Әһли Бејт -АБНА- хәбәр аҝентлијинин вердији хәбәрә әсасән: Ағыр Ҹинајәтләрә Даир Ишләр Үзрә Азәрбајҹан Республикасы Мәһкәмәсинин 17 апрел 2006-ҹы ил тарихли һөкмү илә “Ҹамаат әл-Муваһһидун” тәшкилатынын үзвләри Азәрбајҹан Ҹинајәт Мәҹәлләсинин мүвафиг маддәләри илә 9 илдән 15 иләдәк азадлыгдан мәһрум етмә ҹәзасына мәһкум едилибләр. Һәмин дөврдә истинтагла мүәјјән едилиб ки, һәлә 2004-ҹү ил мај ајынын сонларында Илкин Исмајылов вә радикал дини бахышлары илә сечилән һәмфикирләри - истинтага мәлум олмајан Јусиф адлы шәхс, Елчин Ҹәфәров, Рәшид Әлијев, Рауф Достујев габагҹадан әлбир олуб ҹинајәт әлагәсинә ҝирәрәк сонунҹунун тәклифи илә онун “кафир” һесаб етдији дајысы Гулијев Назир Сары оғлунун евинә басгын едиб шәхси әмлакыны әлә кечирмәк барәдә разылыға ҝәлибләр. Онлар 2004-ҹү ил ијунун 1-дә Рауф Достујевин шәхси “Мерҹедес” маркалы автомашыны илә онун дајысынын јашадығы Сабунчу рајону, Забрат гәсәбәсиндәки евинин јанына ҝәлиб, ев саһибинин ишә ҝетдијинә әмин олдугдан сонра Рауф Достујев кешикдә дајаныб, Илкин Исмајылов, Елчин Ҹәфәров вә Јусиф адлы шәхс үзләриндә маска, Рәшид Әлијев исә маска тахмадан евә сохулублар. Онлар әлләриндә силаһ гисминдә истифадә етдикләри тапанчаја охшар предмет вә бычагларла ев саһибәси Гулијева Нуридә Әршад гызына һәјат вә сағламлығы үчүн тәһлүкәли зоракылыг ҝөстәриб, гијмәтли әшјалары вә пулу вермәјәҹәји тәгдирдә өлдүрәҹәкләри илә һәдәләјибләр. Анасынын хәсарәтләр алараг ган ичиндә олдуғуну ҝөрән 1993-ҹү ил тәвәллүдлү Сејмур Гулијев онун өлдүрүлмәмәси үчүн гијмәтли әмлакын олдуғу отағын ачарыны гулдурлара вериб. Илкин Исмајылов, Рәшид Әлијев вә Јусиф адлы шәхс һәмин отагдан ев саһиби Назир Гулијевә мәхсус 62 мин АБШ доллары мәбләғиндә пулу ҝөтүрүб һадисә јериндән гачмыш вә әлдә етдикләри мәбләғи сонрадан өз араларында бөлүбләр.
Гејд олунан фактла бағлы Бакы шәһәри Сабунчу рајон полис идарәсинин Истинтаг шөбәси тәрәфиндән Азәрбајҹан Республикасы Ҹинајәт Мәҹәлләсинин 181.3.2-ҹи (габагҹадан әлбир олан бир груп шәхс тәрәфиндән күлли мигдарда әмлак әлдә етмә мәгсәдилә гулдурлуг) маддәси илә ҹинајәт иши башланылараг ибтидаи истинтагы апарылыб. Ағыр Ҹинајәтләрә Даир Ишләр үзрә Мәһкәмәнин 28 декабр 2004-ҹү ил тарихли һөкмү илә Рауф Достујев, Елчин Ҹәфәров, Рәшид Әлијев мүхтәлиф мүддәтләрә азадлыгдан мәһрум етмә ҹәзасына мәһкум едилиб, ҹинајәтин иштиракчысы олан Јусиф адлы шәхс барәсиндә исә ҹинајәт иши ајрылараг сонрадан иҹрааты дајандырылыб.
2010-ҹу ил апрелин 5-дә МТН-ин һәјата кечирдији әмәлијјат-ахтарыш тәдбирләри нәтиҹәсиндә габагҹадан әлбир олан бир груп шәхс - Азәрбајҹан Республикасынын вәтәндашлары Тејмур Таһиров, Анар Абдуллајев вә Гәдим Гәдимов шүбһәли шәхс гисминдә сахланылыб, онлардан 1 әдәд “Ф-1”, 2 әдәд “РГД-5” типли әл гумбарасы вә онлар үчүн нәзәрдә тутулмуш 3 әдәд “УЗРГМ” типли алышдырыҹы ашкар олунараг ҝөтүрүлүб. Тејмур Таһиров, Анар Абдуллајев вә Гәдим Гәдимов тәгсирләндирилән шәхс гисминдә ҹәлб едиләрәк барәләриндә мәһкәмәнин гәрары илә һәбс гәтимкан тәдбири сечилиб. Истинтагын сонракы мәрһәләсиндә мүәјјән едилиб ки, 1 ијун 2004-ҹү ил тарихдә Гулијев Назир Сары оғлунун Бакы шәһәри, Сабунчу рајону, Забрат гәсәбәсиндә јерләшән евинә гулдурлуг етмәклә сонунҹунун 62 мин АБШ доллары мәбләғиндә пул вәсаитини таламыш групун үзвү, шәхсијјәти истинтагла арашдырылан “Јусиф”, “Гоҹа”, “Ҹанавар” вә “Намиг” ләгәбләриндән истифадә едән шәхс Тејмур Таһировдур. Бу ҹинајәтин әксәр иштиракчылары һүгуг-мүһафизә органлары тәрәфиндән ҹинајәт мәсулијјәтинә ҹәлб едилсә дә, јалныз Тејмур Таһиров истинтагдан ҝизләнәрәк ҹинајәт мәсулијјәтиндән јајына билыб. Лакин апарылан сәриштәли истинтаг һәрәкәтләри нәтиҹәсиндә ҹинајәт тәгиби ону да јахалајыб вә Тејмур Таһиров ифша олунараг мәсулијјәтә ҹәлб едилиб.
Онлар Ҹинајәт Мәҹәлләсинин 228.2.1-ҹи (габагҹадан әлбир олан бир груп шәхс тәрәфиндән ганунсуз олараг одлу силаһ, онун комплект һиссәләрини, дөјүш сурсаты, партлајыҹы маддәләр вә гурғулар әлдә етмә, башгасына вермә, сатма, сахлама, дашыма вә ҝәздирмә) маддәси илә тәгсирләндирилирләр.
Диггәт: Хәбәрдән истифадә етдикдә мәнбәјә истинад лазымдыр
