Ајәтуллаһ Һүсејни Гәзвининин телевизијада Абдуллаһ ибн Сәба барәдә мүсаһибсәи:
Өнҹә мүгәддимә олараг бир нечә мәгама тохунмаг истәјирәм:
Сөн ики-үч һәфтәдә тамашачылар Салам телевизија каналына телефон, електрон почту, месаж вә диҝәр васитәләрлә чохлу сајда суаллар үнванлајыблар. Бәзиләри гејри-әхлаги телевизија каналларында Гуран вә Исламы мүдафиә ады алтында шиә мәзһәби, Әһли-бејт (ә) мәзһәби әлејһинә чыхышлар едирләр. Бу бир чох тамашачынын нараһатлығына, инҹик дүшмәсинә сәбәб олур. Бәзән һәмин телеканаллара зәнҝ едир, бәзи һалларда дүзҝүн олмајан ифадәләр ишләдирләр.
Мән бурадан бүтүн шиәләрин, хүсусилә ҝәнҹ нәслин әлини өпүр вә онлардан хаһиш едирәм ки, бу гараҝүруһчулара гаршы сәбирли олсунлар. Гој, онлар Шиә, Әһли-бејт (ә) мәзһәбинә гаршы сөјүшләр, дини лидерләримизә гаршы тәһгирләр јағдырсынлар. Бу, онларын өз дахили аләмини ортаја гојур.
Онлар бизим дини лидерләримизә, имамларымыза (ә), мәзһәбимизә, зијарәтҝаһларымыза сөјүш, тәһгир, алчалдыҹы сөзләр јағдырмагла Шиә мәдәнијјәтинә ән јахшы шәкилдә хидмәт едирләр. Чүнки бу ҝүн бүтүн тамашачылар истәр шиә, истәрсә дә сүнни јүксәк мәдәнијјәт саһибидирләр. Бу, ҝөстәрир ки, онларын әлиндә һәр һансы бир туталы дәлил, сүбут јохдур. Демәјә сөзү, ҝөстәрмәјә дәлили оланлар һеч бир заман сөјүшә, тәһгирә әл атмырлар. Онлар бизә минләрләр сөјүш сөјләсәләр белә биз һеч бир һалда онлара ҹаваб олараг бир сөјүшә, налајиг сөзә белә јол вермәјәҹәјик.
Фикиримҹә, гојун, ҝәнҹләримиз бу програмлары изләсинләр. Шиәлијә бу шәкилдә һүҹум едәнләр, Шиә мәдәнијјәтини ләкәләмәк истәјәнләр, нәзакәтсиз, кобуд ифадәләрлә чыхыш едәнләр тәрбијә олундуглары тәфәккүрүн, ҹәрәјанын сәвијјәсини нүмајиш етдирирләр. Биз дә онлар кими давранарсаг, тәбии ки, бунун зијаны өзүмүзә дәјәр.
Мараглы бурасыдыр ки, сөзүҝедән телевизија каналларында бир шәхс "Гураны мүдафи вә Гурана дәвәт" ады илә јајымланан програмда Шиә мәзһәбиндә мөвҹүд тәвәссүл тәфәккүрүнә ирад тутмаг вә Гуранын бу мәсәләјә бахышыны ачыгламаг мәгсәди илә "Маидә" сурәсинин 117-ҹи ајәсини охуду. Ајәдә һәзрәт Исанын (ә) дилиндән дејилир:
“Мән онлара јалныз Сәнин мәнә етдијин әмри чатдырыб белә демишәм: “Мәним дә, сизин дә Рәббиниз олан Аллаһа ибадәт един!” Нә гәдәр ки, онларын арасында идим, онлара шаһид мән идим. Сән мәни (дәрҝаһына) гәбул етдикдән сонра онлара нәзарәтчи Өзүн олдун. Јалныз Сән һәр шејә шаһидсән!”
О, ајәни изаһ едәркән Гурана там зидд олан он ачыглама верди. Һалбуки, Гуран ачыгҹа бујурур ки, һәзрәт Иса (ә) өлмәмишдир.
(Онларын ләнәтә дүчар олмаларынын бир сәбәби дә: ) ”Биз, Аллаһын елчиси Мәрјәм оғлу Иса әл-Мәсиһи өлдүрдүк”, - демәләридир. Һалбуки онлар Исаны нә өлдүрдүләр, нә дә чармыха чәкдиләр. Онларда јалныз белә бир тәсәввүр јаранды. Бу һаглы ихтилафда оланлар онун (шәхсән өлдүрүлмәси) барәсиндә, әлбәттә, шәкк-шүбһә ичәрисиндәдирләр. Онларын буна даир һеч бир мәлуматы јохдур. Онлар анҹаг зәннә гапылырлар. Һәгигәтдә ону (Исаны) өлдүрмәмишдиләр. ("Ниса", 157).
(Ја Рәсулум!) Хатырла ки, о заман (гијамәт ҝүнү) Аллаһ белә бујураҹаг: “Ја Мәрјәм оғлу Иса! Сәнми инсанлара: “Аллаһла јанашы, мәни вә анамы да өзүнүзә танры билин!” – демишдин? “(Иса ҹавабында) дејәҹәк:” Сән пак вә мүгәддәссән! Һаггым чатмајан бир шеји демәк мәнә јарашмаз. Әҝәр буну мән демиш олсајдым, Сән ону мүтләг биләрдин. Сән мәним үрәјимдә олан һәр шеји билирсән, мән исә Сәнин затындан ола билмәрәм. Шүбһәсиз ки, гејбләри билән анҹаг Сәнсән! ("Маидә", 116).
Һәр һалда бу шәхсләр тарих, ҹоғрафија, физика, сијасәт вә с. ихтисасларынын ардынҹа ҝетсәләр, о саһәдә тәдгигат апарсалар, Шиә мәдәнијјәтини белә намәрдҹәсинә, наданҹасына ләкәләмәкдән, тәһгирләр јағдырмагдан даһа јахшыдыр.
Мән онларын әсассыз сөзләринә ҹаваб вермәк фикриндә дејиләм. Лакин тамашачыларын чохсајлы зәнҝләрини, ефирә ҝедән бәзи чыхышлара ҹаваб тәләбләрини нәзәрә алыб бәзи мәсәләләрә ајдынлыг ҝәтирмәк истәјирәм.
Иншаллаһ, вахт галдығы тәгдирдә нөвбәти верлишләримиздә бу мәсәләләри ҹанлы телефон бағлантылары васитәси илә тамашачыларла даһа јахындан мүзакирә едәҹәјик.
Апарыҹы (Јасини):
Абдуллаһ ибн Сәба ады јәгин ки, һамыја танышдыр. Вәһһабиләр Шиәлик әлејһинә шүбһә тохумлары сәпир вә ону Абдуллаһ ибн Сәбанын ады илә бағлајырлар. Зәһмәт олмаса, бу һагда ачыглама верәрдиниз. Бу һәгигәтдир, јохса әфсанә?
Устад Һүсејни Гәзвини:
Әсрләрдән бәри Шиә мәзһәбинә гаршы ирәли сүрүлән ирадлардан бири онун тәсисчисинин Абдуллаһ ибн Сәба адлы бир јәһуди олмасыдыр. Бу фикри Ибн Тејмијјә, ондан сонра Дәһләви, Еһсан Илаһи Зүһејр, инди дә Сәудијјә Әрәбистанынын Доктор Гиффари вә с. университет мүәллимләри ирәли сүрмүшләр. Бу ҝүнләрдә, хүсусилә сон ики-үч ајда вәһһаби телеканалларында бу фикрин даһа чох габардылдығыны ҝөрүрәм. Мән бурада вәһһаби мәзһәбинин гуруҹуларынын, нәзәријјәчиләринин фикирләрини тамашычлар үчүн охујурам. Гој билсинләр ки, онлар Гурандан гајнагланан, әсл Пејғәмбәр (с) маарифинә там ујғун олан Әһли-бејт (ә) мәзһәбини, Шиә тәфәккүрүн ләкәләмәк, она зәрбә вурмаг үчүн неҹә әл-ајаға дүшмүш, әсассыз данышмыш, һәтта өзләри белә зиддијјәтли дүшүнҹәләри арасында долашыға дүшмүшләр. Ҝөрүн, вәһһабилијин идеологу Ибн Тејмијјә "Мәҹму әл-фәтава" әсәриндә нә јазыр:
"Шиә мәзһәбинин көкү Абдуллаһ ибн Сәба адлы динсизә, мүнафигә ҝедиб чыхыр. О, Әли (ә) һаггында мүбалиғә етмиш вә демишдир: "Әли (ә) имамдыр. Пејғәмбәр (с) дә ону хәлифә тәјин етмишдир". О, Әлинин (ә) мәсум олдуғуну иддиа етмишдир" (Ибн Тејмијјә, "Мәҹму әл-фәтава", ҹ. 4, сәһ. 435).
О, диҝәр китабларында да бу мәсәләјә тохунур. Мараглыдыр ки, бир чох ҝәнҹләр, бәзи мөвләвиләр, мамустлар вәһһабилији әһли-сүннәнин бир һиссәси һесаб едиб онлара бөјүк төһфәләр вердијини дүшүнүрләр. Дахилдә вә ја өлкә хариҹиндә шиәләрлә бирҝә һәјат сүрән, шиәләри јахындан таныјан әзизләримиз билсинләр ки, вәһһабилијин идеолог вә нәзәријјәчиси Шиәлик һаггында нә дејир:
"Әлинин (ә) мәсумлуғуну илк олараг сөјләјән, онун Пејғәмбәр (с) тәрәфиндән хәлифә тәјин олундуғуну вә буна мүгәддәс мәтнләрдән сүбутлар олмасыны илк иддиа едән мүнафигләрин башында дуран Абдуллаһ ибн Сәба олмушдур. О, өзүнү мүсәлман кими ҝөстәрирди, мәгсәди исә Ислам динини мәһв етмәк иди. Неҹә ки, јәһуди Булс христианлығы мәһв етмәк үчүн христиан олду вә Христиан дининдә көклү дәјишикликләр апарды".
О, дејир:
"Шиәләр Абдуллаһ ибн Сәбанын ардыҹылларыдырлар".
"Шиәләр ҹүмә вә ҹамаат намазы гылмырлар".
