Ахунд Хорасани кими танынан Молла Һүсејн оғлу Мәһәммәд Казым гәмәри тәгвимлә 1255-ҹи илдә Мәшһәд шәһәриндә дүнјаја ҝөз ачыб. Атасы Молла Һүсејн дин тәблиғиндән әлавә Мәшһәд- Һерат арасында ипәк тиҹарәти илә мәшғул олуб. Пешәсилә әлагәдар һәмишә сәфәрдә олан Молла Һүсејн сәфәрләринин бириндә Кашанда евләнир. Бу издиваҹдан Нәсруллаһ, Мәһәммәдрза, Гуламрза вә Мәһәммәдказым (Ахунд Хорасани) адлы дөрд өвлад дүнјаја. ҝәлир.
Ахунд Хорасани 12 јашында Мәшһәд мәдрәссәсинә дахил олур. Бурада мәнтиг, әрәб дили грамматикасы, фигһ, үсул елмләрини мәнимсәјир. О, 22 јашында тәһсилини давам етдирмәк үчүн карванла Ирага сәфәрә јола дүшүр. Карван Сәбзиварда отураг едир. Заманын бөјүк философу Молла Һади Сәбзиваринин бөјүк елм мәгамындан аҝаһ олан Мәһәммәдказым карвандан ајрылараг алимин јанына ҝедир. О, гәмәри тәгвимилә 1277-ҹи илин рәҹәб, шабан вә рамазан ајларыны Сәбсивар мәдрәсәсиндә галыр. Сонра Теһрана ҝедәрәк 13 ај Сәдр мәдрәсәсиндә мәскунлашыр, Молла Һүсејн Хоји, Мирзә Әбулһәсән Ҹилвә кими бөјүк алимләрин дәрсиндә иштирак едир. Даһа сонра Ирага ҝедәрәк Шејх Әнсари, Мирзә Һәсән Ширазинин дәрсләринә гатылыр.
Ахунд Хорасани елми сәвијјәсини, мәнәви һалыны јүксәлтмәк үчүн ҝеҹә-ҝүндүз тәлаш едир вә бу истигамәтдә һеч бир чәтинликдән горхмур. Өзү бу барәдә дејир: "Јеҝанә јемәјим тәфәккүр иди, лакин јенә дә гане олмурдум. Һеч вахт нәјәсә ҝөрә ҝилејим олмады. Алты саатдан чох јатмырдым. Ҝеҹәләри ојаг галырдым. Улдузларла достлашмышдым. Аҹ гарына јатмаг чох чәтиндир".
Алим Кәрбәлаја сәфәрләринин бириндә Ахунд Әрдәканинин дәрсиндә иштирак едир. Дәрс әснасында Ахунд Әрдәкани Шејх Әнсаринин бир нәзәрини ачыглајыб тәнгид едир. Ахунд Хорасани Нәҹәфә гајытдыгдан сонра Әрдәканинин ирадларыны мүәллиминә чатдырыр. Шејх Әнсари Ахунд Әрдәканинин бир тәнгидини гәбул едир, диҝәрини исә гәбул етмир. Ахунд Хорасани Әрдакнинин тәнгидини мүдафиә едир, устад јенидән ону ҹавабландырыр. Јенидән Ахунд Хорасани башага ифадәјлә ә
Әрдәканинин фикрини мүдафиә едир. Беләликлә сөһбәт чох узаныр. Дәрсдә иштирак едән јүзләрлә тәләбә 25 јашлы тәләбәнин белә ҝүҹлү дәлилләрлә устадла елми мүбаһисә етмәсиндән чох тәәҹҹүбләнирләр. Тәләбәләрдән бири диҝәринә "Бу Ахунда (Хорасани) бахын ки, О Ахунддан (Әрдәкани) мүдафиә едир", - дејир. Бу замандан сонра Нәҹәфдә ону "Ахунд" ләгәбијлә таныјырлар.
Шејх Әнсари 13 ил әрзиндә Шејх Әнсари, Сејид Әли Шүштәри, Шејх Рази ибн Мәһәммәд Нәҹәфи, Мирзаји Ширази кими бөјүк алимләрин дәрсиндә иштирак едир.
Ахунд Хорасани тәләбә вахтларында Мирзаји Ширазинин фикирләринә дә ирад тутур. Шаҝирдлә устад арасында баш верән узун елми мүбаһисә заманы Ахунд устада еһтирам олараг сусур. Сабаһы ҝүн дәрс башламаздан өнҹә Мирзаји Ширази "Дүнәнки мүбаһисәдә Ахунд һаглы иди", - дејир.
Ахунд Хорасанинин 3000 минә гәдәр тәләбәси олдуғу вә бу тәләбәләр арасында 100-ә јахын мүҹтәһид јетишмәси гејд едилир. Бу мүҹтәһидләр арасында Сејид Сәдрәддин Сәдр, Шејх Әбдүлкәрим Һаири, шејх Мәһәммәдһүсејн Наини, Ағабозорҝ Теһрани, Һүсејн Буруҹерди вә с. адыны чәкмәк олар.
Ахунд Хорасани зөһд вә тәгвада да бөјүк наилијјәтләр әлдә етмишди. Һәтта гоҹалыг чағларында мүстәһәб намазлары тәрк етмәмәси дејилир. Ахундун гоншуларындан биринин дедијинә ҝөрә, алимин ҝеҹә јарысы налә вә сызылтысы һәр дашгәлблини белә титрәдирди.
Ахунд Хорасани чох садә һәјат тәрзи сүрүб. О үч евли оғлу илә бир мәнзилдә галырмыш. Евин дарлығындан шикајәт едән оғланларындан биринә "Әҝәр бу шәһәрин евләрини јохсуллар арасында бөлсәләр, бәлкә бизә бундан даһа аз дүшәр", - дејир.
Ахунд Хорасани хејли сајда әсәрин мүәллифидир. Ән мәшһур әсәри "Кифајә әл-Үсул" китабыдыр. Китаб һал-һазырда дини мәдрәсәләрдә Үсул саһәсиндә тәдрис олунан ән али дәрсликләрдән биридир.
Алим һиҹри-гәмәри тәгвимилә 1329-ҹу илдә вәфат едиб.
