Әһли Бејт -АБНА- хәбәр аҝентлијинин вердији хәбәрә әсасән: Гафгаз Мүсәлманлары Идарәси јалныз ики ширкәтин мәһсулларына һаллыг зәманәти вериб. Бунлардан бири Бакы шәһәриндә фәалијјәт ҝөстәрән «САБ», икинҹиси исә Ҝәнҹә шәһәриндә фәалијјәт ҝөстәрән «Һалал Гида» ширкәтидир.
Буну ГМИ-нин мәтбуат хидмәтинин рәһбәри Рәһимә Дадашова дејиб. О билдириб ки, һәмин ширкәтләр вахтилә ГМИ-јә мүраҹиәт едәрәк «Һалал» зәманәтинин алынмасыны хаһиш едибләр: «ГМИ тәрәфиндән јарадылмыш комиссија һәмин ширкәтләрдә просеси изләјәрәк јохламалар апарыб. Онларын һалал әтдән истифадә етмәсинә вә дини бахымдан лазыми әмәлләри јетирдијинә әмин олдугдан сонра ГМИ-нин комиссијасы бу зәманәти вериб. ГМИ јалныз бу ики ширкәтин мәһсулларында донуз пијинин ишләдилмәмәсинә зәманәт верир. Ҝуја донуз әти олмадан әт мәһсулларынын стандарта ҹаваб вермәмәси барәдә дејиләнләрлә бағлы исә бир мәгамы гејд етмәк истәјирик: биз о колбасаларда донуз пијинин дејил, онун әвәзедиҹиси олараг тојуг дәриси вә дәниз јосунларындан һазырланмыш компонентләрдән истифадә олунмасы барәдә мәлуматлыјыг. Бу мәсәләләрлә бағлы ГМИ-нин комиссијасы вахташыры олараг ики ширкәтдә нәзарәт фәалијјәти һәјата кечирир. Биз әмин олдуғумуз үчүн һәмин ширкәтләрин мәһсулларына зәманәт вермишик. Бизә башга ширкәтләр дә һалал зәманәти верилмәси үчүн мүраҹиәт едиб. Лакин дедијим кими биз јалныз ики ширкәтин мәһсуллары үчүн белә зәманәт веририк. Бәри башдан ону да гејд едим ки, һалаллыг мәсәләси дини мәсәлә олдуғу үчүн зәманәтин мәһз дини гурум тәрәфиндән верилмәси һеч ким тәрәфиндән гәрибә гаршыланмамалыдыр».
Диггәт: Хәбәрдән истифадә етдикдә мәнбәјә истинад лазымдыр
