Әһли Бејт -АБНА- хәбәр аҝентлијинин вердији хәбәрә әсасән: Азәрбајҹанда партија лидери Лалә Шөвкәт билдириб ки, глобаллашан, бүтөвләшән, демократикләшән, балаҹалашан дүнјада азадлыг вә инсан һүгугларынын приоритети данылмаз фактордур: “Амма тәәссүф ки, мүсәлман өлкәләринин әксәријјәтиндә халглар диктатура, Макс Веберин термини илә десәк, “патримониал султанлыг” режимләриндән әзијјәт чәкир. Онлар диктатура режимләриндән безмиш вә әзилмиш халглардыр. Бу режимләрин башында дуранлар сырф өз шәхси мәнафеләринә ҝөрә милјонларла халгы гурбан верирләр, бүтүн инсанлары көлә сүрүсүнә чевирирләр.
Бу тиран-диктаторлар нә реформатор, нә консерваторлардыр. Бунлар деградаторлардыр! Өз халгыны рәзил вәзијјәтинә салан, орта әсирләрә сүрәкләјиб дүнја инкишафындан кәнара атан һакимијјәт сәрхошлары вә һәрисләридирләр.
Лакин индики ачыг дүнјада инсанлара зүлм едән, онларын инкишафына әјләҹ олан, онларын ганыны ичән режимләрин сүгуту гачылмаздыр. Тунисдә башлајан ојаныш, әдаләт вә азадлыг уғрунда ингилаб јахын мүсәлман өлкәләриндә һәрәкәтвериҹи гүввәјә чеврилди. Узун илләрлә басылмыш етираз енержи өзүнү бүрузә верди. Бу ҝүн Мисирдә ҝедән просесләр бу ојанышын мәнтиги давамыдыр. Артыг Јәмәндә вә Иорданијада да етираз аксијалары вүсәт алмагдадыр.
Бу халгларын үсјанларындан тәшвишә дүшән гоншу өлкәләр просеси өнләмәк үчүн инсанлара пул вә әрзаг пајлајырлар. Күвејтдә әһалијә 4 милјарддан чох доллар пајланыб, 19 ај әрзаг пулсуз вериләҹәк. Ливија диктатору Мүәммәр Гәззафи дә бу мәгсәдлә 20 милјард доллардан чох хәрҹләмәјә нәзәрдә тутур. Лакин әдаләт вә азадлыг уғрунда мүбаризәнин јени далғасыны тәкҹә пулла вә әрзагла дурдурмаг мүмкүн олмајаҹаг.
Бу ҝүн дүнја иҹтимаијјәтинә илләрлә тәлгин едилән миф, ҝуја мүсәлман өлкәләриндә әсас мүхалифәт гүввәләри радикал исламчылардыр дармадағын олду. Күчәләрдә етираз едән јүз минләрлә инсанлар тәһсилли ҝәнҹ нәсилдир. Онлар демократија вә азадлыг истәјирләр. Онлар диктатурадан, коррупсијадан, мәмур өзбашыналығындан, сосиал әдаләтсизликдән, ишсизликдән, сәфаләтдән, зоракылыгдан безибләр, бу режимләрә “Јох” дејирләр. Металын да бир дојма һәдди олдуғу кими ҹәмијјәтин дә дојма һәдди вар, вә буну һеч ким унутмасын. Ел ҝүҹү сел ҝүҹүдүр. Ојаныш варса онун гаршысыны һеч ким ала билмәјәҹәк. Бурада јалныз заман мәсәләси вар.
Узун илләрдир дүнја иҹтимаијјәтинә һәм дә икинҹи миф тәлгин олурду ки, бу диктаторлар сабитлији горујуб сахлајыр, екстремизмин габағыны алырлар. Лакин полис ҝүҹүнә, азадлығы вә етиразлары боғмагла јарадылмыш сабитлик һеч вахт узунмүддәтли ола билмәз. Бу стагнасијадыр, сабитлик дејил вә тарихлә ојуна ҝирән диктаторлары тарих өзү чыхдаш едир.
Ислам өлкәләринин халглары даһа бу тиранлара, диктаторлара, онларын таланчылығына, өзбашыналығына, зоракылығына дөзмәк истәмир, “Јетәр!” дејир. ХХЫ әсрдә Калигула вә Нерон сајағы тиранлара јер јохдур. Ҝеҹикмишик, амма һеч олмамагданса, гој ҝеҹ олсун. Бу режимләр ХХЫ әср бәшәријјәтинин вәбасыдыр. Бу хәстәлијин симптомлары, хүсусијјәтләри вә агибәтләри ејнидир. Она ҝөрә диктаторлар бир биринә о гәдәр охшардырлар, доғмадырлар, ејнидирләр. Бу горхулу хәстәлијә гаршы мүбаризәни дүнја иҹтимаијјәти бирҝә апармалыдыр. Бурада Гәрб өлкәләринин бәзи һакимијјәт нүмајәндәләри кими диктаторлары “дүшмәнләрә” вә “достлара” бөлмәк јерсиздир. Белә бир јанашма артыг ҝеосијасәт дејил, әҹаиб ҝеопсихолоҝијадыр. Вәба вәбадыр, бунун јахшысы, писи олмур. Диктаторлар онсуз да һеч вахт әбәди ола билмәјәҹәкләр, она ҝөрә ки, әсас дајаг – халгын етибарындан мәһрумдурлар.
Бир миф дә дүнјада ҝениш јајылыб ки, мүсәлман халглары, онларын менталитети, ислам мәдәнијјәти демократија ујғун дејил. Кимәсә бу миф чох лазымдыр. Лакин бунун әксини Түркијәнин парлаг нүмунәсиндә ҝөрдүк. Бу ҝүн Түркијә демократик, инкишаф етмиш өлкәдир. Ислам мәдәнијјәтинә ҝәлинҹә исә һәлә ВЫЫ јүзилликдә Хәлифә Өмәрин вәзифәјә гојан шәхсләр үчүн тәлиматы вар иди: “Билин ки, сизи халга зүлм етмәниз үчүн тәјин етмәдим. Сизи нүмунә олараг ҝөндәрдим”. Беләликлә, диктаторларын нә миллијјәти, нә дини вар. Бунларын әсас гајәси шәхси мараглардыр, тамаһ, аҹҝөзлүк, дојмаг билмәјән булимија хәстәлијидир. Бу шәхси мараглар наминә онлар өз халгынын ганыны ичиб гурбан верирләр.
Македонијалы Исҝәндәр өз мүәллими Аристотелә вахты илә суал вермишди: “Шәрг һөкмдарларынын һансы хүсусијјәтләри вар?” Аристотел ҹаваб вермишди ки, “онлар өз кефләринин гулудурлар”. Бу ҝүн дә диктаторлар өз кефләринин гулу олараг милләтләри дә өз кефләринин гулуна чевирирләр, онлары пассив ҝеносидә мәруз гојурлар. Бунлара "Дур!" демәк вахтыдыр.
Бу месажлары Азәрбајҹан һакимијјәти дә ешитмәлидир. Бу минвалла узаға ҝедә билмәјәҹәксиниз. Ајылын! Көклү ислаһатлара кечин, тотал коррупсијаја гаршы реал мүбаризә апарын, инсан һүгугларына һөрмәтлә јанашын, демократија үчүн, милләтин инкишафы үчүн јол ачын!
Мисирдә артыг ган төкүлдү. Һакимијјәт һәрислијиндән кор олмуш диктатор Мүбарәк милләтин ганыны төкдү. Динҹ нүмајишчиләрин арасында өләнләрин сајы артыг јүздән чохдур. Бу ганы нә халг, нә тарих һеч вахт она бағышламајаҹаг. Бу ҝүн мән вә лидер олдуғум Либерал Партија демократик гүввәләрин нүмајәндәси олараг Мисир халгыны вә диҝәр мүсәлман өлкәләриндә әдаләт вә демократија уғрунда мүбаризә едән инсанлары бүтөвлүклә дәстәкләјир вә диктатуралара “Јох” дејирик! Аллаһ көмәјимиз олсун”.
Диггәт: Хәбәрдән истифадә етдикдә мәнбәјә истинад лазымдыр
