Әһли Бејт -АБНА- хәбәр аҝентлијинин вердији хәбәрә әсасән: Ҝәнҹәнин Низами рајон Мәһкәмәсиндә ики руһанинин вә бир диндарын мәһкәмәси башлајыб. Руһаниләр Азәр Ҹәбијевин ҹинајәт иши һаким Абдулла Искәндәров, Фәхри Илјасовун ҹинајәт иши үзрә материаллар исә һаким Ҝүндүз Шириновун иҹраатындадыр. Һәр ики руһани хулиганлыгда тәгсирләндирилир. Онлара гаршы ҹинајәт иши үзрә истинтагы Ҝәнҹә шәһәр Полис Идарәсинин Истинтаг Шөбәси апарыб.
Иттиһама ҝөрә, Азәр Ҹәбијев полис ишчиләри тәрәфиндән тутулараг ҝәтирилдији Низами рајон полис шөбәси рәисинин иш отағындакы, Фәхри Илјасов да һәмин шөбәдәки полис бөлмәләриндән биринин рәисинин иш отағындакы аваданлыглары сындырыблар, полис ишчиләринә хәсарәт јетирибләр, шөбәдәки иш аһәнҝини позублар.
Руһаниләрин һеч бири өзүнү тәгсирли билмәјиб. Мәсәлән, Азәр Ҹәбијев ибтидаи истинтага вердији ифадәсиндә ҝөстәриб ки, 2001-ҹи илдә Иранын Гум шәһәриндә Мустафа адына Бејнәлхалг Университетә дахил олуб. Орада 10 ил охудугдан сонра 2010-ҹу илдә тәһсилини баша вурараг Ҝәнҹәјә гајыдыб. Бу ил јанварын 16-да руһани досту Фәхри Илјасовла бирликдә Ҝүрҹүстана ҝәзмәјә ҝедәркән «Гырмызы көрпү» ҝөмрүк постунда сахланылыб. Онлара Дахили Ишләр Назирлији тәрәфиндән ахтарылдыглары билдирилиб вә полисләрин әһатәсиндә Ҝәнҹәјә гајтарылыблар. Азәр Ҹәбијев ифадәсиндә ҝөстәриб ки, Низами рајон полис шөбәсинин рәиси Ағаһүсејн Мәммәдовун отағына ҝәтириләндә рәис ондан «сән нә вахт ағылланаҹагсан?» дејә сорушуб. Сонра рәис отагдакы компүтер мониторуну, клавиатураны, телефон апаратыны јерә чырпыб, отураҹаг стулуну бир нечә дәфә јерә чырпараг сындырыб. Даһа сонра дәһлизә чыхараг «ҝәлин ҝөрүн Азәр бураны неҹә дағыдыб» дејәрәк дәһлиздәки полис ишчиләрини отағына чағырыб. Азәр Ҹәбијевин ифадәсиндә белә ҝөстәрилир. Полис рәиси Ағаһүсејн Мәммәдов иш үзрә зәрәрчәкмиш гисминдә диндирилиб. О, ифадәсиндә ҝөстәриб ки, Азәр Ҹәбијевлә бир нечә дәфә профилактик сөһбәтләр апарыб вә онун өлкәдән чыхмасына гадаға гојулуб. Јанварын 16-да Азәр Ҹәбијев Ҝүрҹүстана кечмәк истәјәркән сахланылараг полис шөбәсинә ҝәтирилиб. Азәр Ҹәбијев онун иш отағына дахил оларкән «мәндән нә истәјирсиз?» дејәрәк отагдакы әшјалары сындырыб төкүб. Полис рәиси ифадәсиндә белә ҝөстәриб. Диҝәр руһани Фәхри Илјасова да ејни иттиһам ирәли сүрүлүб. Фәхри Илјасовла бағлы ифадә вермиш полис ишчиләри онун ејни гајдада полис бөлмәсиндәки әшјалары сындырдығыны ҝөстәрибләр. Фәхри Илјасовса ифадәси илә иттиһамлары тәкзиб едиб.
Полис ишчиләринин истинтага вердикләри ифадәләрә ҝөрә, һәр ики руһани узун мүддәтдир ки, әһали арасында дини мөвзуларда сөһбәтләр апарараг дини символиканы әкс етдирән фотошәкилләри, плакатлары ганунсуз олараг күчәләрә јапышдырыблар. Онларла профилактик сөһбәтләр апарылмасы үчүн сонунҹу дәфә полисә ҝәтириләркән полис ишчиләринә «кафирләр», «гејрәтсизләр» дејәрәк отагдакы әшјалары дағыдыблар.
Азәр Ҹәбијевин анасы Офелја Рзајева АзадлыгРадиосуна дејиб ки, оғлу Иранда руһани тәһсили алыб гајытдыгдан сонра ону дәфәләрлә полис шөбәсинә чағырараг адамларын јығышдығы јерләрдә дини мөвзуларда данышмамасыны тәләб едибләр.
Офелја Рзајева: «Мәним оғлум Иранда охујуб ҝәләндән гојмурлар о ушаг нәфәсини чәксин. Рамил Усубова гәдәр мәктуб јаздым ки, мәним ушағым Иранда охујуб дејә, бу ушаг аиләсинин јанына гајытмамалыјды? Иранда охумаг лазым дејилдисә, онда мәним оғлуму илк ҝүнүндән гојмајајдылар ҝетсин. Ҝөрдүләр ушағын бирҹә ҝүнаһы да јохдур, башладылар үстүнә шәрләр атмаға. Бир әсас тапыб гоја билмәдиләр ушағымын үстүнә, ахырда да дедиләр ки, полиси дөјүб. Белә шеј олар?»
Һәр ики руһанинин вәкили Елчин Намазов дејир ки, руһаниләр дини фәалијјәтә ҝөрә һәбс олунуб. Вәкил полис шөбәсиндә әшјалары сындырма иттиһамыны гондарма һесаб едир:
«Әслиндә һәр икиси сырф дини фәалијјәтләринә ҝөрә сахланылыб. Ҝәнҹәдән Иранын Гум шәһәриндә тәһсил алмыш ҹәми үч нәфәр вар. Онлардан икиси һәмин бу тутуланлардыр. Үчүнҹү руһани исә бунлар тутуларкән Ҝәнҹәни тәрк едиб Бакыја ҝәлмишди, бир мүддәт бурда галды, ара сакитләшәндән сонра Ҝәнҹәјә гајытды. Јохса ону да бунларла бирликдә тутаҹагдылар». О ки галды руһаниләрин конкрет һансы дини фәалијјәтлә мәшғул олмаларына, вәкил дејир ки: «Онлар Мәһәррәмлик ҝүнләриндә Ҝәнҹәдәки биналарын диварларына дини шүарлары әкс етдирән шәкилләр јапышдырыблар. Мәсҹидләрдә, адамларын чох олдуғу башга јерләрдә һиҹаба гојулан гадағаја етираз едибләр».
Гејд етдијимиз кими, Ҝәнҹә шәһәр Мәһкәмәсиндә даһа бир дини фәа Илгар Мусајевин дә мәһкәмәси кечирилир. Һәмин иш дә һаким Абдулла Искәндәровун иҹраатындадыр. Илгар Мусајев дә мәсҹидләрдә вә адамларын топлашдығы мүхтәлиф јерләрдә һиҹаба гадағаја етираз етдијинә ҝөрә дәфәләрлә полис чағырылыб, дини фәалијјәти илә бағлы онунла профилактик сөһбәтләр апарылыб. Сонунҹу дәфә профилактик сөһбәт үчүн полис шөбәсинә дәвәт олунанда исә орадан хулиганлыг маддәси илә бирбаша истинтаг тәҹридханасына апарылыб. Иттиһама ҝөрә, о да полис шөбәсиндәки аваданлыглары сындырыб.
Ҝәнҹәдә ејни маддәјлә тәгсирләндирилән Елшән адлы (сојадыны дәгигләшдирә билмәдик-мүәл.) даһа бир диндарын да мәһкәмә гаршысына чыхарылаҹағы ҝөзләнилир.
Өтән илин сонларында орта мәктәбләрдә баш өртүјүнә гадаға гојуландан сонра диндарлар бир нечә дәфә буна етираз аксијасы кечирибләр. Бу илин јанварында һиҹаб гадағасына сәрт етираз билдирән Азәрбајҹан Ислам Партијасынын сәдри Мөвсүм Сәмәдов вә партијанын бир нечә үзвү, о ҹүмләдән Ислам Партијасынын бәзи рајон тәшкилатларынын сәдрләри һәбс олунублар.
Диггәт: Хәбәрдән истифадә етдикдә мәнбәјә истинад лазымдыр
