Азәрбајҹанда һиҹаб гадағасы, иҹтимаи вәзијәт вә диҝәр мәсәләләрлә бағлы Ислам-Азери.аз Интернет гәзети өлкәнин танынмыш руһаниси Һаҹы Зүлфүгар Микајылзадәдән мүсаһибә алыб.
Мүсаһибәни диггәтинизә чатдырырыг:
Һаҹы һазырда һиҹабла бағлы мәсәләләр нә јердәдир? Һансы ишләр ҝөрүлүр?
- Һиҹабын гадағасына сон гојмаг үчүн һазырда ишләр ҝедир. Бу истигамәтдә мүһүм аддымлар атылыб. Бунунла бағлы етиразлар едилиб, имзалар топланыр, мүраҹиәтләр олуб. Лакин буна бахмајараг тәәссүфләр олсун ки, һиҹаб гадағасы арадан галдырылмајыб. Јәһудиләрә исә ҝөрүрүк, Азәрбајҹанда хүсуси имтијазлар верирләр. Бу имтијазлар онларын мәктәбләриндә ачыг-ашкар ҝөрүнүр. Биз буна етираз едирик, ајрысечкилијә сон гојулмасыны тәләб едирик. Ҝәлән һәфтәнин чәршәнбә ҝүнү чох сајда диндар ГМИ сәдринә мүраҹиәт етмәк үчүн ҝүнорта намазында орада олаҹаглар. Намаздан сонра исә һиҹаб гадағасынын арадан галдырылмасы үчүн шејхә мүраҹиәт едиләҹәк.
Билдијиниз кими, Азәрбајҹан Ислам Партијасынын сәдри дүнән һәбс едилмишдир. Бунунла бағлы нә дејә биләрсиниз?
- Һаҹы Мөвсүм гардашымызы бир партија сәдриндән өнҹә биз әзиз руһани алим кими таныјырг. Онун һиҹабла бағлы мәнтигли аддымлары бәзиләрини нараһат едир. Лакин биз бир даһа дејирик, бу һәбсләри писләјирик вә она гаршы тәзјигләр олаҹағы тәгдирдә биз отурмајаҹағыг. Истәр руһаниләр, истәрсә дә диндарлар ону мүдафиә едәҹәкләр. Ону тәк билмәсинләр!
Һиҹаб гадағасына дүнјанын бир чох јериндә етиразлар едилди. Түркијә, Канада, Ираг, Русија, Украјна вә Иран Ислам Республикасы кими. Азәрбајҹандан бир груп диндар Иранда јашајан Ислам алимләри вә мәраҹеи тәглид мүҹтеһидләри олан Ајәтуллаһ Һәмәдани вә Ајәтуллаһ Ширазијә һиҹаб гадағасы илә бағлы суал үнванладылар вә онлар да шәри мәсәләни ачыгладылар. Лакин тәәссүфләр олсун ки, бәзиләри алимләрин бу ачыгламаларыны һәдәфә алдылар. Бәзиләри тәһгирләр дә етдиләр. Буна мүнасибәтинизи билмәк истәрдик.
- Мәнтигсиз шәхсләр адәтән тәһгирләрә әл атырлар. Биз онлары һәгарәт әһли кими таныјырыг. Онлар јахшы билирләр ки, тарихләр боју бизим мәраҹеи тәглид мүҹтеһидләримиз адәтән бүтүн мүсәлманлар үчүн фәтва верибләр, инди дә беләдир. Бизим алимләримиз Нәҹәфдән, Гумдан һәмишә мүсәлманларын сәсинә сәс верибләр. Бунун әлејһинә чыханлар хариҹдән идарә олунурлар.
Сизин бу јахынларда хариҹи сәфәрләриниз олду. Орада јашајан истәр сојдашларымыз, истәрсә дә иҹтимаи-сијаси хадимләрлә ҝөрүшдүнүз. Бу һагда нә дејә биләрсиниз?
- Мәсҹидләрин сөкүлмәси, һиҹаб гадағасындан әввәл мөминләр бу дәрәҹәдә иҹтимаи вә сијаси аддымлар атмырдылар. Лакин бу гадағалары ортаја атанлар инди Исламчылары сијаси-иҹтимаи сәһнәјә чағырырлар. Мүсәлманлар артыг әввәлки илләрдән даһа чох фәалдырлар. Түркијә вә Русијада мүсәлманларын бу мәсәләни ҹидди изләмәси вә хариҹдән дәстәк вермәсинин шаһиди олдуг. Онлар бизә билдирирдиләр ки, биз дә сонуна гәдәр һиҹабы мүдафиә едәнләрләјик.
Бәзи мәмурлар һиҹаб гадағасы мәсәләсиндә ҝери аддым атмајаҹагларыны билдирирләр. Сиз бу шәхсләрә нә дејәрдиниз?
- Онлар президент дејәндән сонра бу сөзләрини унудаҹаглар. Анҹаг сон олараг буну демәк истәјирәм ки, биз һиҹаб гадағасыны гәбул етмәјәҹәјик. Биз һиҹаб мәсәләсиндә ҝери аддым атмајаҹағыг. Белә дүшүнмәсинләр ки, бизи һәбсләрлә вә ја шәһид етмәклә горхудаҹаглар. Бизләр һиҹаб гадағасынын ләғв едилмәсинә кими һаггымызы тәләб едәҹәјик.
