Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Сабунчу Рајон Мәһкәмәсиндә 26 Нојабр, 2015 тарихдә Илһам Әлијевин бир-баша нәзарәти илә һәјата кечирилән Ганлы Нардаран Фаҹиәси илә бағлы ҝүнаһсыз јерә һәбс едилән вәтәндаш Әләкбәр Гурбановун ҹинајәт иши үзрә мәһкәмә просеси баша чатыб.
Мәлумата ҝөрә, сифаришли мәһкәмәнин һөкмү илә Ә.Гурбанов 2 ил 6 ај мүддәтинә азадлыгдан мәһрум едилиб.
Һөкмдән наразы галан мәһкум вә онун мүдафиәчиси Осман Казымов апеллјасија шикајәти вериб. Иш үзрә Бакы Апеллјасија Мәһкәмәсиндә кечириләҹәк илкин бахыш иҹласы ијулун 5-нә тәјин едилиб. Ишә һаким Ҹамал Рамазановун сәдрлији илә бахылаҹаг.
Ә.Гурбанов Ҹинајәт Мәҹәлләсинин 228.1-ҹи (ганунсуз олараг одлу силаһ, онун комплект һиссәләрини, дөјүш сурсаты (јивсиз одлу ов силаһы вә һәмин силаһ үчүн дөјүш сурсаты истисна олмагла), партлајыҹы маддәләр вә гурғулар әлдә етмә, башгасына вермә, сатма, сахлама, дашыма вә ја ҝәздирмә) маддәси илә Шәрләнәрәк иттиһам олунуб.
Гејд едәк ки, Дахили Ишләр Назирлији (ДИН) 2015-ҹи ил нојабрын 26-да Бакы шәһәри Сабунчу рајонунун Нардаран гәсәбәсиндә хүсуси әмәлијјат кечирилиб. ДИН билдиришинә ҝөрә, әмәлијјата бир-баша Илһам Әлијев башчылыг едиб. Зибил машынлары илә Нардаран гәсәбәсинә сохулан полисләр әмәлијјат заманы зоһр вә әср намазлары илә мәшғул олан вәтәндашлара силаһлы мүгавимәт ҝөстәрәрәк автомат силаһлардан атәш ачыб, әл гумбарасы атыб. Полисин давамлы атәшләри нәтиҹәсиндә 4 сивил Шәһид едилиб, даһа бир нечә нәфәр јараланыб. Әмәлијјатын даһа да тәбии алынмасы вә вәтәндашларын ҹинајәткар олдуғуну чатдырмаг үчүн өз әмәкдашларындан икисини гәтлә јетирир. Бу ҝүнә кими һадисә јериндән полисин истифадә етдији автомат силаһ, әл гумбарасы, сојуг силаһлар вә с.-дән башга мадди сүбут кими һеч бир факт тапылмајыб.
Диггәт: Хәбәрдән истифадә етдикдә мәнбәјә истинад лазымдыр
