Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Бакы Ағыр Ҹинајәтләр Мәһкәмәсиндә Ганлы Нардаран Фаҹиәсилә бағлы Мүсәлман Бирлији Һәрәкатынын сәдри Тале Бағырзадә, АХҸП сәдринин мүавини Фуад Гәһрәманлы вә даһа 16 нәфәрин мәһкәмә истинтагы башлајыб.
Мәһкәмә просесини изләмәјә ҝәләнләр арасында тәгсирләндирилән шәхсләрин јахынлары, өлкәнин демократик иҹтимаијјәтинин нүмајәндәләри, о ҹүмләдән АХҸП сәдри Әли Кәримли, АБШ, Франса, Бөјүк Британија, Алманија, АБШ сәфирликләринин тәмсилчиләри дә варды.
“Мәликмәммәдин нағылы бундан даһа мараглыдыр”
Мәһкәмә иҹласында әввәлҹә прокурор иттиһам актыны елан едиб. Иттиһам актында јазылыб ки, Тале Бағырзадә тәрәфдарларыны топлајараг, мүтәшәккил дәстә јарадыб, һакимијјәти зорла әлә кечирмәјә, дөвләтин конститусион гурулушуну дәјишмәјә јөнәлик чағырышлар едиб, дәстә үзвләринә террор актларынын төрәдилмәсинә даир ганунсуз ҝөстәришләр вериб.
Мәһкәмә гаршысына чыхарылан 18 нәфәрдән Фуад Гәһрәманлы истисна олмагла, диҝәрләринә гаршы ҸМ-нин 20-дән артыг маддәсилә иттиһам ирәли сүрүлүб. Онларын арасында гәсдән адам өлдүрмә, күтләви иғтишашларын тәшкили, террорчулуг вә с. иттиһамлар вар. Иш материалларында јазылыб ки, бу шәхсләр һәбс олунаркән онларын һәр биринин үзәриндән әл гумбарасы, автомат, тапанча, патронлар ҝөтүрүлүб.
Фуад Гәһрәманлы исә дөвләт әлејһинә ачыг чағырышлар етмәкдә, милли, ирги, дини нифрәт вә дүшчәнчилијин салынмасында иттиһам олунур. Гејд олунуб ки, Фуад Гәһрәманлы 2015-ҹи илин сентјабрындан декабрынадәк “фаҹебоок” сәһифәсиндә јаздығы статусларда Азәрбајҹан һакимијјәтини Језидә, ҝүнаһкар ҝүҹә бәнзәдиб, халгы вә мүхалифәти нардаранлылара, о ҹүмләдән Тале Бағырзадә вә онун тәрәфдарларына дәстәк вермәјә, Имам Һүсејн кими шәһид олмаға чағырыб.
Мәһкәмә просесинә сәдрлик едән һаким Әлөвсәт Аббасов тәгсирләндирилән шәхсләрдән иттиһамлары гәбул-етмәдикләрини сорушаркән онларын ҹаваблары белә олуб: “Иттиһам актында јазыланлар ссенаридир”, “Мәликмәммәдин нағылы бундан даһа мараглыдыр”, “полисләри дә өзләри өлдүрүбләр, имкан верин, сүбут еләјәк”… Фуад Гәһрәманлы исә иттиһам актыны “дөвләт адындан һазырланмыш сијаси репрессија акты” адландырыб вә өзүнү гәтијјән тәгсирли билмәдијини дејиб. Тале Бағырзадә дә орада јазыланларын ҹәфәнҝијјат олдуғуну билдириб.
Нардаран әмәлијјатыны МТН һазырламалыјды, амма…
Ардынҹа тәгсирләндирилән шәхсләрин диндирилмәси мәрһәләси башлајыб вә илк ифадә верән Тале Бағырзадә олуб. О билдириб ки, нојабрын 26-да Нардаранда әслиндә нә баш вердији билмәк үчүн ондан әввәлки һадисәләри нәзәрдән кечирмәк лазымдыр. Өтән ил нојабрын 1-дә Азәрбајҹанда кечирилән парламент сечкиләриндә јол верилән позунтуларла әлагәдар Мүсәлман Бирлији Һәрәкаты олараг, сечкинин нәтиҹәләрини танымадыгларыны вә бу барәдә бәјанат јајдыгларыны дејән илаһијјатчынын сөзләринә ҝөрә, бундан сонра парламентдә онларын ҹәзаландырылмасына даир фикирләр сәсләниб: “Сахтакарлыгла, коррупсија илә формалашдырылан бир органы Милли Мәҹлис адландырмаға да адамын дили ҝәлмир. Ҝөрүнүрдү ки, һакимијјәтин әсәбләри тарыма чәкилиб. Бунун нәтиҹәси олараг, нојабрын 2-дә мәни Јасамал Рајон Полис Идарәсинә чағырдылар. Ондан әввәл дә МТН-ә чағырмышдылар. МТН-дә мәни Антитеррор Мәркәзинин рәис мүавини, сонрадан Күрдәханы түрмәсиндә өзүнү асан Илгар Әлијев гәбул еләмишди. Илгар мәнә деди ки, “онсуз да өлкәдә вәзијјәт писди, девалвасија-филан, сиз дә адамлары галдырмајын”. Сонрадан билдим ки, Нардаран әмәлијјатыны МТН һазырламалыјды, садәҹә, МТН әтрафында мәлум һадисәләр баш верди вә бу иши Дахили Ишләр Назирлији ҝөрәси олду.
“Әли Һәсәнов хәбәр ҝөндәрмишди ки, бунлар Аллаһшүкүрүн ишләриди”
Јасамал полисиндә мәни идарәнин јени рәиси, Сәттар Меһбалыјевин оғлу Исфәндијар Меһбалыјевин јанына апардылар. О, мәнә гаршы физики зор тәтбиг еләди. Амма сонра бурахдылар. Анладым ки, бунлар бизи тәхрибата чәкмәк истәјирләр, ҝөзләјирләр ки, мәнә гаршы еләдикләринә ҝөрә биз ајаға галхаг. Амма мән әксини еләдим. Мәсәләни ганун мүстәвисиндә һәлл еләмәк үчүн зоракылыгла әлагәдар прокурорлуға шикајәт еләдим. Ҝөрдүләр биз тәрәфдән һеч ким ајаға галхмыр, үч ҝүн сонра – нојабрын 5-дә Сабунчу тәхрибатыны төрәтдиләр. Мүавиним Елчин Гасымову евиндән оғурлајыб апардылар, “тока” вердиләр. Елчин Гасымовун мүдафиәси үчүн идарәнин гаршысына ҝедән динҹ адамлара гаршы мәгсәдли шәкилдә тәхрибат јаратдылар. Нојабрын 7-дә телеканалларда, хүсусән Фәтуллаһ Ҝүләнин каналы олан “Хәзәр ТВ”дә бизи ИШИД вә диҝәр террор тәшкилаты, онларын лидерләри илә мүгајисә едирдиләр. Ҝуја, биз террорчујуг.
Бундан сонра Әли Һәсәнов вә Камал Абдуллаја јахын олан бир ГҺТ рәһбәри јаныма ҝәлди. Билдирди ки, Әли Һәсәнов дејир, бүтүн бунлар Аллаһшүкүрүн ишләриди. Һәмин адама дедим ки, Азәрбајҹанда телевизија мәканына Әли Һәсәнов өзү башчылыг едир. Мәнә гаршы зоракылыг едән Исфәндијар Меһбалыјев Әли Һәсәновун гудасынын оғлудур”.
“Бизи өмүрлүк һәбсә атмаг үчүн ссенари дүзүб-гошублар”
Тале Бағырзадә дејир ки, Нардаран әмәлијјаты Президент Апаратынын мәтбәхиндә һазырланыб: “Мән буну “дәвәгушу әмәлијјаты” адландырырам. Башларыны гума салыблар, бәдәнләриндән хәбәрләри јохдур. Бүтүн иҹтимаијјәт, бејнәлхалг тәшкилатлар ҝөрдү ки, Әли Һәсәнов да дахил олмагла, Президент Апаратындакыларын һазырладығы ссенари нә гәдәр примитивди”.
Нардарана ҝетмәсинин сәбәбләриндән данышан илаһијјатчы билдириб ки, Милли Гәһрәман Мүбариз Ибраһимовун өлүмүнүн илдөнүмү мәрасиминдә она гаршы тәхрибат һазырландығы барәдә мәлумат алыб. Она ҝөрә дә мәрасимдә иштирак етмәмәк вә үмумијјәтлә, бир мүддәт шәһәрдән узаглашмаг гәрары вериб: “Биз тәхрибата ҝетмирдик. Чүнки мүбаризәмиз динҹ, сивил олуб. Һеч бир хариҹи гурумла бағлылығымыз олмајыб. Бунлары да тәлашландыран елә бу иди. Бизи өмүрлүк һәбсә атмаг үчүн ссенари дүзүб-гошублар. Амма ону унутмасынлар ки, өзләри дә өмүрлүк һакимијјәтдә галасы дејилләр. Бизим мүбаризәмиз исә һәбсдә дә давам едир. Сечиб ики диндар полиси, динҹ адамлары өлдүрдүләр. Әҝәр ҝүнаһымыз варса, биз, јохдурса, о заман бу һадисәләри төрәдәнләр, бу маддәләри бизә верәнләр шәрәфсиз, алчагдылар. Мәним һеч бир чыхышымда силаһлы чеврилишә чағырыш барәдә бир кәлмә дә јохдур. Мән һәбсдән чыхандан сонра вердијим мүсаһибәләрдә, чыхышларымда билдирмишәм ки, Азәрбајҹанда ислам дөвләти гурмаг гејри-мүмкүндүр. Һә гәдәр һәјасыз олмалысан ки, бунун әксини јазасан. Истинтагы апаранлар о гәдәр савадсыздылар ки, 12-ҹи Имам дуасы еләмәјими чеврилишә ҹәһдин сүбуту кими тәгдим едибләр. Бу ҝүн Аллаһшүкүр, диҝәр сарај моллалары да бу дуаны охујур, инди онлары да тутмаг лазымдыр?!
Гурана анд ичирик ки, бу маддәләрин һеч биринин бизә аидијјәти јохдур. Әҝәр биздә силаһ олубса, Гуран бизә гәним олсун. Әкс һалда, бу ссенарини гуранлара, ҝүнаһсыз адамлары гәтлә јетирән, ишҝәнҹә верәнләрә гәним олсун. Гој ҝәлсинләр, бурада Гурана анд ичсинләр ки, биздән силаһ чыхыб. Әлими Гурана басарам ки, ҝүнаһсыз гардашларымызын да, о ики полисин дә өлүмү Дахили Ишләр Назирлијинин үзәриндәдир”.
“Машына миндирәндә дәһшәтә ҝәлдим, ҹәсәдләри, үз-ҝөзү ган адамлары тапдалајырдылар”
Илаһијјатчы ҹинајәт ишинин материалларында олан “Һаҹы Тале Бағырзадәнин мүраҹиәти” адлы китабчадан да данышыб: “Јазыблар ки, ҝуја, о китабча һамымызын евимиздән чыхыб. Јаландыр. Үмумијјәтлә, белә бир китабча олмајыб. Ону 26 нојабрдан сонра өзләри һазырлајыблар. Ешитдијимә ҝөрә, һүгуг мүдафиәчиси адландырылан бәзиләри артыг-әскик данышыблар. Һеч ким артыг данышмасын, һәгигәти билмәк истәјирсә, бу мәһкәмәјә ҝәлсин. Дүздүр, бу мәһкәмәнин сонда һадисәләрә објектив гијмәт верәҹәјинә инанмырам. Амма ән азы, бурада һәгигәт үзә чыхыр. Инанырам ки, бизим мүбаризәмиз нәтиҹәсини верәҹәк, бир ҝүн бу һакимијјәт бу еләдикләринә ҝөрә ганун гаршысында ҹаваб верәҹәк. Биз ианы топлајыб, ушаг евләринә, касыб аиләләрә јардым едирдик. Тәсәввүр един, ушаг евинә јардым апармышыг, ертәси ҝүн МТН ора басгын едиб ки, нијә бунлары ичәри бурахмысыз”.
Тале Бағырзадә һәбс олунуб апарыларкән машында, ондан сонра да Баш Мүтәшәккил Ҹинајәткарлыға Гаршы Мүбаризә Идарәсиндә һәм өзүнүн, һәм дә диҝәр јолдашларынын ишҝәнҹәјә мәруз галмасындан да данышыб: “Бүтүн ифадәләр ишҝәнҹә алтында алыныб. Мәни “бандотдел”дә дөјәндә дејирдиләр ки, дејирдин, арханда Аллаһын вар, бәс нә олду? Мән дә она ҹаваб вердим ки, мәни сахлајан Аллаһ вар ки, сәнин кимисинин гаршысында сынмырам. 26 нојабрда биз намаз үстүндә идик. Күчәдән силаһ сәсләри ҝәлди. Гара маскалылар ҝүллә ата-ата ичәри һүҹум еләдиләр. Мебел машынлары илә ҝәлмишдиләр. Мәни гандаллајыб мебел машынына миндирәндә дәһшәтә ҝәлдим. Ҹәсәдләр, үз-ҝөзү ган олан адамлары тапдалајырдылар. Һаҹы Фәраһим гардашымыз там сағлам иди, ону машында дөјә-дөјә өлдүрдүләр. Мәни машына атандан сонра әлләриндәки силаһларын архасы илә башыма, үз-ҝөзүмә вурурдулар, елә орада бурнуму сындырдылар. Апарыб бизи “бандотдел”дә јерә атыб тәпикләјирдиләр. Үч ҝүн өзүмдә олмадым. Һәтта прокурорлуғун мүстәнтиги ҝәлиб мәни ҝөрәндә онлара деди ки, “даһа бу гәдәр дә еләмәјин дә… “Дубинка” илә ајағымын алтына о гәдәр вурмушдулар ки, ҝәзә билмирдим”.
Тале Бағырзадә вурғулајыб ки, онларын һеч бириндә силаһ олмајыб: “Ишҝәнҹә вериб јалан ифадә алмагла дејил, ортаја чүбут гојсунлар. Һаны әмәлијјатын чәкилиши? Бизим үстүмүзә гојдуглары силаһларла Гарабағы алмаг оларды. Әҝәр биз о евдә дөвләт чеврилиши һазырлајырдыгса, орада гадын, көрпә ушаглар нә ҝәзирди? Нә гәдәр виҹдансыздылар ки, һүҹум заманы автоматы ушаглара да тушлајыблар. Әввәл башладылар ки, Ирана ишләјирсиз, сонра Милли Шураја кечдиләр, ахырда да дедиләр ки, имканлы адамларын адларыны де бизә”.
“Дедиләр ки, Милли Шуранын әлејһинә ифадә версән…”
Илаһијјатчынын сөзләринә ҝөрә, Мүсәлман Бирлији Һәрәкаты 2015-ҹи ил јанварын 13-дә тәсис олунуб. Һәмин вахт өзү һәбсдә олуб. Тәшкилатын јаранма мәгсәдинин милли ирадәнин ифадәси олдуғуну дејән Тале Бағырзадә гејд едиб ки, гурумун дөвләт гејдијјатына алынмасы үчүн үч дәфә сәнәдләр Әдлијјә Һазирлијинә тәгдим олунса да, һәр дәфә ҝери гајтарылыб.
Тале Бағырзадә “бандотдел”дә она Милли Шураја гаршы ифадә верәҹәји тәгдирдә верилән вәддән дә данышыб: “26 нојабрда мәни о гәдәр дөјмүшдүләр ки, үч ҝүн өзүмдә олмадым. Үч ҝүн сонра чағырдылар ки, маддәни јүнҝүлләшдирәҹәјик, сән садәҹә, јаз ки, бизим архамызда Милли Шура, Нардаран һадисәләринин архасында Ҹәмил Һәсәнли, Әли Кәримли дајаныр. Үстәлик, буну да дедиләр ки, онлар АБШ-а ишләјир, сизи истәмирләр. Ҹавабында дедим ки, мәним дамарымда киши ганы ахыр, нәинки онларын, һеч сизин дә үзүнүзә дура билмәрәм. Онда ҝәрәк мән јашамајым. “Бандотдел”дә “Шрек” ләгәбли бири вар, ваһимәли бириди, бундан сонра о, отаға ҝирди, башлады дөјмәјә. Үч ҝүн ағласығмаз ишҝәнҹәләр вердиләр. Елә мәнәви ишҝәнҹәләр верирдиләр ки, сонра өзүмә бир шеј еләјәҹәјимдән горхуб јаныма адам салырдылар. Һисс еләјирдим ки, Милли Шураны бу ишә гошмаг истәјирләр. Бу алынмајанда Лејла Јунус һәбсдән бурахылан ҝүн Фуад Гәһрәманлыны тутдулар. Ондан сонра бу мәсәлә гапанды. Әҝәр мән истәдикләри ифадәни версәјдим, Ҹәмил Һәсәнли, Әли Кәримли вә Фуад Гәһрәманлыны тутаҹагдылар”.
“Елә вәзијјәтә салмышдылар ки, санксија үчүн мәһкәмәјә апаранда јеријә билмирдим”
Диҝәр тәгсирләндирилән Аббас Һүсејнов билдириб ки, мәһкәмәдән әдаләтли нәтиҹә ҝөзләмир. Она ҝөрә дә мәһкәмә үчүн јох, әслиндә нә баш вердијинин иҹтимаијјәтә бәлли олмасы үчүн ифадә верир. О, ифадәсиндә иттиһамларын гондарма олдуғуну билдириб, ишҝәнҹәјә мәруз галмасындан данышыб. Әмәлијјат заманы јараландығыны дејән Аббас Һүсејнов гејд едиб ки, узун мүддәт, һәтта јахынлары белә, онун сағ олдуғуну билмәјиб. Чүнки онун өлдүјү барәдә јалан мәлумат јајылыб: “Ишҝәнҹәләрлә бағлы Закир Гаралова мәктуб јазмышам. Мәнә ҹаваб ҝәлиб ки, “сизи тутаркән һеч әлинизи гандалламајыблар, өз хошунузла ифадә вермисиз”. Тәсәввүр един, нә гәдәр шәрәфсиздиләр ки, бизи тутуб машында апаранда маскалылардан бири Әкбәр гардашымызын ҹәсәдини ҝөстәриб дејирди ки, “бунун гарнына ҝүлләләри мән долдурмушам”. Мәни ҝеҹәдән сәһәрә гәдәр әли гандаллы вәзијјәтдә, башыма торба кечириб дөјүрдүләр. Мәҹбур еләјирдиләр ки, тутуланларын әлејһинә ифадә верим. Мәни елә вәзијјәтә салмышдылар ки, санксија үчүн мәһкәмәјә апаранда јеријә билмирдим, зомби полисләрдән икиси голума ҝириб апарырдылар. Чиркинликләрини өрт-басдыр еләмәк үчүн мәһкәмәјә апаранда палтар, ајаггабы алыб ҝејиндирдиләр. Дөвләт һесабына тәјин олунан вәкил, һаким бир сорушмады ки, бу адамын үз-ҝөзү нијә бу ҝүндәди?”
Аббас Һүсејнов дејир ки, һәбсиндән әввәл Јасамал РПИ-нин рәиси Исфәндијар Меһбалыјев онун анасыны чағырараг, оғлунун башына ојун ачылаҹағы илә һәдәләјиб.
“Ҹаһанҝир Һаҹыјев мәнә верилән ишҝәнҹәләрә шаһидди”
Аббас Һүсејнов она верилән ишҝәнҹәләрлә әлагәдар Бејнәлхалг Банкын һәбсдә олан кечмиш рәһбәри Ҹаһанҝир Һаҹыјевин шаһид гисминдә мәһкәмәдә диндирилмәсини истәјиб: “Чүнки һәмин вахт о да “бандотдел”дә иди вә мәнә верилән ишҝәнҹәләри, бәдәнимдәки хәсарәт изләрини ҝөрүб”.
Тале Бағырзадә дә Аббас Һүсејновун дедикләрини тәсдигләјиб: “Бандотдел”дә гардашларымызын ишҝәнҹәдән гышгыртылары мәни нараһат едирди. Аббасын да сәсини ешитдим, мүстәнтигә дедим ки, Аббасы чағырын, она дејәҹәм ки, тәләб олунан ифадәјә гол чәксин. Инсанлары өлдүрмәк олмаз, ҝеҹә сәһәрә гәдәр гышгырыг сәсләри ҝәлирди”.
Аббас Һүсејновун сөзләринә ҝөрә, јанвар ајында ондан ишҝәнҹә алтында истәдикләри ифадәни аландан сонра евләрилә телефонла әлагә сахламасына имкан верилиб: “Бу һакимијјәтин әли нә гәдәр инсанын ганына батыб. Бу ҹүр һакимијјәти неҹә мүдафиә едирсиз?”
Мәһкәмә просеси августун 4-дә диҝәр тәгсирләндирилән шәхсләрин ифадәләрилә давам едәҹәк.
Диггәт: Хәбәрдән истифадә етдикдә мәнбәјә истинад лазымдыр
