Әһли Бејт - АБНА – Хәбәр Аҝентлијинин вердији хәбәрә әсасән, Мүсәлман Бирлији Һәрәкатынын сәдри, илаһијјатчы Тале Бағырзадә илә һәбс олунан даһа 16 нәфәрин вә АХҸП сәдринин мүавини Фуад Гәһрәманлы иши үзрә Бакы Ағыр Ҹинајәтләр Мәһкәмәсиндә кечирилән дүнәнки мәһкәмә иҹласында ҝәрҝинлик јашаныб. Буна сәбәб исә “Нардаран иши” үзрә тәгсирләндирилән шәхсләрин ДИН-ин Баш Мүтәшәккил Ҹинајәткарлыгла Мүбаризә Идарәсиндә (БМҸМИ) онлара ән чох ишҝәнҹә вермиш шәхсләрдән бири кими адыны чәкдикләри Шаһлар Ҹәфәровун мәһкәмәјә ҝәлиши олуб. Амма бундан әввәл һәмин идарәнин башга бир әмәкдашы Ҹејһун Имамвердијевин диндирилмәси давам етдирилиб. Онун ифадәсиндә бир сыра зиддијјәтли мәгамлар олуб.
“Етибар сизи ҝөзләјирди ки, габағынызда хәнҹәр ојнатсын?”
Мәсәлән, Имамвердијев дејир ки, нојабрын 26-да Нардаранда әмәлијјат кечирәркән евдән ики нәфәрин әлләриндә гумбара тәхминән ики метрлик һасардан тулланыб гачдыгларыны ҝөрүб. Нојабрын 27-дә ҝүнорта саат 12 радәләриндә вердији ифадәсиндә гачанлардан биринин Фәрһад Балајев олдуғуну билдириб.
Гачан адамын Ф.Балајев олдуғуну һардан билмәси барәдә мәһкәмәдә вәкилин суалына ҹаваб олараг, дејиб ки, буну әмәлијјат јолу илә мүәјјәнләшдирмишдиләр. Она ҝөрә дә истинтага ифадәсиндә елә дејиб.
Амма өтән мәһкәмә иҹласларында диндирилмиш Елчин Тағыјев адлы башга бир полис исә Фәрһад Балајеви нојабрын 27-дә ахшам саатларында хәстәхананын гаршысында ҝөрүб, ондан шүбһәләндијини, тутуб идарәјә ҝәтириб шәхсијјәтини мүәјјәнләшдирдикләрини дејиб.
Ф.Балајев һәр ики полисин јалан данышдығыны, онун әлиндә гумбара олмадығыны, өзүнүн дә нојабрын 27-дә јох, 26-да саат 15.00-16.00 радәләриндә сахланылдығыны билдириб. Әмәлијјат заманы ҝүлләләнмиш јаралылары хәстәханаја апаранлардан бири дә о олуб вә елә хәстәханада да сахланылыб.
Ҹ.Имамвердијев дејир ки, тәгсирләндирилән шәхсләрдән Етибар Исмајылову о зәрәрсизләшдирилиб. Һәмин вахт Исмајыловун әлиндә хәнҹәр олуб.
“Дејирсиз ки, Етибарын олдуғу отаға сәндән әввәл 5-6 полис әмәкдашы дахил олмушду, сиз дә ҝирәндә онун әлиндә хәнҹәри саға-сола ојнатдығыны ҝөрмүсүз. Бәс сиздән әввәл ҝирәнләр нијә зәрәрсизләшдирмирдиләр ону? Етибар Исмајылов сизи ҝөзләјирди ки, габағынызда хәнҹәр ојнатсын?” – Т.Бағырзадәнин бу суалына Ҹ.Имамвердијев белә ҹаваб вериб: “Ону мән дејә билмәрәм. Мән ҝөрдүјүмү дејирәм”.
Е.Исмајылов әлиндә хәнҹәр олмасы, сонра ахтарыш заманы ҹибиндән гумбара чыхмасы барәдә дејиләнләрин һәгигәтә ујғун олмадығыны билдириб: “Јәни мән хәнҹәри чыхарыб ојнада билдим, ҹибимдән гумбараны чыхара билмәдим?”
Тәгсирләндирилән Расим Ҹәбрајылов сахланыларкән Е.Исмајыловун јанында олдуғуну, һәмин вахт онларын әлләриндә һеч нә олмадығыны дејиб.
Вәсатәтләр тәмин олунмады
Ҹ.Имамвердијевин диндирмәси баша чатандан сонра вәкилләр Немәт Кәримли вә Зибејдә Садыгованын вәсатәтләри мүзакирә олунуб. Өтән мәһкәмә иҹласларында полис әмәкдашы Елчин Тағыјев суалларын бир чохуна “хатырламырам”, “билмирәм” ҹаваблары вердијинә ҝөрә Н.Кәримли онун психиатрик експертизадан кечирилмәси барәдә вәсатәт галдырыб.
Нардаран әмәлијјаты заманы алдығы ҝүлләләри һәлә дә бәдәниндә дашыјан, јалныз әл ағаҹларынын көмәјилә һәрәкәт едән Шамил Абдуләлијевин вәкили олан Зибејдә Садыгова исә онун дурумунун һәбсдә сахланмасына имкан вермәдијини вурғулајараг, ев дустаглығына бурахылмасы барәдә вәсатәт галдырыб.
Лакин вәсатәтләрин һеч бири тәмин олунмајыб.
“Бу, елә һәрәкәтләр еләјиб ки, нормал азәрбајҹанлы онлары еләмәз”
Бундан сонра БМҸМИ-нин әмәлијјат мүвәккили Шаһлар Ҹәфәров зәрәрчәкмиш вә шаһид гисминдә диндирилиб.
Ш.Ҹәфәров мәһкәмә залына дахил олан кими ону ҝөрән тәгсирләндирилән шәхсләр “бандотдел”дә онлара дәһшәтли ишҝәнҹә верәнләрдән биринин мәһз бу олдуғуну билдирибләр.
“Бу, ҹәлладды, азәрбајҹанлы дејил. Бу елә һәрәкәтләр еләјиб ки, нормал азәрбајҹанлы онлары еләмәз…”, – дејә Т.Бағырзадә билдириб.
Ш.Ҹәфәров ифадәсиндә билдириб ки, нојабрын 26-да сәһәр саат 10 радәләриндә БМҸМИ-дә шөбә рәиси Кәрим Әлимәрдановун рәһбәрлијилә әмәлијјат мүшавирәси кечирилиб: “Мәлумат дахил олмушду ки, Бағыров Тале Камил оғлу вә тәрәфдарларындан ибарәт силаһлы груплашма јарадылыб, дөвләтин конститусион гурулушуну дәјишмәјә ҹәһд ҝөстәрилир. Әмәлијјат групу јарадылды. Саат 12.15 радәләриндә Нардарана ҝетдик, Талеһ Бағыровун һансы евдә олдуғуну мүәјјәнләшдирдик. Мән һәјәтә һамам-туалет јерләшән тәрәфдән һасардан тулландым. Һовузун габағында Ҹаббар Ҹаббарову зәрәрсизләшдирдим. Һамыны зәрәрсизләшдирәндән сонра һал шаһидләри дәвәт олунду, һәјәтјаны саһәјә, евә бахыш кечирилди”.
Ш.Ҹәфәров суаллары ҹавабландыраркән прокурор она хатырладыб ки, тәгсирләндирилән шәхсләр һәм сахланыларкән, һәм дә БМҸМИ-дә ишҝәнҹәләрә мәруз галдыглары дејиб вә ишҝәнҹә верән шәхсләр сырасында онун да адыны чәкибләр.
“Нә мән, нә дә диҝәр әмәкдашлар онлара ишҝәнҹә вериб”, – Ш.Ҹәфәров ҹаваб вериб.
“О сөјүшләри ки сөјүрдү, мәни өлдүрсәјди, тока версәјди, ондан јахшыјды…”
Ш.Ҹәфәров даһа сонра вәкилләрин суалларыны ҹавабландырыб.
Вәкил Ҝүлшән Салманова:
– Експерт рәјиндә ҝөстәрилиб ки, Ҹаббар Ҹаббаровун үзәриндә хәсарәтләр, дөјмә әламәтләри олуб. Бу барәдә нә дејә биләрсиз?
– Ола билсин ки, ону зәрәрсизләшдирәркән јерә јыхылыб, бунун нәтиҹәсиндә јараныб.
– Тәгсирләндирилән шәхсләр онлара ишҝәнҹә вермиш әсас шәхсләрдән бири кими мәһз сизин адынымызы чәкирләр. Нијә?
– Дејә билмәрәм.
Вәкил Јалчын Иманов:
– Нә әҹәб белә бир хүсуси әмәлијјатын чәкилишини апармадыныз?
– Ону мән дејә билмәрәм, рәһбәрлик биләр.
– Истинтагдакы ифадәләриниз башга полис әмәкдашлары илә ејнидир. Сәбәб нәдир?
– Чүнки ејни һадисә барәдә ифадә вермишик.
– Ифадәләрин сөзбәсөз, нөгтә-верҝүлүнә гәдәр ејни олмасыны неҹә изаһ едә биләрсиз?
– Мән бу суала ҹаваб вердим.
– Зәрәрчәкмиш гисминдә диндирилирсиз, һансы зәрәри чәкмисиз?
– Мәнәви зәрәр. Өләнләрдән бири мән дә ола биләрдим.
Бундан сонра вәкил Јалчын Иманов Т.Бағырзадә илә Ш.Ҹәфәров арасында чарпаз диндирмә апарыб.
Вәкил Јалчын Иманов:
– Бу адамы таныјырсыз?
Т.Бағырзадә:
– Әлбәттә. Бу, Нардаран әмәлијјатында иштирак едиб. Бизи апаранда мебел машынында Фәраһим Бүнјадову дөјүб өлдүрәнләрдән бири будур. Орада чох әхлагсыз сөјүшләр сөјүрдү. Мәндән Милли Шуранын, Ҹәмил Һәсәнлинин, Әли Кәримлинин әлејһинә ифадә алмаг үчүн шәрәфсизҹәсинә ишҝәнҹә верәнләрдән бири бу олуб. Мәни башыма маска кечириб, зирзәмијә ҝәтириб дәһшәтли ишҝәнҹәләр верирди. О гәдәр данышыб, о гәдәр сөјүшләр сөјмүшдү ки, сәсиндән таныјырдым ону. О сөјүшләри ки сөјүрдү, мәни өлдүрсәјди, тока версәјди, ондан јахшыјды…
“Автоматын гундағы илә о гәдәр вурдулар ки, ҝөзүмүзүн габағында ҹан верди…”
Вәкил Ј.Иманов Ш.Ҹәфәрова:
– Талеһ Бағырзадәнин сөјләдикләри илә әлагәдар нә дејә биләрсиз?
– Јалан дејир.
Т.Бағырзадә:
– Јаланы сән өзүн данышырсан. Бурада данышдыгларын башдан-ајаға јалан иди.
Вәкил Ј.Иманов Т.Бағырзадәјә:
– Билдирирсиз ки, Фәраһим Бүнјадову дөјүб өлдүрәнләрдән бири будур. Бүнјадов һансы шәраитдә өлдү?
– Бизи апардыглары мебел машынында бу, хүсусилә фәаллыг едирди, ҹанфәшанлыг едирди. Ән чох гансызлыг, јыртыҹылыг едәнләрдән бири будур. Фәраһимин голларыны архадан бағламаг истәјирдиләр. Башына автоматын гундағы илә о гәдәр вурдулар ки, ахырда “Аллаһу Әкбәр” дејә-дејә ҹан верди ҝөзүмүзүн габағында. Сон нәфәсиндә мәнә деди ки, “Һаҹы”…
Бу јердә Т.Бағырзадә көврәлиб вә аз сонра фикрини давам етдириб:
– Индијә гәдәр бурада бир нечә полис диндирилиб. Јалан данышсалар да, онларын һеч биринә гаршы бу ҹүр агрессив олмамышыг. Бил ки, Вәли Әләсҝәровун, Акиф Човдаровун јанында сән ушагсан. Амма онларын агибәтини ҝөрдүн? Архајын ол, сәнин ахырын онлардан да пис олаҹаг…
“Аллаһ ләнәт еләсин!”
Һаким буну зәрәрчәкмишин һәдәләнмәси кими гијмәтләндириб. Бундан сонра мәһкәмәдә вәзијјәт ҝәрҝинләшиб. Ш.Ҹәфәров тәрәфиндән ишҝәнҹәјә мәруз галдығыны дејән диҝәр тәгсирләндирилән шәхсләр дә она ағыр ифадәләр үнванлајыблар. Тәрәфләр бир-биринә пластмас су бутылкалары атыблар.
Тәгсирләндирилән шәхсләрин јахынлары да Ш.Ҹәфәровун үнванына “Аллаһ ләнәт еләсин”, “Еләдикләрин балаларынын габағына чыхсын” кими фикирләр сәсләндирибләр.
Мәһкәмә сентјабрын 7-дә давам едәҹәк.
Диггәт: Хәбәрдән истифадә етдикдә мәнбәјә истинад лазымдыр
