүш кечирәҹәкләр. Тәләбәлик илләринин хатирәләрини бөлүшәҹәк Гафгазын сарај дин хадимләри атеизм илләриндә мәһз КГБ-нин нәзарәти алтында дини маариф чырағыны сөнмәјә гојмамыш Өзбәкистанын али сарај дини тәһсил мүәссисәләриндә онлара комунист сајағы Исламын мүгәддәс дәјәрләрини ашыламыш, дүнјадан көчмүш мүәллимләринин руһларыны јад едәҹәкләр.
Хатирә сәфәри характери дашыјан бу сәфәр заманы Гафгаз Халглары Али Дини Шурасынын үзвләри Дашкәнд, Бухара вә Сәмәргәнди зијарәт едәҹәк, өзбәк торпағынын тарихи, дини мәканларына баш чәкәҹәкләр. ГМИ сәдри А. Пашазадәнин башчылыг етдији нүмајәндә һејәтини Өзбәкистан дөвләтинин рәсмиләринин гәбул едәҹәји ҝөзләнилир.
Диггәт: Хәбәрдән истифадә етдикдә мәнбәјә истинад лазымдыр
