Әһли Бејт -АБНА- хәбәр аҝентлијинин вердији хәбәрә әсасән: «Азсаманд» ширкәтинин президенти Ҹәзми Гаја билдириб ки, 2010-ҹу илин әввәлиндән индијәдәк заводда автомобил бурахылмајыб. Истеһсалын дајанмасына сәбәб Ирандан автомобил һиссәләринин алынмамасы олуб. Һазырда ширкәт јалныз индијәдәк бурахылмыш автомобилләрин тәмири вә сервиси илә мәшғулдур. Сатышын дајанмасы исә индијәдәк бурахылмыш бүтүн машынларын сатылыб гуртармасы илә нәтиҹәләниб. Заводун фәалијјәтә башладығы вахтдан индијәдәк истеһсал олунан 1500-дән артыг автомобилин һамысы сатылыб. Ширкәт 2009-ҹу илдә тәгрибән 300, 2008-ҹи илдә 500 автомобил сатыб.
Өлкәдә «Азсаманд»лара тәләбатын бөјүк олдуғуну дејән Ҹ.Гаја заводда јени модел автомобилләрин бурахылмасына һазырлыг ҝетдијини билдирди. Јени илдән заводда «Иран Һодро» ширкәтинин бурахдығы «Сорен» автомобилләринин истеһсалына башланаҹаг. Инди «Азсаманд»ын нүмајәндәләри бу мәсәлә илә бағлы Иранда данышыглар апарырлар.
Јени моделин гијмәти дә фәргли олаҹаг. Индијәдәк бурахылан автомобилләрин гијмәти нағд 15 500 АБШ долларына вә мүхтәлиф мүддәтләрә кредитлә сатылыб. Јени «Сорен» автомобилләри исә нағд 12 мин маната вә ја 3 иллик кредитлә 15 мин маната сатылаҹаг.
Хатырладаг ки, Азәрбајҹанда «Азсаманд» автомобилләринин истеһсалына 2005-ҹи илдән башланыб. Иран тәрәфилә әлдә олунмуш разылыға әсасән, автомобилләрин еһтијат һиссәләри бүтүнлүклә Ирандан ҝәтирилир вә Шамахы Автомобил Заводунда монтаж олунур.
Диггәт: Хәбәрдән истифадә етдикдә мәнбәјә истинад лазымдыр
