Артыг шәкк-шүбһә галмады, Азәрбајҹанын тәһсил системинә, дини сфераја мәсул дөвләт органларына гаты атеистләр, динсиз-имансызлар рәһбәрлик едирмиш. Совет-атеист дөврүнүн мәмурлары онлара әмәлли-башлы һәсәд апара биләр. Адам һәрдән чашыб галыр ки, бәлкә һеч ССРИ чөкмәјиб. Чөкүбсә, онда инанҹлы кәсимә, һиҹаба, азана, Гурана гаршы дөвләт сәвијјәсиндә давам едән һәгарәт, бајрағымызын јашыл рәмзинә гаршы бунҹа дөзүмсүзлүк нәјлә бағлыдыр?
Бакы Тәһсил Идарәсинин рәис мүавини Мәһәммәд Бајрамов дејир ки, һиҹаб гадағасы үзүндән өвладларыны мәктәбә гојмајан нардаранлылары дөвләтчилијимиз марагландырмыр. Әсл мәһкәмә перспективи олан иттиһамдыр, тәһгирдир садәҹә. Бајрағымызын јашыл рәнҝинә сајғы тәләб етмәк, ҝөрәсән, нә вахтдан дөвләтчилик әлејһинә һәрәкәт олуб, бу, нә идбар јанашмадыр белә?
Бу шәхс пајтахтда проблеми фактики битмиш сајыр. Һәрҝаһ 400-ә јахын шаҝирдин һиҹаба ҝөрә дәрсләрдән кәнарда галдығыны билдирир. Јәни әслиндә проблем гапанмајыб. Нә бу, нә дә диҝәр проблем гапанмајаҹаг та о вахтадәк ки, өлкә рәһбәрлији үзүнү имза атдығы бејнәлхалг инсан һаглары конвенсијасына, конститусијаја тутаҹаг.
Бәс дејирдиләр, һиҹаб мәктәбләрин дахили ишидир, мәсәлә тәһсил ганунуна мүвафиг олараг һәр орта мәктәбин низамнамәси илә тәнзимләнәҹәк. Јәни бир нәфәр иманлы директор тапылмады ки, низамнамәни мүсәлман кәсими гане едәҹәк шәкилдә тәртиб еләсин?! Бүтүн мәктәбләрдә баш өртүсү јасаг едиләҹәкдисә, елә ганунда јазајдыныз ки, “шаҝирдин орта мәктәбә һиҹабда ҝәлмәси јасагдыр”. Һамы да өз ишини биләјди.
Јаза билмәздиниз! Чүнки бу, гүввәдә олан конститусија бир јана, тәмәл инсан һагларына да дабан-дабана зидд оларды. Амма инди белә чыхыр ки, Азәрбајҹанда һиҹаб һәм јасагдыр, һәм дә јох. Одур ки, лүтфән, һамы олдуғу кими ҝөрүнсүн, даһа бириләри башына әммамә гојуб Гурандан, Пејғәмбәрдән моизә охумасын. Сијаси рәһбәрлик дә халгла ҝизләнгач ојунуна сон гојсун...
“Азәрбајҹанда дини етигад азадлығы там горунур, толерантлыг ҝүндән-ҝүнә мөһкәмләнир. Кимсә дининә вә әгидәсинә ҝөрә тәзјигләрә мәруз галмыр”. Бу да ел ичиндә “анти-дини комитә” кими танынан гурумун сәдри Һидајәт Оруҹовун сөзләридир. Јолдаш Оруҹов да ејни гәнаәтдәдир: өлкәдә һиҹаба гадағадан сөһбәт ҝедә билмәз. Бу бојда вур-чатласынын маһијјәти адама чатмајыбмыш. Гадағанын саггалы олур бәјәм, Һидајәт бәј?
Комитә сәдри наразылара јарлыг да јапышдырыб: “Һиҹаба етиразчыларын динлә һеч бир әлагәси јохдур. Онлар Азәрбајҹандакы демократик мүһитдән, виҹдан азадлығынын јүксәк сәвијјәдә тәмин олунмасындан суи-истифадә едәрәк өлкәмизә гаршы бәд әмәлләрлә мәшғулдур”.
Әһсән. Һиҹабы, виҹдан азадлыгларыны мүдафиә едәнләр, о ҹүмләдән “Јени Мүсават”, һүгуг мүдафиәчиләри, сијасиләр, иман адамлары, Гәрбдәки үнлү тәһсил оҹагларынын рәһбәрләри динсиз, тәхрибатчы имиш, јолдаш Оруҹов вә онун мәсләкдашлары исә әсл Аллаһ адамы!
Азәрбајҹанда дини толерантлығын фонтан вурдуғуну иддиа едән бу “Аллаһ адамларына” бирҹә суал: неҹә олур ки, Ислам Партијасынын сәдри 20 ҝүндүр тутулуб, амма өлкә боју исламчыларын евиндән һәр ҝүн (өзү дә ејни үнвандан - јардымчы тәсәррүфатлардан, јәни төвләдән, тәндирханадан) вә ејни чешиддә (!!) силаһ-сурсат тапылыр? Нә тәһәр олур ахы, мөминин өзү јас мәрасиминдә, ханымы исә төвләдә инәк сағаркән отун алтында тротил шашкаси ашкарланыр? “Тәхрибатчы” диндарларын ағлына ҝәлмәдими ки, бу гәдәр вахтда төвләләрини “абыра” салсынлар?
Ҝәлди тәбии, амма бизим шанлы полисимизин, “ҝүнаһсызлыг презумпсијасы”на түпүрән истинтагчыларымызын габилијјәтинә дә ҝәрәк кимсә шәкк еләмәсин. Онлар истәсәләр, “Капитал”ы јаздығыны да сәнин бојнуна елә гојарлар ки, руһун белә инҹимәз (мараглыдыр ки, дүнән Бакыдакы Гәрб дипломатлары Ислам Партијасынын тәмсилчиләри илә ҝөрүшүбләр).
О ки галды демократик мүһитә, Азәрбајҹанда демократија варса, онда демократик дүнјанын азадлыг тәләб етдији журналист нијә бу ҝүнәдәк һәбсдәдир, онун аиләсинә чатаҹаг тәзминат мин бәһанә илә саһибинә верилмир? Биздә демократија варса, нәдән Авропа Шурасы сијаси мәһбуслар үзрә мәрузәчиси тәјин едиб вә о өлкәјә һеч бурахылмыр да? Демократија, дүнјәвилик будуса, шаҝирдләри бојнунда хач, башында һиҹаб мәктәбә ҝәлән Гәрбдәки, Авропадакы идарәчилик системи нәдир бәс?!
“Анҹаг халгымыз ағы гарадан сечмәји јахшы баҹарыр, һәгиги диндашыны тәхрибатчыдан ајырмағы билир”. Бах, Һидајәт бәјин бу сөзләринин алтындан мәмнунијјәтлә имзамызы гојур, Аллаһ јолундан сапмышлара исә ҺИДАЈӘТ олма арзу едирик...
Заһид Сәфәроғлу
Мусават
