Әһли Бејт -АБНА- хәбәр аҝентлијинин вердији хәбәрә әсасән: Атәшкәс елан олунан ҝүндән бу ҝүнә кими сон заманлар Азәрбајҹан ордусунда өлүм һаллары ади һал алыб. Демәк олар ки, һәр ҝүн бир әсәҝирмиз дүнјасыны дәјишир. Гејд едәк ки, өлүм һаллары мүхтәлиф сәбәбләр үзүндән баш верир. Буна сәбәб кими әсасән дүшмән ордусунун ҝүлләси, хәстәликләр вә интиһар һалллары ҝөстәрилир. Бәзи вахтлар исә өлүм һаллары мүәаммалы галыр. Бу һаггда мүхтәлиф мәлуматлар јајылыр. Мәлуматын мүхтәлифлијинә сәбәб исә өлән әсҝәрин аиләсиндән верилән мәлуматла, Мүдафиә Назирлијиндән верилән мәлуматын ујғунсузлуғу олур. Елә бу сәбәдән дә өлкәдә орду илә халг арасындаучурум јараныр вә вәтәндашлар һәрбидән јајынмаға башлајырлар.
2010-ҹу ил октјабрын 15-дә Бинәгәди һәрби комиссарлығындан һәгиги һәрби хидмәтә чағырылмыш вә 2011-ҹи ил јанвар ајынын 6-да өлүм хәбәри ҝәлмиш Газах Рајон “Н” сајлы һәрби һиссәнин әсҝәри Сәфәров Нурлан Ваһид оғлунун башына ҝәләнләр дә һәлә ҝениш мүзакирә мөвзусу олаҹаг. Бу барәдә интер сајтларында мәлумат ҝетдикдән сонра, мәһрумун евиндә олдуг вә онун аиләсинин һадисә илә бағлы мүнасибәтини өјрәндик.
Мүхбиримиз мәрһум Сәфәров Нурланын евиндә оларкән, аилә үзвләри өвладларынын һәрби хидмәтдә олдуғу мүддәтдә өлдүрүлдүјүнү билдирди. Өвладынын өлүмү һаггда данышан әсҝәр атасы Сәфәров Телман, мәтбуатда Мүдафиә Назирлији тәрәфиндән өвладынын өлүмү илә әлагәдар јајылмыш хәбәрләрин һамысыны тәкзиб етди. “Мәним оғлумун үзүнү асараг интиһат етдији билдирилир. Бу тамамилә јаландыр. Мәним өвладым ишҝәнҹә илә өлдүрүлүб. Јанвар ајынын 4-ү танымадығым телефон нөмрәсиндән евә зәнҝ олунду. Зәнҝ елијән шәхс Нурлан һаггында марагланмағымызы истәди. Сонрадан биз һәмин нөмрә илә нә гәдәр әлагә сахладыгса бизә ҹаваб верилмәди. Даһа сонра бөлүк командири олан капитан Мааариф Сүлејмановла әлагә сахладыг. О, бизә өвладымызын һәрби һиссәдән гачдығыны билдирди. Буну ешидән кими Бакынын һәрби полисинә вә саһә мүвәккилинә хәбәр вердим. Сәһәр тездән һәрби һиссәјә ҝетдик. Һәрби һиссәдә өвладымын хидмәт етдији Мүһәндис Истеһкан Бөлүјүнүн бөлүк командири Маариф Сүлејмановла ҝөрүшдүк. О, бизи ҝөрән кими башлады бизи борҹлу чыхармағы. Белә бир өвлады тәрбијә етдијимизә ҝөрә бизи аҹылыјан командир, өвладымызын һәрби һиссәдән гачдығыны билдирди. Һәтта о, оғлумун анасына “Гој оғлун ҝәлсин онун анасыны ағладаҹам дејә” тәһгир етди”-дејә Сәфәров Телман билдириб..
Бундан һадисә илә әлагәдар һәрби һиссә командири илә әлагә сахладығыны сөјләјән әсҝәрин атасы, “Биз һәмин ҝүн һәрби һиссә командири Елшад Исмајиловун да гәбулунда олдуг. О, да бизә өвладымызын һәрби һиссәдән гачдығыны билдирди. Онуда дејим ки, биз һәрби һиссәдә олдуғумуз мүддәтдә бөлүк командири Мааариф Сүлејманов биздән һеч јерә хәбәр еләмәмијимизи истәди вә өзүнүн бүтүн аидијјаты органлара хәбәр етдијини билдирди. Сонра бизә өвладымын палтарларыны ҝәтирдиләр. Бизә Нурланын һәрби һиссәнин авто паркында ишләјәркән јоха чыхдығыны билдирдиләр. Бундан сонра биз паркын һәр јеринә бахдыг. Өвладымдан һеч бир әсәр-әламәт јох иди. Сонра Газах рајон Һәрби Полис рәиси Самир мүәллимин гәбулунда олдуг. О, бизә һадисәдән хәбәрдар олмадығыны билдирди. Һалбуки, һәрби һиссәдән бүтүн аидијјаты органларын мәлуматландырылдығы билдирилмишди. Сонра биз јанвар ајынын 9-у Бакыја гајытдыг. Ајын 10 ону Мүдафиә Назирлијинә оғлумуз һаггында мәлумат вердик. Ахсам саат 6-да өвладымын өлүм хәбәри ҝәлди. Нурланын авто паркда өзүнү асараг интиһар етдији билдирилирди. Һалбуки, мән авто паркда олан мүддәтдә ахтармадығым јер галмамышды. Орада өвладымдан һеч бир әламәт јох иди. Өвладымын ҹәназәсини ҝәтирәндә табуту ачмаға гојмурдулар. Бизә Газах рајонунда оғлумуза гүсл кәфән верилдији билдирилирди. Тәкидимиздән сонра табут ачылды. Гүсл верилмиш өвладымын әлләри вә ајаглары мазут ичиндә иди. Јенидән гүсл вә кәфән олундугдан сонра, Нурланы дәфн еләдик. Мәним бир ата олараг аидијјаты органлардан истәјим будур ки, өвладымын һәгиг өлүмү сәбәбини арашдырсынлар. Мән өвладымы таныјырам о, өзүнә һеч вахт интиһар етмәзди. Мүтләгдир ки, онун өлүмү башга сәбәбдән баш вериб. Әҝәр о, өзүнү авто паркда асыбса бәс биз орда олдуғумуз мүддәтдә нијә ону асылмыш ҹәназәсини ҝөрмәдик”-дејә әлавә едиб.
Хатырладаг ки, бундан сонра өвладыны итирән әсҝәр анасы Сәфәрова Әсмә һадисә һаггында бунлары деди: “Декабр ајынын 30-у өвладым мәнимлә данышмышды. Бизим бајрамымызы тәбрик еләди. Индијә гәдәр олдуғу јердән һеч вахт шикајәт етмәмишди. О, 3 ај тәлим таборунда сүрүҹүлүк курсуну охудугдан сонра, һәрби һиссәнин Мүһәндис Истеһкам бөлүјүнә сүрүҹү ҝөндәрилди. Нә һадисә баш верибсә һәмин бөлүјә ҝәләндән сонра, баш вериб. Биз баш вермиш һадисәни Нурланын Тәлим Таборундакы командиринә дедикдә, о, Нурланын һеч вахт белә бир иш ҝөрмәјҹәҹјини билдирди. Мәним өвладым 5 ҝүн иди ки, Истеһкам бөлүјүнә ҝәлмишди. Нә баш верибсә һәмин 5 ҝүн әрзиндә баш вериб”.
Бундан сонра үзүнү бүтүн иҹтимаијјәт вә аидијјаты органлара тутан әсҝәр анасы, өвладлары бу ҹүр тәзјигә мәруз галан аналары она дәстәк вермәјә чағырды вә баш вермиш һадисәнин дүзҝүн арашдырылмасыны вә өвладынын һәгиги гатилинин тапылмасыны истәди.
Диггәт: Хәбәрдән истифадә етдикдә мәнбәјә истинад лазымдыр
